Issayaasikaa Raaga

Issayaasikaa Raaga

E'yichchoo

Wabeeki Issayaasi Kiristoosi ilemebaa edi darre saddeeta dhibba woggake muuxama'n Iyyerusaalemi hedhammake ege'nemeeke lumoke wabeeki summinni ye'emeekeni; kunni Maxaafi sase umo umo kaddeexxe kutuwwaa'n qoodemaan.

1. Hafuura adhdha 1-39 qico'n hexxeexxi kuta bita'ika boga galchammaki moyaanji, Yihuda, Asoori hiyyemaak hunna affeexxe ola'iinxe mootumma'ni loli ke'ee'naa gelteexxe miidhenshaxxe yaane haaso'aani. Issayaasi Yihuda'ni miidhensha geessise'eki Asoorike hunnameessa manna kadebaangi ardiinxi cubbonna Magenokee ajajema gopha, iittanni, Mageno amana'ni anfeexxe xe'ya'ni kaddeexxa uude. Ca'a hiyyeeke orinninna hujenni wabeekichchinna akeekisanjuwwi qullumatanna dhugaa calli wo'miteexxa hedho he'no'a iyyedageexxe kaddeexxa xexxe'achchiseeni. Lebeexxi Issayaasi dagaake baro'nina butta duuchcha'ninna nage'a wo'mishakenna dhugati galchaaki Daawwitixxe sanneki moyanji daggaaxxe yanna hexxeexxa ediseen haaso'een.

2. Hafuura adhdha 40-55 qico'n hexxeexxi kuta Yihudiinki ardi Baabiloonii'a booji'emee rakkote'ni ibeexxi godoba kulte hophpholemmaxxee yannaxxa haasottaaxxen. Wabeekichchi, Mageni ifika arda garbummatenaa'n fulcheexxanna jiro insa'neexxiki galdumi ke'aashsha Iyyerusaalemi'a hingaaxxi yanna shiqeexxa kuleeni; tenne hafuura adhdha giddo umoke kaddeexxi Mageni jirtetike anna kadeexxannaa isi arda ifikee afeek yaadi, Isra'eeli ga'mii'n ardi duuchchi'a erga geessisiyyo hasisaxxe kaddeexxa kuldaaxxe kutan. «Duuchchi Woddike Goottike erganjixxa» (49:1—53:12) kuldaaxxi kuluwwa dullaate kakonaa'n saxxeexxe lummollamma erguwwanni laakko'endaaxxen.

3. Hafuura adhdha 56-66 qico'n hexxeexxi kuta umoke assite kulda'neexxi kula ardi Iyyerusaalemi'a hige me'exxanna Mageni Isra'eeli'a uwwemmaka addachchiisatika hiyyichcho duuchcha muuxa'neeke kadoole kokeessaaxxa yanne harisa'neke ardixxeteni; gargaritti hexxeexxa xonxomachcho assinaashsha hasendeeki qullumma, dhugaa mura, Edi Sanbaata ulfeessanna tolcha shiqisha, iittanni sodaachchote'ni jabaataten. Tenne kuta'n ege'nemeeki hiyyichchi hafuura adhdha 61: 1-2 hexxeexxe kaddaa wodda, Yessuusi ergatensha isixxixxe ye'ensha'a sirende'n shiqinsheexxi kuluwwa afeendaan.

Konne Maxaafi Giddo Hexxeexxa Yaanuwwa

E'yichchoo

Yihudakeenna Isra'eeli'a ergendeexxa ergguwwa

Yihudakeennaa Isra'eeli'a higgeenna ergendeexxa erguwwa

Mageniinxi mufe wele arda'n

Rakkote'n hedheeke ardi'a Mageniinxa addachchiisatixxa erga

Mageni jallichcha arda'n mufe isixxa dirrisaake kadeexxa

Mageni Eedoomi'n mufe isixxa dirrise, Iyyerusaalemi kinni eebbisaake kaddeexxa

Asoori, Baabilooni, moyaanjo Hiziqiyaasinna Isayyaasi

Mageni arda anjiraake kadeexxa

Mageniinka erganjo

Mageni uwweexxa addachchiisatika hiyyichcho heqedhaake kadeexxa

Ardi duuchchi Mageniinxe gamo kada dande'aaxxa

Addatendabaaxxe akekanoole'n Mageni mufe dirrisaaxxa

Iyyerusaalemi edi'a affeeka ulfinna

Mageniinxa manbe'iinxa haarooxxa dada