Kulvi Outer Seraji Bible
एजकेल 40
एजकेल निंयं एरुशलेम नगरी लै
हाम्हां गई ती बाबेल देशे गलामी दी डेऊई पच्चुई साल लागी। राज़धानी एरुशलेम नगरीओ बनाश हई गई ती च़ौदा साला बिति। ऐहा साला दसा च़ैत्रै किअ हुंह बिधाता पठ आपणैं काबू संघा हुअ मुंह इहअ धैन कि बिधाता निंयं हुंह दूर। बिधाता पजैल़अ हुंह धैनै-सुपनै इज़राईल देशै। संघा किअ हुंह उझै उछ़टी धारा खल़अ। हुंह लागअ दखण दिशा बाखा भाल़अ, तेथ शुझुऐ मुखा बडै-बडै खास्सै घअर अर सह ज़ाण्हिंआं एक नगरी ज़ेही।1 बिधाता निंयं हुंह तेता नेल़ अर मुखा शुझुअ तेथ एक मणछ। सह ज़ाण्हिंआं त कांस्सै ज़िहअ, तेऊए हाथै त बाछो सूत अर एक डाहूल़ी अर सह त नगरीए प्रऊल़ी आजू खल़्हुअ द।2
तेऊ मणछै बोलअ मुल्है इहअ, “मणछा, ज़ुंण ताखा शुण्हनअ अर ज़ुंण ताह भाल़णअ, तेता भाल़ै राम्बल़ै करै अर शूणैं बी बडअ धैन दैई। ज़ुंण मुंह ताखा रहैऊंणअ, तेथ दैऐ धैन किल्हैकि तूह आसा मंऐं एते ई तैणीं इधा लै आणअ द कि तूह तेता भाल़े अर तिन्नां गल्ला खोज़ै तूह पठी इज़राईले आद-लुआदा का पठी ज़ेही तंऐं भाल़ी तेही ई।”
पुर्बा बाखे प्रऊल़
मुखा शुझुअ तिधी इहअ कि तिधी आसा एक भबन अर तेथ फेर फिरदी आसा दुआल च़िणी दी। तेऊ मणछे हाथै आसा नापणा लै छ़ह हाथ लाम्मी डाहूल़ी। तेऊ नापी तेता करै सह दुआल, सह निखल़ी छ़ह हाथ बिरली अर छ़ह हाथ उछ़टी। तेखअ डेऊअ सह तैहा प्रऊल़ी सेटा लै ज़ेतो मोहरअ पुर्बा बाखा त। सह उखल़अ सुआणा बाती उझै संघा नापी डेहल़ा का सह प्रऊल़ अर सह निखल़ी डाहूल़ी करै नापी छ़ह हाथ बिरली। प्रऊल़ी दोहरी बाखा तै पहरी लै चअन-चअन च़ऊंरी आर-पार स्मोहरी। तिंयां निखल़ी बागा का डाहूल़ी करै नापी करै छ़ह हाथ च़कोर। तिन्नां च़ऊंरी ती एकी का दुजी पांज़-पांज़ हाथ दूर। प्रऊल़ीए भितरा बाखा डेहल़ बी थिई छ़ह हाथ। प्रऊल़ी आजू अर दोहरी च़ऊंरी मांझ़ै ती हांढणा लै लाम्मअ च़ऊंरअ। तेखअ नापअ तेऊ मणछै सह च़ऊंरअ, सह निखल़अ डाहूल़ी करै नापी छ़ह हाथ बिरलअ। बाघली बडी ताटीए प्रऊल़ी आजू अर च़ऊंरे दोहरी बाखा तै दूई थाम्ह दूई-दूई हाथ च़कोर। तैहा पुर्बा बाखे प्रऊल़ी दी ती दोहरी बाखा पहरी लै चअन-चअन च़ऊंरी। तिंयां ती नापी करै बराबर अर दोहरी बाखे तिंयां थाम्ह बी थिऐ बराबर।
