Gedeo Bible
Issayaasikaa Raaga 46
Baabiloonixxa Magenoonfachchotixxa Fakkuwwa
Beeli salphate Neebo yo'osha enqeme
magenoonfantammaxxi insa'neexxi fakkuwwa horeke'ni fe'ende'een;
Insa'nee adhdhe mammarendaaxxi fakkuwwa heddoten
gopheeke horuwwi'a ha'uraake fe'isan.
Tinni fakkuwwa salphatte;
ifinaa'n dandeette hoyyedha gophpheemmaxxee'e booji'ende adhdhende.
«Amatike godobi giddo, ilendineechchi udumi'aanna ha'noo heqqennexxe Ya'iqoobixxe horte gattineke Isira'eelike arda! Hiyyaannexxa laqqe.
Cindine'e arree fulchitinaa qico'n,
ha'noo heqqannoki anten;
ha'no dadennen; ha'noo ba'edhannon; gargaarannon anjirannon.
«Ayyinni anee qixxe assitinaa'ne? Ayyinnita herregina'ne?
ayyinnita fakkeessitina?
Manni subba ifika tilqe worqe kii'lan;
birretika sibiljonna kiiloti minkaan;
Magenoonfataaxxa fakkuwwa insa'ne'a tumme giissinaashsha tumaaka uunaan;
giissemechchin uduma heeshshi qokki hina'n magenoonfantaan.
Aa'ne dugumote'n dulkinaan;
mitte bakka'n uurrinsoole ookkonni uurraan;
Fedhee boonchi'n le'ma dande'abaan.
Manji isiba'a soodatoole soodachcho laqabaan;
yookaani ayyeenna ba'netenaa'n woda dande'abaan.
«Ha'no cubbaalleeyye! Tennee qaabbatte;
godobake'ninna galchedhdhe.
Ani calli Magenoke kadennexxanna anee malee weli Mageni hedhebaaxxa ege'ne;
edike baro'n kaddeexxa edixxa yaane kassi hiyye;
ani Magenoken; anee fakkataaki weli hedhebaan.
Uduma kaddaaxxa yaane ediseen,
Edi'a mayi kadaaxxa edonni haaso'eneenn;
aninna: yaadi anki mishikki hiyyakebaan;
anee gammachchiissaxxa duuchchanna assannon.
Borotenaa'ni joletishsha bute adhdhaaka manjichcho ye'annon;
isinna yaada anka muuxaake, bayyike boginaa'n dagaake manjon;
Ani haaso'ennexxa assannon;
hedennexxanna muuxannon.
Ha'no dhugaatenaa'n bayyatine'eki
godoba jabaatinaaki ardi hiyyaannexxa laqqe.
Ani qullumma anxa ha'no'a shiqisheennen,
isenna bayya hexxebaan;
Anjira anxi xu'unna turtabaan.
Iyyerussaalemi anjrannon;
Isira'eelinna ulfaataashsha assannon.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.