एजकेल 24

उबल़दअ हांडअ

1यहूदा मुल्खे राज़ै जेहोकीना गई ती बाबेल देशे गलामी दी डेऊई नहुई साल लागी, तैहा साला दसा पोशै खोज़अ बिधाता मुखा समाद। बिधाता बोलअ इहअ, 2“मणछा, आझ़की धैल़ी तिथी डाह तूह लिखी। किल्हैकि आझ़ गोटी बाबेल देशे राज़ै एरुशलेम नगरी।1 3तूह खोज़ मेरी द्रोही परज़ा का इहअ कि हुंह तिन्‍नों परमेशर बिधाता बोला तिन्‍नां लै इहअ,

‘गेठै प्रैंदै डाहा हांडअ

संघा करा तेऊ पाणीं करै भरी।

4तेऊ करा फल़ाठ, गुल़छ़ू अर

बधिया-बधिया शिखा करै भरी।

5शिखा लै काटै हेल़्ही का छ़ांटी करै सोभी का बधिया चैणअ।

हांडै हेठै पाआ खास्सी झ़ुका कि हांडै भितरी पाणीं खास्सअ उबल़े

शिखा लोल़ी हाडकै संघी बधिया सिटी।’”

6मालक बिधाता बोला इहअ, “हत्या करनै आल़ै मणछा करै भर्हुई दी ऐहा नगरी लै पल़णीं घोर आफ़त! अह आसा इहै हांडै ज़ेही हुई दी ज़हा कुंण मांज़दअ ई निं आथी। तैही रहा हांडै का शिखे टांका काढदै लागी, खिरी निं लोल़ी तेथ शिखे एक टांक बी बच़ी। 7ऐहा नगरीए मणछै ज़ुंणी लोगे हत्या किई, तिन्‍नों लोधल़अ आसा आझ़ बी शुझदअ लागअ द, तेथ प्रैंदै माट्टअ पाई निं सह तिन्‍नैं दाबी बी डाहअ! सह डाहअ तिन्‍नैं नांगी टोल्हा प्रैंदै तरैल़ी।2 8तैही डाहअ मंऐं तिन्‍नां हत्या करनै आल़ैओ लोधल़अ बी नांगी टोल्हा दी तरैल़ी ज़िधी सह सोभी का शुझिए। अह किअ मंऐं एते तैणीं कि एता भाल़ी रहणअ मेरअ रोश्श बढदअ लागी। मुंह लणी एरुशलेम नगरीए लोगा लै सज़ा दैई ज़ुंण तिन्‍नां भेटी लोल़ी।”

9परमेशर बिधाता बोलअ इहअ, “ऐहा हत्या करनै आल़ेए नगरी लै पल़णीं घोर आफ़त! तेऊ हांडै हेठै झ़ुको जूंग लाणअ मुंह आप्पै। 10खास्सी झ़ुका छ़ाडी ज़ाल़ा आगीओ जगराहल़! शिखा सटेऊआ राम्बल़ी! हांडअ लोल़ी इहअ उबल़अ कि हाडकै लोल़ी पठ गल़ै! 11तेखअ डाहा तेऊ रित्तै हांडै आगी प्रैंदै सह लोल़ी जाम्ही करै लाल हुअ। ज़ांऊं तेते चेरखै बी पठ दझ़णैं तेखअ निखल़णीं तेते छ़ोत पोर्ही। 12हुंह थक्‍कअ एता मांज़ी-मांज़ी। पर चेरखै निस्सै एता का निखल़ी ई। तैही पाणअ अह हांडअ इना चेरखै संघी आगी दी! 13एरुशलेम नगरीऐ! ज़ुंण ताह दी चेरखै आसा, तिंयां आसा ताह दी तेरी कंज़रैई ज़िहै च़िल़्हखरै कामां करै लागै दै। हुंह च़ाहा त ताह धोई-शोई तेरी शुधी करनी, पर तंऐं निं मुंह इहअ करनै दैनअ। तैही रहणीं तूह तेभै तैणीं छ़ोतली ज़ेभै तैणीं ताह प्रैंदै मेरअ सारअ रोश्श निं पल़े। 14अह गल्‍ल डाही मंऐं बिधाता बोली कि मुंह किज़ै करनअ। ऐबै लणअ मुंह इहअ करी! ताल्है सज़ा दैणैंओ बगत गअ पुजी! ऐबै निं हुंह एता का पिछ़ू हटदअ। नां ताल्है एते झींण करदअ नां मुंह एते माल़ी च़ेतणी। ज़ुंण तंऐं किअ, मुंह करनअ तेते साबै तेरअ नसाफ।” ईंयां गल्‍ला बोली परमेशर बिधाता।

