Skip to content
BibleKenya

Gedeo Bible

Issayaasikaa Raaga 56

Ajajemaak Duuchchi Alfaaxxa Anjirensha

Duuchchi Woddiki Gootti hiyya'nee qici:

«Dhugaa asse;

eloxxa asse;

Anjira anxi shiqo hexxeen;

qullumma anxinna rakke leellitaan.

Edi Sanbata battosebaangi ulfeessaak

fuggoxxa assatenaa'n anga ifixxa bukki assaak, hoyyedhaak,

Tenneera assaak manji isi eebbisemeeken.»

Duuchchi Woddike Goottibaa higeek alagi

«Duuchchi Woddiki Gootti anee ifike ardanaa'n foyaan» hiyyoqqe'e middisikinna

«Ani bagoke haqichchonni» hiyyoqqe'e.

Duuchchi Woddiki Gootti hiyya'nee qici

«Anka Edi Sanbata ulfeessaak middisuwwi

ane'e gammachchisaxxaara fi'laak

kako anxanna heqqedhaak,

Anke mine'ninna anke dalla'n

labbaxxenna meyyaxxe oose caala

qalli hiyyemmaak summa insa'ne'a uwwannon;

Duuchchi woddi'anna

ba'abaaka summa insa'ne'a uwwannon.

Isi'a ergatematee

Duuchchi Woddike Goottinni welti ifi guduunfeek alaguwwi

Duuchchi Woddike Goottika summa eeyyati

isonna magenooffatati

Edi Sanbatuwwa battoossinebaak ulfeessaakara duuchcha

kako anxanna heqqedhaakaara,

Insa'ne anke woyyichchi koobaba'a iyyedganno;

anke soodachchotike mini giddonna insa'nee gammachchisanno;

Ciincatika insa'neeka tolchanna wele tolchuwwa

anke tolchimalcho'n tolchinoole insa'nee'n adhdhanno;

Mini ank gosa gosake arduwwi duuchchi'a

soodachchotike mine hiyyeme ye'emaan.»1

Xexxeerememmaka Isira'eelika arda bukki assammaki

dada duuchchik Duuchchi Woddiki Gootti hiyya'nee qici,

«Bukki hiyyemmakeraani lebeexxi

wele manna higeen bukki assanno» hiyye.

Mageni Isira'eelike Akeekisanjuwwa Aallaateexxa

Ha'no buttatik biniinchuwwi duuchchi amme;

ha'no badda'atik biniinchuwwi duuchchi daggineexxi ninniffe.

Isira'eelike akeekisanjuwwi balla'akeeran;

ege'na anfebaan;

Duuchchiing hafuura afebaake wonshuwwan

duta dande'abaan;

ciinseexxi oojjontaan;

diiphicallikeeranna.

Insa'ne haranga lumo qico godobisanjo wonshan;

godobisanjo egenebaan

Qalbeefatabaaxxe allalisanon;

duuchchiing ifi fika ora me'ine;

mitti mittingi ifi fixxa la'o harsine.

Insa'nenna weli'aan weli, «Amme woyinetixxa booka ha'wino;

machchonnanno qico'ni ha'wino;

Sooddonna iittanni techchishsha

akimagaada no'a woyyotaaxxe barra kaddaan» hinaan.

Source notes (1)
  1. Cross-reference Mat. 21:13; Mar. 11:17; Luq. 19:46.

Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.