Gedeo Bible
Issayaasikaa Raaga 9
Edi'a Moyaaka Nage'iinka Moyaanjo
Iikki rakkateemmaki manni langaxxa rakkatabaan.
Edike baro'n Zaabilonikinna Nefitaalemik bogi salphatee hedha'nemman: udumike baro'n kinni Mediteriyaanike Abayyake boroti darreke boganaa'ni Yordaanoosi wido hedheke bogi qico'n giddi'ninni wele gosaki ardi bukki hiyye hedha'neeki Geliilaki bogi ulfaataan.1
Dukkanate'n hedhammaki ardi
lumoka ifa uude;
Dimma dukkana bogi giddo hedheeki duuchchi'a
ifi ife.2
Duuchchi Woddike Gootta! Arda atika bira sa'isitetten;
gammashsho insa'ne'ni bira sa'isitetten:
Ardi midha aasedhaa wodda,
yookaan boji'o qoodemaa wodda
Gammadammashshanni
ati insa'ne'a assitettexxe yaane'a ardi gammadanni.
Edike baro'ni Midiyaamika manna injifatetteshshanni;
ta'anna atike arda'n hedheeka galchatika qanbaranna
Dugummo insa'neexxa gandammaxxa siqqo enqitetten:
arda atika miica'n galchammaka arda injifattetten.
Loliinke mannixxi kophe duuchchi
mundeti laaqendeexxi insa'neexxi seemmuwwa duuchcha
Giirate'n wore'ndaan
gubattaan.
Anno no'aa ilendeen!
Labbaki belti no'aa uwwemeen!
Isinna akekisanjo no'oke kadaan!
Summi iskinna «Mambe'iinke gorsallo,
lumoke Mageno,
Duuchchi Woddike Anna, Nage'iinke Sooressa» hiyyemaan.
Moyanjumma isixxixxi baalle gabala afeexxebaan;
isixxe mootummaxxi galchanna duuchchiin wodda nage'iinxe kaddaan;
Tenne yanna'n duuchchi woddi qico'n,
isixxi mootumma dhugaatinna seerinxi murte'n ijaarendaan;
Daawwitixxe moote'ni hexxemmashsha jabeessaan;
Daawwitixxe moote hana ofo'laan;
boga duuchchanna galchaan;
Dada Duuchcha Ajajaaki Duuchchi Woddiki Gootti isixxe hinaaffenni
tennee assatee mudhdheen.3
Magen Isra'eelika Arda Mura Woxisaaxxa
Duuchchi Woddiki Gootti Ya'iqoobixxe horte kadeke Isra'eelike arda'ni murtetika hiyyichcho erge;
tinni murtetenna Isira'eelinni muuxendaan.
Isira'eeliki ardi duuchchinna
Efireeminna Semaariyake qachcha'n hedhaaki duuchchi
Tenne asseeki Magenoke kadeexxa ege'naan;
kaddoolenna, hollatinna haloonfatati hinaa qici,
«Boloketeti ijaaremeki minuwwi diigeemeen:
no'o kinni hiissine bocendeexxe kinnon ijaarrannon:
Odi'iinxe haqqenni haaroba ijaareeki utuphuwwi enqemeen:
no'o kinni hiissine eloxxe Libaanosixxe haqqenni giissinannon» hinaan.
Tennexxee Duuchchi Woddiki Gootti insa'nee gibaaka naapha
insa'ne'ni ke'issee;
diina insa'nekanna insa'ne'n iyyedagaan.
Isinna borotibaa'n Sooriyaka manna, dhidhimi darre'n Filisixeemika manna ergeexxi
Isira'eeli lolaashsha asse; tinni duuchchi kadde'naanni mufee isixxi qiiddebaan; tennexxee anga isixxi ganetee qophphoottexxen.
Ardikinna kinni insa'nee mura woxisemmake Dada Duuchcha Ajajake Duuchchi Woddike Goottibaa higebaan:
yookaani isoonna hasebaan.
Tennexxee Duuchchi Woddiki Gootti uminshanna eegetishsha
meexxetishshanna isexxe damuuwwashsha uudemaaka mitte barra'ni Isira'eelinaa'ni kutaan.
Umoke hiyyemeeki geedheetanna ulfeesemeeke mannamman;
eegete hiyyeemek hiyyechchi dhara barachchiissaammaxxe wabeekomman.
Konne arda akeekammaki duuchchi arda dedhiseen;
ardikinna orakenaa'n gore jeeki hiyye'een.
Tennenaa'n kexxeexxa dada duuchchiki Duuchchi Woddiki Gootti dargaggeeyyuwwa insa'neexxa xixaan;
aro'o affebaaxxe melaalle'ana nossaaka affebaaxxa hadi reyeexxa oosuwwa'a mararabaan; duuchchiingi ardi Mageno ege'nebaakenna ajajemabaake kadeen;
mitte mitte manjki haaso'a'neexxi xaqaro callan.
Tinni duuchcha kaddee'naa Duuchchi Woddike Goottixxi mufe qiiddebaan;
tennexxee anga isixxi insa'nee ganaate qophphefatteexxen.
Ardiinxi fuggo ha'yitammaxxee giirashshaten;
iitti giiranna qu'muudotanna utet ittaan;
Gongomiinxa haqqenna ittaa wodda
wiliille, iimi'a tuqu tuqu hitaaxxi toggi hiyye urreechcho fakkattan.
Dada Duuchcha Ajajaki Duuchchi Woddiki Gootti mufatenaa'n kexxeexxa butta itendaan;
ardikinna bogi giddo duuchcha giirate'n
Ha'yishendammaxxe haqqeshsha gubataan;
dayyo ifika marara dande'aak ayyinna hedheba'a.
Mitte gamanaa'ni goddinaa qico'n indaan;
yaane kinni solo'i insa'nenaa'n ke'abaan;
Iittanni wele ga'mii'n tuqanta'n indaan
yaane kinni goddinabaan;
Mitti mittingi ifixxe ooseka maala midde indaa qico'ni gennaan.
Tinninna Minaasek ardi Efireemike arda'n ke'aan, Efireemikinna Minaaseke arda'n ke'aani;
lamiinge minik ardi mitteba higeexxi Yihudake arda'n duulaan;
Tinni duuchcha kadda'naa'n Duuchchi Woddike Goottixxi mufe qiiddebaan;
tennexxee anga isixxi insa'nee ganatee qophpheefateeshshanni hexxeen.
Source notes (3)
- Cross-reference Mat. 4:15.
- Cross-reference Mat. 4:16; Luq. 1:79.
- Cross-reference Luq. 1:32-33.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.