Kulvi Outer Seraji Bible
एजकेल 41
तेखअ निंयं तेऊ मणछै हुंह भितरली ताटी भबनै पबित्र ज़ैगा लै। तेऊ नापी भबने प्रऊल़ी दोहरी बाखे प्रोल़्ह। तिंयां तै चअन-चअन हाथ मोट्टै। प्रऊल़ ती दस हाथ बिरली अर तेता दोहरी बाखा भीत थिई पांज़-पांज़ हाथ बिरली। तेखअ नापी भितरी पबित्र ज़ैगा सह ती च़ाल़्ही हाथ लाम्मी अर बिह हाथ बिरली।
तेखअ डेऊअ सह भितरी खास पबित्र ज़ैगा। तेऊ नापै पबित्र ज़ैगे प्रऊल़ीए प्रोल़्ह। तिंयां तै डेढ-डेढ हाथ मोट्टै अर छ़ह हाथ लाम्मै अर प्रऊल़ ती सात हाथ बिरली। तेऊ नापी भितरली पांड बी, सह ती बिह हाथ च़कोर अह ती मांझ़ली बडी पांडा पिछ़ू। तेऊ बोलअ मुखा इहअ, “अह आसा खास पबित्र ज़ैगा।”
भबने भित्ती संघै च़िणैं दै कमरै
तेखअ नापी तेऊ मणछै भबने भीत सह ती छ़ह हाथ बिरली। तैहा भित्ती दी थिई बागा बाखा फेर च़ऊंरी बणाईं दी अर तिंयां ती च़ार हाथ बिरली। इना च़ऊंरी दी ती चअन-चअन मज़ला। तिंयां ती फेर-फिरदी तिह च़ऊंरी अर मांझ़ली अर प्रैंधल़ी मज़ला दी बी थिई तिह-तिह च़ऊंरी। ईंयां च़ऊंरी ती भित्तीए नील़ै चाची पाई ज़ुआंगी च़िणीं दी तेतो ज़ोर निं भित्ती लै आथी त। भबना फेरे भीत ती थाल्लै का बिरली अर प्रैंधल़ी मज़ला ती घाटी च़िणीं दी। इहअ करै ती तिंयां च़ऊंरी बागा का भबने भित्तीए साबै च़िणीं दी थाल्लै का थिई प्रैंधल़ी मज़ल बिरली अर सोभी का प्रैंधल़ी मज़ल थिई होर बी बिरली। बागी बाती ती पुंझ़ै प्रैंधल़ी मज़ला उखल़णा लै बिरली शिहल़ी लाई दी। भबना फेर ती च़ौकी अर ईंयां च़ऊंरी थिई धरनीं च़ौकी का डाहूल़ी करै नापी छ़ह हाथ उछ़टी। तिन्नां च़ऊंरीए भीत थिई पांज़ हाथ मोट्टी च़िणी दी अर तेता आजू भबने च़ौकी थिई पांज़ हाथ बच़ी दी। भबना फेर ती ताटी। तैहा ताटी ती प्रोहता लै खुडी बणाईं दी। भबने च़ौकी का थिई तिंयां खुडी बिह हाथ दूर। तिन्नां खुडीए दुआर थिऐ भबने च़ौकी बाखा लै। पछ़मा बाखे खुडीए दुआर उतरा बाखा, उतरा बाखे खुडीए दुआर दखणा बाखा। तिन्नां खुडी आजू बी थिई पांज़ हाथ बिरली खिटी।
भबन पछ़मा बाखा
भबने पछ़मा बाखा ताटी त एक भबन। सह त सत्तर हाथ बिरलअ अर तेते भित्ती थिई पांज़ हाथ मोट्टी अर सह थिअ नबै हाथ उछ़टअ।
भबनो पठी नाप
तेखअ नापअ तेऊ मणछै सह पछ़मा बाखो भबन। सह निखल़अ पठी शौ हाथ लाम्मअ, भित्ती संघी तेते ताटी बी निखल़ी शौ हाथ बिरली। पुर्बा बाखा मोहरै बी थिई ताटी शौ हाथ बिरली। तेखअ नापअ तेऊ मणछै सह भबन पछ़मा बाखा ताटी का अर तेते दोहरी बाखा भित्ती संघी शौ हाथ लाम्मअ।
भबने होर च़िज़ा
भबने प्रऊल़, पबित्र ज़ैगा, खास पबित्र ज़ैगा दी थिई फेर काठे ज़ाल़ीदार ताक्की पाई दी। तिन्नां ताक्कीए द्रींड तै धरनीं नासा दी ज़ोल़ै दै। भबने भितरा बाखा सारी भित्ती अर दुआरा प्रैंदै ती सारी ज़ैगा काठा करै महल़ी दी। तेथ तै करूब नाओंए फैंखा आल़ै स्वर्ग दूत अर खज़ूरे बूटे खेल़्तरा पाई दी। खेल़्तर ती एही कि दूई-दूई करूबा मांझ़ै त एक खज़ूरो बूट अर तिन्नां करूबे तै दूई-दूई मुंह। एक त मणछो मुंह एकी खज़ूरे बूटा बाखा अर दुजअ त सिहो मुंह दुजै खज़ूरे बूटा बाखा। भबने भित्ती दी थिई सारै दी एही ई खेल़्तर पाई दी। धरना का उझै प्रऊल़ी प्रैंदै तैणीं थिई सारै दी एही ई करूब अर खज़ूरे बूटे खेल़्तरा पाई दी। खास पबित्र ज़ैगे दुआरे द्रींड थिऐ च़कूणै।
काठे बेदी
खास पबित्र ज़ैगा आजू शुझुअ मुखा इहअ कि सह ती एक काठे बेदी। सह ती चअन हाथ उछ़टी अर दूई हाथ बिरली। तेतो थाल्लअ अर तेते कनारी बी ती काठे। तेऊ मणछै बोलअ मुल्है इहअ, “अह आसा बिधाते मुंहां आजूओ पलग।”
दुआर
पबित्र ज़ैगा भितरी डेऊणा लै थिअ एक दुआर अर तेता भितरी खास पबित्र ज़ैगा लै डेऊणा लै थिअ एक होर दुआर। तेथ तै दूई-दूई पाल्लै लाऐ दै ज़ुंण भितरा बाखा लै खुल्हा तै। पबित्र ज़ैगे दुआरे तेही ई करूबे खेल़्तरा पाई दी ज़ेही भित्ती दी आसा ती। द्रींडे काठा दी बी थिई खेल़्तरा पाई दी। दुआरा ओर्ही-पोर्ही ती ताक्की पाई दी अर तेथ बी थिई भित्ती दी तेही ई खेल़्तरा काढी दी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.