Gedeo Bible
Issayaasikaa Raaga 35
Woyyichcha Boga
Iikki qiilla gammoojjenna bago bogi gammadaan
qiilla gommoojjenna gammade pha'a hiyya;
Hadatishshanna dararaan.
Gammoojjetinna faaroti gammadaan;
Libaanoosiki ulfiinninna isi'a uwwemaan;
Qermeeloosikannaa Saaroonika ulfinna oddowwaan;
Duuchchi Woddika Gootta no'okika lumoka gaachchanna
Mageniinka ulfinnanna undaan.
Gophpheexxa hirre ha'nooxxa jabeessedhdhe,
shaqqeeka mikituwwa jabeesse.1
Sodaattaaxxa qalbe afeekara
«Worbe mee sodaatte;
Mageni ha'noong dagaan;
halo fulo'a dagaan;
Isinna halo fula abixxeexxi
Ha'noo anjiro'a dagaan.»
Eettene yanna balla'uwwinxi ille banendaan;
mansha duuddemmakixxi banendaan;
Naafi gedummatishsha utalaan;
afo'o duudeeki baneme'naa gammashshoti faarsaan;
Qiilla gommoojjenaa'n muumme fuldaan;
muummuwwatinna qiilla gammoojjenaa'n burqitaan.2
Holatak maanchik bog balleessa kaddaan
baqaqeek buttinni wode'a burqisaan;
Jedaluwwi diiphammaxxe baluwwa'n
bada'a shonboqikinna qoocce lattaan.
Ookkonna lumok ora kadaan;
«Woyyichcha hodhdhichcha» hiyyemee ye'emaan;
batto'eekkirinna iso'n me'abaan;
Iikki ori isi hana me'aake mannike calla kadaan;
ba'lak manninna ookkone oranaa'n milqiba'a.
Neenquwwikinna ookko hedhabaani;
bultaaki biniichchi iso'n galabaan
kunniir eettenne bakka'n afemabaan;
anjireemek calli ookko hana me'aan.
Duuchchi Woddiki Gootti wodeekir ille iima higaan;
Faarsina'inna Tsiyooni'a e'yinaan;
duuchchi woddixxa gammashshonna kallachchiinsha umoke'ni uggudhdhinaan;
fenxe hiyyanna gammashsho alfinaan;
yaaddotinna ruphphi hiyya ookko'n bayyattaan.
Source notes (2)
- Cross-reference Ibr. 12:12.
- Cross-reference Mat. 11:5; Luq. 7:22.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.