Kulvi Outer Seraji Bible
एजकेल 48
सोभी गोत्रा लै देशे बांड
सोभी गोत्रा लै दैऐ एऊ साबै ज़ैगा बांडी:
दान गोत्रा लै दैऐ उतरा बाखा सिऊंआं दी, मांझ़ समुंदरे बाढा पोर्ही हेतलोन नगरी बाखा हमात ज़ोता बाती दमिश्क नगरीए उतरा बाखा सिऊंआं दी हसेरनान नगरी तैणीं। पुर्ब दिशा का पछ़मा तैणीं हणअ अह हेस्सअ दान गोत्रो।
आशेर गोत्रा लै दैऐ दान गोत्रे सिऊंआं उंधै पुर्बा पोर्ही पछ़मा तैणीं।
नप्ताली गोत्रा लै दैऐ आशेर गोत्रे सिऊंआं उंधै पुर्बा पोर्ही पछ़मा तैणीं।
मनिश्शे गोत्रा लै दैऐ नप्ताली गोत्रे सिऊंआं उंधै पुर्बा पोर्ही पछ़मा तैणीं।
एप्रैम गोत्रा लै दैऐ मनिश्शे गोत्रे सिऊंआं उंधै पुर्बा पोर्ही पछ़मा तैणीं।
रूबेन गोत्रा लै दैऐ एप्रैम गोत्रे सिऊंआं उंधै पुर्बा पोर्ही पछ़मा तैणीं।
यहूदा गोत्रा लै दैऐ रूबेन गोत्रे सिऊंआं उंधै पुर्बा पोर्ही पछ़मा तैणीं।
देशे ज़ैगा मांझ़ा-मांझ़ी लेबी अर प्रोहता लै ज़ैगा
यहूदे गोत्रे सिऊंआं उंधै पुर्बा पोर्ही पछ़मा तैणीं मांझ़े ज़ैगा हणीं खास ज़ैगा, तेता डाहै तम्हैं ज़ुदी। अह ज़ैगा हणीं पुर्बा पोर्ही पछ़मा तैणीं पच्ची हज़ार डाहूल़ी बिरली अर उतर दिशा का दखणा तैणीं बी हणीं एतरी ई बिरली। पबित्र भबन बी हणअ ऐहा ई ज़ैगा दी।
ज़ुंण हेस्सअ तम्हैं बिधाता लै अर्पण करी ज़ुदअ हणअ डाहअ द, सह ज़ैगा हणीं पच्ची हज़ार डाहूल़ी लाम्मी अर पच्ची हज़ार डाहूल़ी बिरली।
पबित्र डाहै दै एऊ खास हेस्सै दैऐ प्रोहत अर लेबी गोत्रे आद-लुआदा लै बांडी। तेता बांडै तिन्नां लै उतरा बाखा पुर्बा पोर्ही पछ़मा बाखा मांझ़ समुंदरा तैणीं पच्ची हज़ार डाहूल़ी लाम्मी अर पुर्ब अर पछ़म दोहरी बाखा दैऐ दस हज़ार डाहूल़ी बिरली नापी। दखणा बाखा बी दैऐ पच्ची हज़ार डाहूल़ी लाम्मी। ऐहा ज़ैगा मांझ़ा मांझ़ी हणअ बिधातो भबन। अह पबित्र ज़ैगा हणीं तिन्नां प्रोहता लै ज़ुंण सदोके आद-लुआद आसा। तिन्नैं आसा शुचै-पाक्कै रही मेरी च़ाकरी किई दी अर तिंयां निं होरी इज़राईली संघै पाप करना लै साझ़ू हुऐ ज़िहअ लेबी गोत्रे होरी प्रोहतै किअ। तैही हणअ ऐहा पबित्र ज़ैगा मांझ़ै खास अर्पण किअ द पबित्र हेस्सअ इना प्रोहतो ज़ुंण सदोक प्रोहते आद-लुआद आसा। अह ज़ैगा हणीं लेबी गोत्रे हेस्सै आई दी ज़ैगा संघै। इना प्रोहते ज़ैगा संघै लागदी ज़ैगा दी भेटणअ होरी लेबी गोत्रा बी हेस्सअ। अह ज़ैगा हणीं पच्ची हज़ार डाहूल़ी लाम्मी, दस हज़ार डाहूल़ी बिरली। इहअ करै हणीं अह सारी पबित्र ज़ैगा पच्ची हज़ार डाहूल़ी लाम्मी अर बिह हज़ार डाहूल़ी बिरली। अह खास ज़ैगा ज़ुंण बिधाता लै पबित्र हणीं, ऐहा ज़ैगा निं तिंयां बेच़ी सकदै नां तबदल़अ करी सकदै। देशा मांझ़ै ऐहा ज़ैगो मालक निं होर कोह हई सकदअ।