तेखअ नापी तेऊ मणछै सह प्रऊल़। सह निखल़ी दस हाथ बिरली अर तेर्हा हाथ लाम्मी। तिन्नां च़ऊंरी आजू ती एक हाथ बिरली अर धरना का एक हाथ उछ़टी। च़ऊंरै दी दोहरी बाखा तिंयां च़ऊंरी थिई छ़ह हाथ च़कोर। तेखअ नापअ तेऊ मणछै प्रऊल़ीए दोहरी बाखा च़ऊंरी का एकी छ़ाप्परा का पार दुजै छ़ाप्परा तैणीं। तिंयां निखल़ी आर-पार पच्ची हाथ दूर। तेखअ नापअ तेऊ बाघली ताटी प्रऊल़ी ओरी-पोरी सह च़ऊंरअ निखल़अ भितरा बाखा बिह हाथ बिरलअ। खिरी नापी तेऊ मणछै बाघली प्रऊल़ीए दुआली पोर्ही का भितरी च़ऊंरे सह सारी ज़ैगा अर सह ती पठी पज़ाह हाथ। प्रऊल़ी नेल़ पहरी लै बणाईं दी तिन्नां च़ऊंरी, बाघली दुआली अर तिन्नां च़ऊंरी मांझ़े दुआली दी थिऐ तीरू पाऐ दै। थाम्हा दी थिऐ खज़ूरे बूटे खेल़्तरा पाई दी।
भबना बागै ताटी
तेखअ निंयं तेऊ मणछै हुंह भबना बागे ताटी लै, तेथ ती फेर फिरदी बाघली दुआली भितरा बाखा भित्तीए नील़ै तिह खुडी बणाईं दी। तिन्नां खुडी आजू थिई बिरली खिटी दैनी दी। सह खिटी ती बाघली ताटी फेर। अह बाघली बडी ताटी ती भितरली ताटी का निंहंटी।
बाघली ताटीए प्रऊल़ी का थिई भितरल़ी ताटीए पुंझ़ै तैणीं सह बात ती पठी शौ हाथ लाम्मी। पुर्ब दिशा अर उतर दिशा ती सह दोहरी बाखा एही ई।
उतरा बाखे प्रऊल़
तेखअ नापी तेऊ मणछै बाघली ताटी दी उतरा बाखे प्रऊल़। तेता दोहरी बाखा बी आसा तेही ई चअन-चअन च़ऊंरी। तेता सम्हनै भितरली ताटी लै डेऊंणा लै प्रऊल़ अर तेता आजूए दूई थाम्हो नाप बी थिअ पुर्बा बाखे प्रऊल़ी बराबर। भितरा लै डेऊणे सह च़ऊंरे ज़ैगा ती पच्ची हाथ बिरली अर पज़ाह हाथ लाम्मी। ऐहा प्रऊल़ी अर च़ऊंरीए तीरू, थाम्हा दी खज़ूरे बूटे खेल़्तरा अर च़ऊंरअ बी थिअ पुर्बा बाखे प्रऊल़ी ज़िहअ। प्रऊल़ी लै थिऐ बागा का सात सुआण लाऐ दै अर प्रऊल़ी भितरी थिअ सह च़ऊंरअ। पुर्बा बाखे प्रऊल़ी ई ज़ेही थिई उतरा बाखे प्रऊल़ी सम्हनै बाघली बडी ताटी का भितरली ताटी लै डेऊणा लै प्रऊल़। तैहा प्रऊल़ी का बाघली दुआलीए प्रऊल़ निखल़ी नापी करै शौ हाथ दूर।
दखणा बाखे प्रऊल़
तेखअ निंयं तेऊ मणछै हुंह दखणा बाखा। तिधी बी शुझुई मुखा एक प्रऊल़। तेऊ नापी तिधी बी तिंयां च़ऊंरी अर तेतो च़ऊंरअ अर तिंयां तै उतर अर पुर्बा बाखे च़ऊंरै अर च़ऊंरी बराबर नापे। तेथ बी थिऐ तिहै ई तीरू पाऐ दै सह च़ऊंरअ बी थिअ पच्ची हाथ बिरलअ अर पज़ाह हाथ लाम्मअ। तैहा दखणा बाखा प्रऊल़ी लै बी थिऐ सात सुआण। प्रऊल़ी भितरी त बडअ च़ऊंरअ। प्रऊल़ी दोहरी बाखा थाम्हा दी थिई खज़ूरे बूटे खेल़्तरा पाई दी। पुर्बा अर उतरा बाखे प्रऊल़ी ई ज़ेही थिई दखणा बाखे प्रऊल़ी सम्हनै बाघली बडी ताटी का भितरली ताटी लै डेऊणा लै प्रऊल़। तैहा प्रऊल़ी का बाघली दुआलीए प्रऊल़ बी निखल़ी नापी करै शौ हाथ दूर।
