Kulvi Outer Seraji Bible
एजकेल 10
बिधातो प्रतप्प डेऊअ भबना का दूर
मुखा शुझुअ धैनै इहअ कि तिन्नां फैंखा आल़ै ज़ीबा प्रैंदै आसा एक छ़तर अर तेथ प्रैंदै शुझुअ मुखा राज़गाद्दी ज़िहअ आसन, सह आसा नीलमणीं किम्मती पात्थरा करै बणाअं द।1 बिधाता बोलअ तेऊ मणछा लै ज़ुंणीं बाछे शेतै झिकल़ै थिऐ बान्हैं दै, “तूह डेऊ इना घरेटा मांझ़ै ज़ुंण इना फैंखा आल़ै ज़ीब हेठै आसा, आपणैं अंदल़ू दी ज़ल़दै-ज़ल़दै नार संघा छिंग तिन्नां नगरी प्रैंदै।”2
मंऐं भाल़अ सह मणछ तिहअ ई करदअ। तिंयां फैंखा आल़ै ज़ीब तै तेभै भबने दखण दिशा बाखा खल़्हुऐ दै ज़ेभै सह मणछ भितरा लै डेऊअ। बिधाते भबना भितरी ताटी तै घणैं बादल़ घोर्हुऐ दै। बिधाते प्रतप्पो झ़ामण आअ तिन्नां फैंखा आल़ै ज़ीबा प्रैंदा का भबने प्रऊल़ी लै। भबन हुअ बादल़ा करै भरी अर भबने खोल़ै हुअ सारै दी प्रैश्शअ। तिन्नां ज़ीबे फैंखे छ़ेल़ ती बिधाते भबने बाघली ताटी तैणीं सारै दी शुण्हदी लागी दी। सह शुण्हिंआं त इहअ कि बिधाता आसा गल्ला करदअ लागअ द ज़हा का सारअ बल आसा।
ज़ांऊं बिधाता तेऊ बाछे शेतै झिकल़ै बान्हैं दै मणछा लै इहअ हुकम किअ, “तूह डेऊ इना घरेटा मांझ़ै ज़ुंण इना च़ऊ फैंखा आल़ै ज़ीब हेठै आसा, आपणैं अंदल़ू दी ज़ल़दै-ज़ल़दै नार।” सह मणछ डेऊअ संघा खल़्हुअ तिन्नां मांझ़ै एकी घरेटा सेटा। तिन्नां फैंखा आल़ै ज़ीबा मांझ़ै पाअ एकी ज़ण्हैं आपणअ हाथ उंधै आगी जैंदरी ज़ुंण तिन्नां मांझ़ा-मांझ़ी थिई ज़ल़दी लागी दी। तेऊ च़कै तेता का ज़ल़दै नार संघा दैनै तेऊ बाछे झिकल़ै बान्हैं दै मणछा लै। तेऊ मणछै निंयैं तिंयां नार संघा लागअ हांढदअ।
मुखा शुझुअ इहअ कि तिन्नां फैंखा आल़ै ज़ीबे तै तिन्नें फैंखा हेठै हरेकी फैंखा हेठै मणछा ज़िहै हाथ बाहा। हुंह त तिन्नां फैंखा आल़ै ज़ीबा भाल़अ लागअ द कि मुखा शुझुऐ तिन्नां च़ऊ ज़ीबे मुंहें सिधा दी धरनीं च़ार घरेट, तिंयां च़ार घरेट तै पेरोज़ नाओंए किम्मती पात्थरा ज़िहै च़मकदै लागै दै, तिंयां तै ज़ाथी सोभै एकी रंगे अर बराबर। तिंयां घरेट ज़ाण्हिंआं तै इहै बणाऐं दै कि एक घरेट आसा दुजै घरेटा मांझ़ै। तिंयां घरेट तै एकी दुजे सिधा दी।3 आजू-पिछ़ू ओर्ही-पोर्ही ज़ेथ बाखा तिन्नों शाह बोलअ तिंयां दैआ तै कठा डैअ अर आजू-पिछ़ू ओर्ही-पोर्ही डेऊंणा लै निं तिन्नां फेरअ दैणें ज़रुरत हंदी ती। तिन्नें देही दी आजू, पिछ़ू पिठी, फैंखा दी थिई सारै दी आछी ई आछी अर तिन्नां घरेटा दी बी थिई सारै दी आछी।4 मुखा शुण्हुंअ कुंण तिन्नां घरेटा लै बोल्दअ, “भ्रिंऊं बाहणैं आल़ै घरेट।”
तिन्नां सोभी फैंखा आल़ै ज़ीबे तै च़ार-च़ार मुंह। एक त बल्दो मुंह, एक त मणछो मुंह, एक त सिहो मुंह अर एक त मुक्षरलैओ मुंह।5 तिंयां तै तिंयां ई ज़ीब ज़ुंण मुखा कबार दरैऊए बाढै शुझुऐ तै। ज़िधा लै बी तिंयां ज़ीब डेओआ तै, तिंयां घरेट ठुर्हा तै धरनीं तिन्नां संघै तिधी लै। ज़ांऊं तिंयां ज़ीब धरना का उझै उझ़िआ तै, तिंयां घरेट बी उझ़िआ तै उझै। ज़ांऊं तिंयां ज़ीब खल़्हिया तै, तिंयां घरेट बी खल़्हिया तै तिहै ई, ज़ांऊं तिंयां ज़ीब डैअ बाहा तै, तिंयां घरेट बी डेओआ तै तिन्नां ई संघै किल्हैकि तिन्नां ज़ीबो शाह त तिन्नां घरेटा दी।
तेखअ उझ़ुअ भबने प्रऊल़ी का बिधातो झ़ामण उझै संघा लागअ तिन्नां फैंखा आल़ै ज़ीबा प्रैंदै। हुंह त भाल़अ लागअ द, तिन्नैं ज़ीबै फुआरै आपणैं फैंख अर हेरा-हेरी बाहअ तिन्नैं फैंखा आल़ै ज़ीबै उझै डैअ अर तिंयां घरेट बी डेऊऐ तिन्नां ई संघै धरती का उझै। तेखअ खल़्हुऐ तिंयां बिधाते भबने पुर्बा बाखा प्रऊल़ीए सिधा। इज़राईले परमेशर बिधातो झ़ामण त तिन्नां प्रैंदै लागअ द। मंऐं हेरै तिंयां फैंखा आल़ै ज़ीब बछ़ैणीं, तिंयां तै तिंयां ई ज़ीब ज़ुंण मंऐं कबार दरैऊए बाढै इज़राईले परमेशर बिधाते राज़गाद्दी हेठै भाल़ै तै।
तिन्नां सोभी तै च़ार-च़ार मुंह च़ार-च़ार फैंख अर हरेकी फैंखा हेठै शुझुई मुखा मणछा ज़िहै हाथ-बाहा। तिन्नें तिंयां मुंह बी शुझिआ तै ज़ाथी तिन्नें ई मुंहां ज़िहै ज़ुंण ज़ीब मंऐं कबार दरैऊए बाढै भाल़ै तै। तिंयां सोभ बाहा तै आजू बाखा कोहरअ कठा डैअ।
Source notes (5)
- Cross-reference एज. 1:26; प्रका. 4:2
- Cross-reference प्रका. 8:5
- Cross-reference एज. 1:15-21
- Cross-reference प्रका. 4:8
- Cross-reference एज. 1:10; प्रका. 4:7
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.