Baghlayani Bible
यिर्मयाह 37
सिदकिय्याह री प्रार्थना
बेबीलोनो रे राजा नबूकदनेस्सरे यहोयाकीमो रा पाऊ कोन्याह यहूदा प्रदेशो रे राजे रे पदो पाँदा ते टाईता था। ओर तेसरी जगा पाँदे योशिय्याह रा पाऊ सिदकिय्याह खे राज बणाईता था। पर ना राजा सिदकिय्याह ओर ना तेसरे अधिकारिए ओर ना ई यहूदा प्रदेशो रे बचे दे लोके यहोवे रे वचन माने, जो तिने यिर्मयाह भविष्यबक्ते रे जरीये बोले थे। एक दिन सिदकिय्याह राजे शेलेम्याह रे पाऊ यहूकल ओर मासेयाह रा पाऊ सपन्याह पुरोईत यिर्मयाह भविष्यबक्ते गे ये बोलणे खे पेजेया, “आसा रिया तँईं मारे परमेशर यहोवे ते प्रार्थना कर।” तेस बखते यिर्मयाह जेला दे नि पायी राखेया था ओर से लोका बीचे आया-जाया करो था। तेस बखते ई फिरौनो री सेना चढ़ाई करने खे मिस्रो ते निकल़ी, तेबे बेबीलोनो री सेने, जिने यरूशलेम शईर केरी राखेया था, तेसरा सन्देश सुणी की यरूशलेम शईरो ते चली गे। यहोवे रा ये वचन यिर्मयाह भविष्यबक्ते गे पऊँचेया, इस्राएलो रे लोका रा परमेशर यहोवा ईंयाँ बोलोआ, “यहूदा रे जिने राजे तूँ मांते प्रार्थना करने खे पेजी राखेया, तेसखे ईंयाँ बोल, देख, फिरौनो री जो सेना तुसा री मताद करने खे निकल़ी री से आपणे देश मिस्रो खे वापस ऊई जाणी। बेबीलोनो री सेने फेर वापस आई की एस शईरो साथे लड़ने; तिना ये लई लणा ओर फूकी देणा।” यहोवा ईंयाँ बोलोआ, “ये बोली की तुसे आपणे-आपणे मनो दे तोखा नि खाओ कि बेबीलोनो री सेना आसा गे ते पक्का चली जाणी, कऊँकि से नि जाणी। यरूशलेम शईरो रे लोको जे तुसे बाबेलो री तेसा सारी सेना खे ई कऊँ नि अराई देंदे जो तुसा साथे लड़ोई, तेबे बी तिना रे डेरे दे कुछ कायल लोक ई बची जाणे, सेओ थोड़े बचे रे लोक आपणे-आपणे तम्बूए ते बारे निकल़ने ओर यरूशलेम शईर फूकी देणा।”
यिर्मयाह री कैद ओर तेसरा छुटकारा
जेबे बेबीलोनो री सेना फिरौनो री सेना रे डरो रे मारे यरूशलेम शईरो ते निकल़ी की गयी, तेबे यिर्मयाह यरूशलेम शईरो ते निकल़ी की बिन्यामीन देशो रिया तरफा खे इजी खे जाई की निकल़ेया कि तेथा ते ओर लोका साथे आपणा इस्सा लओ। जेबे से बिन्यामीनो रे बड़े द्वारो गे पऊँचेया, तेबे यिरिय्याह नाओं रा पईरेदारा रा एक सरदार तेती था जो शेलेम्याह रा पाऊ ओर हनन्याह रा पोता था, ओर तिने यिर्मयाह भविष्यबक्ता ये बोली की पकड़ी ता, “तूँ बेबीलोनो रे लोका गे जाई की तिना साथे मिली गा दा ए।” तेबे यिर्मयाहे बोलेया, “ये चूठ ए, आऊँ कसदिया गे ते नठी की नि आई रा।” पर यिरिय्याहे तेसरी एक नि मानी ओर से तेसखे पकड़ी की राजे रे परदाना गे लईगा। तेबे परदाने यिर्मयाह ते रोषे ऊई की से टीसाया ओर योनातान परदानो रे कअरे बन्दी बणाई की पाईता, कऊँकि तिने से आम जेल बणाई ती थी।1 तिने लोके यिर्मयाह खे योनातानो रे कअरो री एक कमरे दे राखेया। से कोठरी जमीना थाले थी। यिर्मयाह तिदे बऊत बखतो तक रया। तेसरे कई दिन बीतणे ते बाद सिदकिय्याह राजे से बुलाया ओर आपणे मईलो दे चोरिए जे तेसते ये सवाल पूछेया, “क्या यहोवे रिया तरफा ते कोई वचन पऊँची रा?” यिर्मयाहे ज्वाब दित्तेया, “आ, पऊँचेया ये से ए, कि यहोवे रे जरीये तू बेबीलोनो रे राजे रे वशो दे करेया जाणा।” तेबे यिर्मयाहे सिदकिय्याह राजे खे बोलेया, “मैं तेरा, तेरे अधिकारिया रा ओर तेरी प्रजा रा क्या पाप करी राखेया जो तुसे लोके आऊँ जेला दे पायी राखेया? तुसा रे जो भविष्यबक्ता तुसा गे भविष्यबाणी करी की बोलेया करो थे कि बाबेलो रे राजे तुसा पाँदे ओर देशो पाँदे चढ़ाई नि करनी, सेयो एबे केयी ए? एबे ओ मेरे स्वामी, ओ मेरे राजा, मेरी प्रार्थना सुणी की माखे योनातान परदानो रे गे फेर जेला दे नि पेज, नयी तो आऊँ तेती मरी जाणा।” तेबे सिदकिय्याह राजे री आज्ञा ते यिर्मयाह पईरा देणे रे आँगणो दे राखी ता ओर राजे सिपाईया खे ये बी आज्ञा दित्ती कि सेयो यिर्मयाह खे दुकाना ते तदुए तक रोटी मोले लई की देंदे रओ जदुओ तक की शईरो री सारी रोटिया खत्म नि ऊई जाओ। तेबे यिर्मयाह मईलो रे आँगणो दे बणी दी जेला दे रणे लगेया।
Source notes (1)
- Footnote इब्रा. 11:36
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.