ऐहा ज़ैगा का लाऊआ ज़ुंण पांज़ हज़ार डाहूल़ी बिरली अर पच्ची हज़ार लाम्मी ज़ैगा बच़णीं, सह निं पबित्र आथी, सह हणीं आम लोगा बस्सणा लै अर डागै-चैणैं च़राऊंणा लै। नगरी हणीं खास पबित्र ज़ैगा मांझ़ा-मांझ़ी, अर नगरी हणीं पुर्ब-पछ़म, उतर-दखण च़ार हज़ार डाहूल़ी च़कोर। नगरी फेर फिरदी हणीं पुर्ब-पछ़म, उतर-दखण च़ऊ बाखा घैहणीं। तिंयां हणीं ढाई शौ डाहूल़ी बिरली। पबित्र ज़ैगा का लाऊआ ज़ुंण ज़ैगा बच़णीं, हेस्सअ हणअ पुर्बा बाखा दस हज़ार डाहूल़ी, पछ़मा बाखा बी दस हज़ार डाहूल़ी। अह ज़ैगा हणीं पबित्र ज़ैगे सिऊंआं संघै ई। तैहा ज़ैगे का ज़ुंण साल-फसल हणीं, सह हणीं तिन्नां लै ज़ुंण नगरी दी च़ाकरी करा। इज़राईले बारा गोत्रा मांझ़ै ज़ुंण बी नगरी दी च़ाकरी करे, सह सका तैहा ज़ैगा बाही-बऊई।
इहअ करै ज़ुंण हेस्सअ तम्हां खास पबित्र ज़ैगा लै अर्पण करनअ, सह हणअ पठी पच्ची हज़ार डाहूल़ी लाम्मअ अर पच्ची हज़ार डाहूल़ी बिरलअ। नगरीए खास ज़ैगा बी हणीं एऊ ई हेस्सै दी।
पुर्ब अर पछ़मा बाख ज़ुंण भबन, प्रोहत, लेबी अर नगरीए ज़ैगा का लाऊआ ज़ुंण ज़ैगा बच़णीं, सह हणीं दोहरी बाखा इज़राईला प्रैंदै राज़ करनै आल़ै राज़ै लै। पबित्र ज़ैगे सिऊंआं पोर्ही हणीं राज़ै लै सह ज़ैगा पुर्बा बाखा देशे सिऊंआं तैणीं अर पछ़मा बाखा मांझ़ समुंदरा तैणीं। उतर दिशा बाखा हणीं सह यहूदा गोत्रे बांडै आई दी सिऊंआं तैणीं अर दखणा बाखा हणीं सह ज़ैगा बिन्यामीन गोत्रे हेस्सै आई दी ज़ैगे सिऊंआं तैणीं।
होरी गोत्रा लै ज़ैगा मांझ़ै हेस्सअ
होरी गोत्रा लै दैऐ एऊ साबै ज़ैगा बांडी: पुर्बा पोर्ही पछ़मा तैणीं एक हेस्सअ बिन्यामीन गोत्रा लै। बिन्यामीन गोत्रे सिऊंआं संघै दैऐ पुर्बा पोर्ही पछ़मा तैणीं शमौन गोत्रा आल़ै लै बांड। शमौन गोत्रे सिऊंआं संघै दैऐ पुर्बा पोर्ही पछ़मा तैणीं इस्साकार गोत्रा आल़ै लै बांड। इस्साकार गोत्रे सिऊंआं संघै दैऐ पुर्बा पोर्ही पछ़मा तैणीं ज़बलून गोत्रा आल़ै लै बांड। ज़बलून गोत्रे सिऊंआं संघै दैऐ पुर्बा पोर्ही पछ़मा तैणीं गाद गोत्रा आल़ै लै बांड।
गाद गोत्रे हेस्सै आई दी ज़ैगे दखणा बाखे सिअं हणीं इज़राईल देशे दखणा बाखे सिअं बी। अह सिअं हणीं तामार नगरी पोर्ही दखणा बाखा कादेश मरीबा पाणींए कुहै तैणीं। तिधा आजू डेऊणीं सह मिसर देशे सिऊंआं दी गाडा बाती मांझ़ समुंदरा तैणीं।
इज़राईल देशे ज़ैगा ज़ुंण तम्हां इज़राईले बारा गोत्रा लै बांडणी, सह आसा अह एतरी। अह गल्ल डाही मालक बिधाता बोली।
नगरीए प्रऊल़ी
एरुशलेम नगरीए हणीं बारा प्रऊल़ी। तिंयां हणीं नगरीए दुआली दी च़ऊ दिशा बाखा चअन-चअन। इना प्रऊल़ीए नाअं डाहणैं इज़राईले बारा गोत्रे नाओंऐं। उतरा बाखे प्रऊल़ी हणीं रूबेन, यहूदा अर लेबी गोत्रे नाओंऐं। पुर्बा बाखे चअन प्रऊल़ी हणीं युसुफ, बिन्यामीन अर दान गोत्रे नाओंऐं। दखणा बाखे चअन प्रऊल़ी हणीं शमौन, इस्साकार अर ज़बलून गोत्रे नाओंऐं अर पछ़मा बाखे प्रऊल़ी हणीं गाद, आशेर अर नप्ताली गोत्रे नाओंऐं। नगरी फेर फिरदै गहल़े दुआल हणीं च़ऊ बाखा साढै च़ार-च़ार हज़ार डाहूल़ी लाम्मी अर पठी हणीं नगरीए दुआल फेर-फिरदी ठारा हज़ार डाहूल़ी लाम्मी। तैहा धैल़ी पोर्ही पल़णअ नगरी नाअं, “बिधाता शामा2।”
Source notes (2)
- Cross-reference प्रका. 21:12,13
- Footnote बिधाता शामा बिधाता आसा इधी
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.