Gedeo Bible
Issayaasikaa Raaga 57
Isira'eeli'i
Qulliyye rertaan;
tenne kinni ayyinna qalbeefataata;
Qulliyye fuggoxxenaa'n gatatee
adhdhemiyyo insa'nexxa
Ayyinna qalbeefatabaan.
Cimobelo me'aakir
insa'ne'a nage'ake kadaan;
Insa'nenna ifixxe taqe'n hafuura adhdhinaan.
«Ha'no eettene gojaamettexxi oose
ha'no ookkone yababulikinna yabaabulto manjichchoxxi horte ha'no kaba'a amme.
Ha'no gacifatina'een ayye'nite?
Ha'no afo'o fulchexxina'neek ayye'nite?
Arrabo fulchitineexxi gacifatina'neek ayye'nite?
Ha'no xaqartiyyetixxi oose
ha'no dhariyyetixxe hortebaata?
Qilxuwwiinke haqichchuwwi giddo
ookkone shafi barqaaqeke haqichchi hunda yabaabulleti gubatinaak
Dhooquwwate'n, rassatike baqaquwwi giddo
oose ha'nooxxa tolchina'mekebaa?
Dhooqati giddo hedheeke shaqqaxxe kino
giddo hexxeexxi fakkuwwa atixxen;
Kunnichchuwwinna atik qoobbuwwa
dhugaaten, konneelchuwwa ha'watika tolcha dhangalaase'eten;
midhatika tolchuwwanna shiqishsheten;
Anita konnechchuwwixxee sammi hiyyannota?
Taqe atixxa qephphinake'ninna qeerraaxxe kooba hana falteten
ookkonna tolcha atika shiqishshottaa da'mitattonni.
Cufana atikena'ninna mikikkilanjuwwi atik uduma,
magenoonfattaxxa aatixxa fakkuwwa fannisseteen;
Ma'na atixxanna farri assexxeten;
Yabaabuletee'e hira weli aagee yorte atixxa bidhdhitetten;
saala insa'nekanna uuddetten.
Ejeersiinxa zayite
shitto lebbettexxi Molekibaa martetten;
Atika erganjuwwinna bayyike bogiba'a ergitette;
ati ifi wiiddi dimmi giddi'a dhidhindette.
Oriinxe birasa'nenaa'n ifi gophphette;
yaane kinni, ‹Addachchissaaxxeba'a› hiteboxxo;
Uduudakanna alfitette;
tennexxe corco hiteboxxon.
«Anee sobbettek
ayyee sodaatte, ayyee rifit hiteette?
Ane qaabbatteboxxok
tennenna qalbefata gophphettechchi
Anee sodaata gophphettechchi
ani sammi hiyyennexxeetebaa?
Eloxxenni hitinaa'ni assitina'neexxa ha'nooxxa huje farri assannoni;
magenooffatinammaxxi fakkuwwanna ha'no dandette gargartabaan.
Gargaassake raartattoxxa yanna
ifi bukki asseteexxa magenoofachchotixxi fakkuwwa atee anjirtaqqata!
Konnelchuwwa diidallo filte adhdhite me'itaan;
hafuurkinna konnelchuwwa xeeraan;
Anee gollake assedheek manji kinni
ookkonee boga dhaala;
anxa woyyitte koobanna adhdhaan.»
Mageni Arda Ifika Gargaaro'aanna Fayyiso'a Haaso'eeka Haaso'a
Duuchchi Woddiki Gootti Hiyyanee qici,
«Giisse, giisse! Ora qophpheesse;
anke ardike orinaa'n gufo fugusse!»
Lumodheekinnaa duuchchingenaa'n xalli hiyyeek isi
summi isikinna Woyyichcha kadeek duuchchi woddi'a hedhaak hiyya'nee qici:
«Salphateeke mannika irra qophphi assatee
Enqendeexxa qalbe afeekaara dammassatee
ettene qephphitte bakka'ninna ookkone woyyichcha booncho'n hedhanno;
Enqendexxa qalbe afeekeerininna
ifike irrinni salphateekerinni welti hedhannon.
Manjiink irri ani edo ifi gophabaashsha
dadeennek manjik hafuurinna uurrabaashsha
Duuchchi woddi'a aallatabe'no;
duuchchi woddanna mufatabe'no.
Cubbo itti hexxeexxe kaddemmaxxee haafensha isixxe'n mufaten;
isenna mura woxxisenne; alba ankanna mufeti isinaa'n sho'edhe;
kaddo malee ora ifika me'a waalebaan.
Ani ora isika afe'ennen, kaddo malee isoo fayyisanno;
isoo akeekanno; isi'aanna isixxee oodhakara
dayyeefachcho insa'ne ille iima hiissanno.
Isira'eelike oodhalchuwwinke afo'o'ni galata dadanon;
Shiqonnaa bayya hedheekeeri'aa nage'i kadowwaal;
Ani insa'nee fayyisannon»
hiyya'neen Duuchchi Woddik Gootti.
Fuggaalleeyye kinni ikk danbala'i dhoqqennaa kora fulchammashsha
sammi hiyya dande'ammabaashsha
insa'nee daaqqammaxxe abbaayyashshaten.
Ank Mageni, «Fuggaalleyyetee nage'i hedhebaan» hiyyaan.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.