एजकेल गूरे लाल़ी मूंईं

15बिधाता बोलअ मुखा इहअ, 16“मणछा, मंऐं लाअ ताखा हेरा-हेरी तेरअ एक मणछ दूर करी ज़हा लै तूह बेघै खास्सअ झ़ूरा। तूह निं तेता लै लेरा लाई, नां आछी आशू छ़ाडी अर नां तेता लै शोग मनाऊंईं। 17तेरी निं धख ज़ेही धअक बी लोल़ी शुण्हुंई! तूह निं इहअ लोल़ी शुझुअ कि ताह आसा कहा मरनै पिछ़ू शोग पल़अ द। मुंडा का निं साफअ पोर्ही खोल्ही अर खूरै डाहै पोलल़ै बान्हीं। आपणअ नाक मुंह बी निं डाही ढोपी कि तूह आसा मरना लै दुखी हुअ द। रोटी पाणीं बी खाऐ तूह ज़ेही धैल़ खाआ तेही ई, तेतो फरेज़ बी निं डाही।”

18हुंह त दोत्ती लोगा संघै गल्‍ला करदअ लागअ द अर तैहा ई धैल़ी उडै गई मेरी बेटल़ी मरी। दुजै धैल़ै दोत्ती किअ मंऐं तिहअ ई ज़िहअ बिधाता बोली त डाहअ द। 19लोग लागै मुंह पुछ़दै, “तेरी बेटल़ी गई ज़ांऐं! पर ताह निं शोग ई आथी पल़अ द! तूह किल्है आसा इहअ करदअ लागअ द?”

20मंऐं खोज़अ तिन्‍नां का, “बिधाता किई मुंह संघै गल्‍ला, तेऊ बोलअ मुल्है 21आपणअ समाद तम्हां इज़राईली का खोज़णा लै। परमेशर बिधाता बोलअ इहअ, ‘शूणां, तम्हां आसा मेरै भबनो बडअ घमंड, तम्हैं झ़ूरा एता लै किल्हैकि अह आसा भाल़णा बेघै बधिया! पर ऐबै दैणअ मुंह ऐहा ज़ैगा छ़ोत लागणै। एरुशलेम नगरी ज़ुंण थारै शोहरू-शोहरी बच़ै दै हणैं, तिंयां मारनै दुशमणे सैना तलबारा करै काटी।’

22“तेखअ करनअ तम्हां बी तिहअ ई ज़िहअ मंऐं किअ। तेखअ निं तम्हां बी आपणैं नाक-मुंह बुदरी डाहणैं। नां रोटी दी फरेज़ डाहणअ, तम्हां बी खाणीं तेही ई रोटी ज़ेही धैल़ खाआ। 23तम्हां बी निं नांगअ मूंड करनअ, नां खूरा का पोलल़ै पोर्ही खोल्हणैं अर नां शोग करनअ। तम्हैं फिरनैं दाह ज़िरी-ज़िरी बाख दुबल़ै। सह हणीं तम्हां लै थारै पापे सज़ा अर तम्हैं लागणै हिक्‍की-सल़िक्‍की लेरदै। 24इहअ करै आसा हुंह एजकेल तम्हां लै चतैनगीओ नछ़ैण। तम्हां बी करनअ तिहअ ई ज़िहअ मंऐं किअ। बिधाता बोलअ इहअ कि ज़ेभै ईंयां गल्‍ला होए, तेभै लागणअ तम्हां का थोघ कि हुंह आसा थारअ परमेशर बिधाता।”

25बिधाता बोलअ इहअ, “मणछा, मुंह करनी मेरै भबने ज़ैगा लोगा का दूर ज़ुंण तिन्‍नें फाज़त करा। सह भबन ज़ेता लै तिंयां घमंड करा, ज़ेता लै तिंयां खास्सै झ़ूरा अर एथ एछदै डेऊंदै रहा लागी। तिन्‍नें शोहरू-शोहरी बी करनै मुंह तिन्‍नां का दूर। 26ज़ेभै मुंह इहअ करनअ, तेभै एछणअ कोई मणछ ठुर्ही एरुशलेम नगरी घणैं जुधा मांझ़ा का बच़ी ताह सेटा लै। तेऊ खोज़णीं ताखा एते बारै खबर। 27तैहा धैल़ी हणअ तूह काल्‍लै का बेज़अ। ताह करनी तेभै तेऊ मणछा संघै गल्‍ला। तेखअ निं ताह च़ुप्पी रहणअ। इहअ करै हणअ तूह इना इज़राईले आद-लुआदा लै नछ़ैण। तेखअ लागणअ तिन्‍नां का थोघ कि हुंह आसा बिधाता।”