भितरली ताटी: दखणा बाखे प्रऊल़
तेऊ मणछै निंयं हुंह दखणा बाखा भबने भितरली ताटी लै। तेऊ मणछै नापी सह दखणा बाखे बाघली दुआलीए प्रऊल़, सह बी थिई होरी प्रऊल़ीए नापा बराबर। दखणा बाखा प्रऊल़, च़ऊंरअ, पहरीए च़ऊंरी अर भितरा बाखा दुआल ती नापी करै तेतरी ई ज़ेतरी पुर्ब अर उतर दिशा बाखा ती। तेथ बी थिऐ च़ऊंरी दी तिहै ई तीरू पाऐ दै। प्रऊल़ी भितरी थिअ सह च़ऊंरअ बी तिहअ ई पच्ची हाथ बिरलअ अर पज़ाह हाथ लाम्मअ। दखणा बाखा च़ऊंरेओ मोहरअ बी थिअ प्रऊल़ी भितरी बडी ताटी बाखा लै। तेते तिन्नां थाम्हा दी बी थिई खज़ूरे बूटे खेल़्तरा पाई दी। ऐहा प्रऊल़ी लै थिऐ आठ सुआण लाऐ दै।
भितरी ताटी: पुर्बा बाखे प्रऊल़
तेखअ निंयं हुंह तेऊ मणछै पुर्बा बाखे प्रऊल़ी बाखा ताटी लै। तेऊ नापअ तिधी सह च़ऊंरअ, सह बी थिअ तेऊ ई नापो ज़ेतरै होर आसा तै। तेतो च़ऊंरअ, पहरीए च़ऊंरी अर भितरा बाखा दुआल ती नापी करै तेतरी ई ज़ेतरी दखण अर उतर दिशा बाखा ती। तेथ बी थिऐ च़ऊंरी दी तिहै ई तीरू पाऐ दै। प्रऊल़ी भितरी थिअ सह च़ऊंरअ बी तिहअ ई पच्ची हाथ बिरलअ अर पज़ाह हाथ लाम्मअ। पुर्बा बाखा च़ऊंरेओ मोहरअ बी थिअ प्रऊल़ी भितरी बडी ताटी बाखा लै। तेते तिन्नां थाम्हा दी बी थिई खज़ूरे बूटे खेल़्तरा पाई दी। ऐहा प्रऊल़ी लै थिऐ आठ सुआण लाऐ दै।
भितरी ताटी अर उतरा बाखे प्रऊल़
तेखअ निंयं हुंह तेऊ मणछै उतरा बाखे प्रऊल़ी बाखा ताटी लै। तेऊ नापअ तिधी सह च़ऊंरअ, सह बी थिअ तेऊ ई नापो ज़ेतरै होर आसा तै। तेतो च़ऊंरअ, पहरीए च़ऊंरी अर भितरा बाखा दुआल ती नापी करै तेतरी ई ज़ेतरी दखण अर पुर्ब दिशा बाखा ती। तेथ बी थिऐ च़ऊंरी दी तिहै ई तीरू पाऐ दै। प्रऊल़ी भितरी थिअ सह च़ऊंरअ बी तिहअ ई पच्ची हाथ बिरलअ अर पज़ाह हाथ लाम्मअ। उतरा बाखा च़ऊंरेओ मोहरअ बी थिअ प्रऊल़ी भितरी बडी ताटी बाखा लै। तेते तिन्नां थाम्हा दी बी थिई खज़ूरे बूटे खेल़्तरा पाई दी। ऐहा प्रऊल़ी लै थिऐ आठ सुआण लाऐ दै।
उतरा बाखा प्रऊल़ी नेल़ खुडी
