Kulvi Outer Seraji Bible
एजकेल 35
एदोम देशा लै परमेशरे सज़ा
बिधाता बोलअ मुल्है भिई इहअ, “मणछा, सेईर धारा बाखा भाल़, संघा खोज़ मेरअ समाद। तूह लअ एदोम देशे लोगा लै खोज़ी कि हुंह परमेशर बिधाता बोला तिन्नां लै इहअ,
‘एदोम देशे लोगो, हुंह हुअ ऐबै थारअ दुशमण!
एदोम करनअ मुंह ऐबै पठी उज़र अर शुन्नअ।
तेते नगरी करनी मुंह पठी बरैबाद अर शुन्नीं।
तेखअ लागणअ तम्हां का थोघ कि हुंह आसा बिधाता।’
“तम्हैं डाही कबल्ली इज़राईला संघै ज़ीद, ज़धू इज़राईली तिन्नें दुशमणै काटै-मारै, तधू निं तम्हैं तिन्नें धख बी मज़त किई। ज़धू मंऐं तिन्नां लै तिन्नें पापे सज़ा दैनी, तधू ती तिन्नां खास्सी आफ़त पल़ी दी। तैही बोला ऐबै हुंह मालक बिधाता आपणैं सोह खाई कि मुंह दैणअ तम्हां थारै दुशमणा काटणै-मारनै। ज़ै तम्हैं तिन्नां का बच़ी ठुर्हे बी, तिन्नां पल़णअ तम्हां पिछ़ू संघा पाणै तम्हैं मारी। तम्हैं तै मेरी परज़ा मारना लै खुश हुऐ दै पर ऐबै पाणै दुशमणा तम्हैं बी मारी। एदोम धारा बाखो मुल्ख करनअ मुंह पठ उज़र अर शुन्नअ। तेस्सी बाती एछदै-डेऊंदै बी करनै मुंह खतम। धारा करनी मुंह ल्हासा करै भरी, ज़ुंण जुधा दी मरनै, तिन्नें ल्हासा रहणीं नाल़ै-धारा पल़ी। एदोम देशे नगरी निं आजू कोह बस्सणअ, सह करनअ मुंह सदा लै उज़र। तेखअ लागणअ तम्हां का थोघ कि हुंह आसा बिधाता।
“तम्हैं बोला इहअ, ‘यहूदा अर इज़राईल देशा दी करनअ हाम्हां कबज़अ! इना दुही देशे मालक हणैं हाम्हैं।’ इज़राईलो मालक हुंह बिधाता आसा तिन्नां संघै, तज़ी बी बोला तम्हैं इहअ! तैही बोलअ मंऐं परमेशर बिधाता आपणैं सोह खाई कि मुंह लणअ थारअ नसाफ करी अर मुंह दैणीं तम्हां लै सज़ा। किल्हैकि तम्हैं डाही मेरी परज़ा इज़राईली संघै ज़ीद, तम्हैं करा तिन्नां लै नफरत अर तम्हां हआ तिन्नें रोश्श लागै दै। तेखअ लागणअ इज़राईली का थोघ कि मंऐं दैनी तम्हां लै तेते सज़ा ज़ुंण तम्हैं मेरी परज़ा संघै किअ। तेखअ लागणअ तम्हां एदोमी का थोघ कि मंऐं बिधाता हेरै तम्हैं एही गल्ला करदै शूणीं, ‘इज़राईलो धारा बाखलै देशे ज़ैगा हुई पठ उज़र अर शुन्नीं, ऐबै गिम्मणी सह ज़ैगा हाम्हां आप्पू लै।’ मेरै बारै किई तम्हैं बडी शरेरी गल्ला तिंयां बी हेरी मंऐं शूणीं। तम्हैं समझ़ा आप्पू मुखा ई बडै!”
परमेशर बिधाता बोला इहअ, “मुंह करनअ एदोम देश पठ उज़र अर शुन्नअ। तिन्नों बनाश भाल़ी हणैं संसारे सोभ लोग खुश, ज़िहै तिंयां इज़राईलीए बूरी दशा भाल़ी खुश हुऐ तै। एदोम देशा लै दैणीं मुंह सज़ा ज़ुंण तेऊ भेटी लोल़ी। एदोम देशे ज़ैगा हणीं पठ उज़र अर शुन्नीं। तेखअ लागणअ सोभी इज़राईली का थोघ कि हुंह आसा बिधाता।”
Source notes (1)
- Cross-reference ईशा. 34:5-17; 63:1-6; जेर. 49:7-22; एज. 25:12-14; आम. 1:11,12; ओब. 1:1-14; मिक. 1:2-5
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.