यिर्मयाह

यिर्मयाह

यिर्मयाह नबीए रे जरिये लिखी री कताब

भूमिका

यिर्मयाह नबी ई. पू. साती शताब्दिया रे उत्तरार्ध ओर ई. पू. छठी शताब्दिया रे पूर्वार्धो दे ऊआ था। आपणे इतणे लाम्बे सेवा रे बखतो दे तिने परमेशरो री प्रजा खे बड़ी बिपदा पड़ने रे बारे दे कई बार चतौणी दित्ती जो तेसा जातिया रे मूर्तिपूजा रे काम ओर पापो रिया बजा ते आऊणे वाल़ी थी। से आपणी इना भविष्यबाणिया खे पूरा ऊँदे ऊए देखी सकेया। बेबीलोनो रे राजा नबूकदनेस्सरो रे जरिये यरूशलेम शईरो री आर, शईर ओर मन्दरो रा सत्यानाश ऊणा ओर यहूदा रे राजा ओर बऊत लोका रा बेबीलोनो दे बन्दी ऊई की चली जाणा। तिने पईले ते ई बताईता दा था कि बादो ते लोक गुलामिया ते आऊणे ओर ये देश फेर बसाया जाणा।

यिर्मयाह री कताब कईया इस्सेया दे बांडी सकोए :

यिर्मयाह रा बुलाया जाणा

योशिय्याह, यहोयाकीम, यहोयाकीन, ओर सिदकिय्याह राजेया रे बखतो दे यहूदा देश ओर तेतेरे परदाना खे परमेशरो रिया तरफा ते दित्ते दे सन्देश।

यिर्मयाह रे मुंशी, बारूको रे बचार, जिदे यिर्मयाह रिया कई भविष्यबाणिया ओर तेसरे जीवनो रिया कई खास कटणा शामिल इया।

लग-लग दूजे राजा ते मिले दे परमेशरो रे सन्देश।

एक इतिआस, जिदे यरूशलेम शईरो रा पतन, ओर बेबीलोनो री गुलामिया दे जाणे रे बारे दे मिलोआ।

यिर्मयाह एक रोणे वाल़ा माणूं था जो आपणेया लोका ते बऊत प्यार करो था, कईया जगा दे से बऊत दु:खी ऊई की बोलोआ कि तेसखे कितणी पीड़ महसूस ओ थी कऊँकि परमेशरे से एक नबी ऊणे खे बुलाई राखेया था। परमेशरो रिया गल्ला तेसरे दिलो दे आगी जेड़िया ओ थिया, से तिना खे दबाई की नि राखी सको था।

रूप-रेखा

यिर्मयाह रा बुलाया जाणा

योशिय्याह, यहोयाकीम, यहोयाकीन, ओर सिदकिय्याह नाओं रे राजेया रे बखतो दे कित्ती रिया भविष्यबाणिया

यिर्मयाहो रिया जिन्दगिया दे कटी रिया कटणा

जातिया-जातिया रे खलाफ भविष्यबाणिया

यरूशलेम शईरो रा नाश