बाघली बडी ताटी थिई एक बडी खुडी, सह थिई उतरा बाखे प्रऊल़ी सेटा च़ऊंरे संघै च़िणी दी। तैहा खुडीओ दुआर थिअ च़ऊंरै बाखा का। सह खुडी ती बल़ीदाने तिन्नां पशू धोणा लै ज़ेतो आगी जैंदरी हूम करनअ। च़ऊंरै दी थिऐ च़ार पचैथर डाहै दै, तैहा खुडीए दोहरै पुंझ़ै दूई-दूई कि तेथ प्रैंदै हूम बल़ी, पाप बल़ी, दोश बल़ी करना लै पशू काटे। उतरा बाखा प्रऊल़ी भितरी बी थिऐ च़ऊंरै बागै दोहरी बाखा तिहै ई च़ार पचैथर डाहै दै। ईंयां तै पठी आठ पचैथर ज़ुंण बल़ीदाने पशू काटणा लै आसा तै। च़ार तै प्रऊल़ी भितरी च़ऊंरै दी अर च़ार तै बागै ताटी दी। ज़ुंण च़ऊंरै भितरी च़ार पचैथर आसा तै, तिंयां तै हूम बल़ीदान करने पशू लै पात्थरे बणाऐं दै। ईंयां तै डेढ हाथ च़कोर अर एक हाथ उछ़टै। पशू बल़ीदान करने शस्त्र हआ तै इना पचैथरा प्रैंदै डाहै दै। भित्ती दी थिई भितरा बाखा च़ार-च़ार आंगल़ कल़ोलै लागै दै अर तिन्नां पचैथरा दी थिअ बल़ीदान किऐ दै पशूओ मास्स डाहअ द।
तेखअ निंयं हुंह तेऊ मणछै भबने भितरा बाखे ताटी लै। तिधी थिई दूई पांडा। एक पांड उतरा बाखा प्रऊल़ी सेटा अर तेतो दुआर त दखण दिशे प्रऊल़ी बाखा। दुजी पांड ती दखण दिशे प्रऊल़ी सेटा अर तेतो दुआर थिअ उतर दिशे प्रऊल़ी बाखा। तेऊ मणछै खोज़अ मुखा, “अह पांड ज़ेतो दुआर दखण दिशा बाखा आसा, अह आसा तिन्नां प्रोहता लै ज़ुंण भबनो पहरअ करा। दुजी पांड ज़ुंण ज़ेतो दुआर उतर दिशा बाखा आसा, अह आसा तिन्नां प्रोहता लै ज़हा का बेदीए ज़िम्मैंबारी आसा सभाल़ी दी। प्रोहत आसा सदोक प्रोहते आद-लुआदा मांझ़ा का। लेबी गोत्रा का आसा सिधै ईंयां ई ज़ुंण बिधाते पबित्र ज़ैगा डेऊई सका।”
भितरे ताटी अर भबन
तेऊ मणछै नापी सह भितरे ताटी, सह निखल़ी शौ हाथ लाम्मी अर शौ हाथ बिरली। भबन त पछ़मा बाखा अर तेता आजू ती तैहा ताटी बेदी। तेखअ निंयं तेऊ मणछै हुंह भबने प्रऊल़ी सेटा। तेऊ नापै प्रऊल़ी दोहरी बाखे द्रींड तिंयां तै पांज़-पांज़ हाथ लाम्मै। सह प्रऊल़ ती च़ौदा हाथ बिरली अर तेता दोहरी बाखा भित्ती ती चअन-चअन हाथ मोट्टी च़िणी दी। भबने प्रऊल़ी लै थिऐ दस सुआण, तिंयां तै बिह हाथ लाम्मै अर बारा हाथ बिरलै। प्रऊल़ी दोहरी बाखा तै दूई थाम्ह।
Source notes (3)
- Cross-reference प्रका. 21:10
- Cross-reference प्रका. 11:1; 21:15
- Cross-reference 1 राज़. 6:1-38; 2 इति. 3:1-9
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.