Kulvi Outer Seraji Bible
एजकेल 9
एरुशलेम नगरी लै सज़ा
एता बाद शूणअ मंऐं बिधाता बोलअ ज़ोरै इहअ, “तिन्नां मणछा शाद ओर्ही ज़ुंण मंऐं एरुशलेम नगरी लै सज़ा दैंदै आसा छ़ांटै दै! बनाश करने शस्त्र आणै बोल़णअ आप्पू संघै!” तेखअ शुझुअ मुखा नढैऊऐ इहअ कि छ़ह मणछ आऐ बिधाते भबने ताटी उतरा बाखा प्रऊल़ी बाती, तिन्नें सोभिए हाथै तै मारना लै शस्त्र। तिन्नां संघै त एक सातुअ मणछ होर, तेऊ तै बाछे झिकल़ै बान्हैं दै अर तेऊ का थिअ कुछी बाखा लिखणा लै कलम अर सैही-दुआत। सह काईथ डेऊअ भबना भितरी संघा खल़्हुअ कांस्से बेदी सेटा।
तेखअ निखल़अ भबना भितरी इज़राईले परमेशर बिधातो झ़ामण फैंखा आल़ै ज़ीबा का भबने प्रऊल़ीए डेहल़ा बाखा लै। बिधाता बोलअ बाछे शेतै झिकल़ै तै बान्हैं दै तेऊ काईथा लै ज़हा का लिखणा लै सैही-दुआत आसा तै, “तूह हांढ एरुशलेम सारी नगरी, संघा ला तिन्नां सोभी मणछे माथै नछ़ैण ज़ुंण नगरी दी हंदै च़िल़्हखरै कामां पिछ़ू दुखी हआ तै अर शोग मनाऊंआं तै।”1
हुंह त शूणअ लागअ द, तेतरी बोलअ परमेशरै तिन्नां मारनै आल़ै छ़हा मणछा लै, “तम्हैं डेओआ नगरी दी एऊ पिछ़ू-पिछ़ू संघा पाऐ कदुष्ट मणछा मारी। तिन्नां मांझ़ै निं एक बी ज़िऊंदै छ़ाडी, नां कहा लै झींण करी। तिंयां च़ाऐ खारकै होए, च़ाऐ प्रोढै, शोहरी होए च़ाऐ बेटल़ी, तिन्नां पाऐ सोभी मारी। पर तिन्नां निं पेऊश बी दैई लागणै ज़सरै माथै काईथै सैही करै नछ़ैण आसा लाअ द। मारने शुरूआत करा तम्हैं इधी मेरै भबना पोर्ही।” तिंयां लागै तिधी पोर्ही मारदै। सोभी का आजी मारै तिन्नैं नगरीए सैणैं ज़ुंण तिधी बिधाते भबना आजू आसा तै।
परमेशरै बोलअ तिन्नां लै, “भबना करा फेरा-फेर ल्हासा करै भरी! मेरै भबना करा मुल्दै करै छ़ोतलै! डेओआ, एऊ कामां करा एभी!” तिंयां निखल़ै बागै अर संघा लागै नगरी दी हर ज़ैगा लोगा मारदै।
तिंयां तै मारदै लागै दै अर हुंह त तिधी कल्ही। मंऐं टेक्कअ तिधी धरनीं उटै पल़ी माथअ संघा बोलअ मंऐं ज़ोरै-ज़ोरै इहअ, “परमेशर बिधाता! ताह कै एरुशलेम नगरी लै खास्सी रोश्शै आसा आई दी? तंऐं तिंयां बी पठी लाऐ मारी ज़ुंण इज़राईला दी ज़िऊंदै आसा बच़ै दै?”
परमेशरै बोलअ इहअ, “इज़राईल अर यहूदा मुल्खे लोगै किऐ घोर पाप। तिन्नैं किई सारै देशै हत्या अर एरुशलेम नगरी भर्हुई तिन्नें ज़ुल्मा करै। तिंयां बोला इहअ, ‘बिधाता निं हाम्हां भाल़अ आथी लागअ द! सह आसा म्हारै देशा छ़ाडी डेऊई गअ द!’ तैही निं मुंह तिन्नां लै धख बी झींण करनी, मुंह करनअ तिन्नां लै तिहअ ई ज़िहअ तिन्नैं होरी संघै किअ।”
तेखअ फिरअ सह बाछे झिकल़ै बान्हअ द मणछ ज़हा का सैही-दुआत आसा तै, तेखअ खोज़अ तेऊ बिधाता का, “मंऐं छ़ेक्कअ सह काम करी ज़ुंण तंऐं मुल्है हुकम किअ त।”
Source notes (1)
- Cross-reference प्रका. 7:3; 9:4; 14:1
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.