Gedeo Bible
Issayaasikaa Raaga 15
Mo'aabixxee Kulemeeka Raaga
Mo'aabixxee haaso'emeek hiyyichchi konneechchinni butta hedheeken:
Eerikinna Qiiriki qachchuwwi mitte barra'n diigeme,
Mo'aabik boginna one gatte!1
Dibooniki ardinna galmiba'a me'e;
oodho'aanna tulloti iimi'a qabate;
Mo'aabik ardi Neebawixxenna, Medaabike qachchi'a lumoshsha yaada'n oodhaan;
Umokanna qunqumemeen
areeduwwakanna haaxxineen.
Insa'nenna ora ora'ninni dooniyatixxa seemma oddo'ween;
fooqete'ninna weldeenate'n
Duuchchiinge oodhaan
indiddo fixe'naan.
Haseebonikinna Eli'aalek ardi oodhaan;
oodhishsha insa'neexxinna Yahaatsi qico'n laqisaan,
Tennexxee Mo'aabik loliinki manninna raare
godobi insa'neekinna raafeme.
Mo'aabike ardixxe mitte godobinni oodhaaneen;
baqateek isek ardinna Tso'aari qico'n,
Egila Shelshi qico'n baanje,
Insa'ne indiddo coccosina'ni
Luuhitixxa tarba qabante fulle;
Insa'nenna Horonayimike ora'ninna
balleessa ifixxe'a ke'issine haasonna'n oo'ne.
Nimiirixxi muummuwwanna baggeen;
qarqarake'n hexxemmaxxi badda'uwwatinna qoorte'en
Hiddichchuwwikinna ba'een
hanjaachcho hiyyemaachchi hedhemmabaan.
Tennexxee insa'ne anfemmaxxa karra
anfemachcho duuchcha Ahaayyak galaan widdi'a ba'e'ne foossinaan.
Raare insa'neexxinna Mo'aabike bogixxe gabala qico'n laqissaan
hunbaashsha insa'neexxinna Egilayimi qico'ni
insa'neke abarixxi oodhishsha Bi'eeri'eelimi qico'n gelteen.
Dimoonike qachchik galaanuwwi mundeti mundete kaddeen;
kaddo malee kinni Duuchchi Woddik Gootti Dibonike arda'ni tennee saxxeexxa yaane iyyedagaan;
Mo'aabii'n baaje fulaakeera'n
ookkone boga'ni gataake manna'n neenqa erge'naa ite biraan.
Source notes (1)
- Cross-reference Isa. 25:10-12; Erm. 48:1-47; Hiz. 25:8-11; Amo. 2:1-3; Sof. 2:8-11.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.