Gedeo Bible
Issayaasikaa Raaga 39
Baabiloonii'n Erga Dageka Manna
(2 Moy. 20:12-19)
Eettene yanna'n Baabiloonik moyanji Balaadaki belti Meerodaak Baladaani moyanji Hizqiyaasi elagophe fayyeexxa laqe; tennexxee isi'a uwwati welti borro borreesse erge. Hizqiyaasinna erga dagemmaka manna gammashshoti qophedhe; mootummatik miyiinke miyi giddo hexxeexxa karra duuchcha birretika siblljonna worqe fishitaaxxa qurunfuuduwwanna shitto loliinka miyiwwanna miyuwwiinke mini giddo hexxeexxa karra duuchcha insa'ne'ni leellishe: mootummatike miyi giddo kaddo mootumma ifixxi giddo heene bakka'ninna hexxeexxa karra duuchcha Hizqiyaasi insa'ne'ni leellishebaangi gateechchi mittiichchinna hedhemmabaani. Ookkonneechchi uduma wabeekichchi Issayaasi moyanjo Hizqiyaasibaa mareexxi «Kunni manni habaa'n dageeke? Atee maa hiyye?» hiyyeexxi qore.
Hiziqiyaasinna «Kunni manni dageek Baabilooni hiyyemaake bayyike boginaa'niten» hiyyeexxi hiise haaso'e.
Issayyaasinna «Galchatike mini giddo maachchcho uunde?» hiyye qore.
Hiziqiyaasinna «Duuchchin geechcho uundeen; miwwuwiinke mini giddo hexxeexxa karra duuchcha insa'ne'a leellishshebo'nolchi mittichchinna hedhebaani» hiyye.
Issayaasinna moyanjo, «Dada Duuchcha Ajajaaki Duuchchi Woddiki Gootti hiyya'nee qico laqi, Ediki annuwwi techchi qico'n mootummatike mine'n hexxeexxa karra duuchcha mittetinna gattebaangi Baabilooni'a bukki assine adhdhendaaxxe barra daggaan; mittichchi gataachchi hedhebaan, hiyya'neen Duuchchi Woddik Gootti. Atixxe horte giddii'n mitti mitti booji'emeexxi Baabiloonike moyanjinke mootummatike mine'n adhdhemeexxi middisaake kade ergatemaashsha assemaan.» 1
Moyanji Hizqiyaasi baro, isike'n nage'ikinna ti'ni hiyye hedha hexxeexxa ege'nemmaxxee «Duuchchi Woddiki Goottaa ane'ni ergitettek hiyyichchi eloken» hiyye.
Source notes (1)
- Cross-reference Dan. 1:1-7; 2 Moy. 24:10-16; 2 Odo. 36:10.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.