Baghlayani Bible
यिर्मयाह 26
यिर्मयाह री कैद ओर तेसरा छुटकारा
योशिय्याह रे पाऊ यहूदा रे राजा यहोयाकीमो रे राज रे शुरूओ दे, यहोवे री तरफा ते ये वचन मां यिर्मयाह गे पऊँचेया, “यहोवा एड़ा बोलोआ कि यहोवे रे मन्दरो रे आँगणो दे खड़े ऊई की, यहूदा रे सारे शईरो रे लोका सामणे जो यहोवे रे मन्दरो दे माथा टेकणे आओगे, ये वचन जिना रे बारे दे बोलणे री आज्ञा आऊँ ताखे देऊँआ, तिना खे बोली दे, तिना बीचा ते कोई वचन नि छाडणा। क्या पता यहूदा रे लोक मेरे सन्देशो खे सुणी की आपणी-आपणी बुरी चाला ते फिरो ओर आऊँ तिना रा नुकशाण करने ते पछताऊँ, जो मैं तिना रे बुरे काम करने रिया बजा ते ठाणी राखेया था।” यहोवे माखे बोलेया, “इजी री खातर तूँ तिना खे बोल, यहोवा जो बोलोआ से ए मैं आपणे उपदेश तुसा खे देई राखे। तुसा खे मेरी आज्ञा रा पाल़न करना चाईओ ओर मेरे उपदेशो पाँदे चलणा चाईओ। तुसा खे मेरे सेवको रिया सेओ गल्ला सुणनी चाईओ जो सेओ तुसा खे बोलो कऊँकि नबी मेरे सेवक ए मैं नबी बार-बार तुसा गे पेजे पर तुसे तिना री नि सुणी, तो मां ये मईल शीलो शईरो जेड़ा उजाड़ी देणा ओर यरूशलेम शईरो रा एड़ा सत्यानाश करी देणा कि तरतिया रे सबी लोका तेतेरा उदारण देई-देई की स्राप देया करना।”
यिर्मयाह खे काणे री साजिश
जेबे यिर्मयाह ये वचन यहोवे रे मन्दरो दे बोलणे लगी रा था, तेबे पुरोईत ओर भविष्यवक्ता ओर सारे आम लोक सुणने लगी रे थे। जेबे यिर्मयाह सब कुछ जेतेखे बोलणे री आज्ञा यहोवे सारी प्रजा खे दित्ती थी बोली चुकेया, तेबे पुरोईत, भविष्यबक्ता ओर सारे आम माणूंए से ये बोली की पकड़ी ता। तिने जोरे की बोलेया, “एड़ी गल्ल करने रिया बजा ते ताखे पक्का प्राणदण्ड मिलणा! तैं यहोवे रे नाओं ते ये भविष्यबाणी कऊँ कित्ती कि ये मईल शीलो जेड़ा ऊजड़ी जाण ओर ये शईर एड़ा उजड़ना कि इदे कोई नि रणा?” इतणा बोलणे ते बाद सारे आम लोके यहोवे रे भवनो रे यिर्मयाह रे खलाफ पीड़ लगाई। यहूदा रे परदान इना गल्ला सुणी की, राजे रे मईलो ते यहोवे रे मन्दरो दे चढ़ी की आए ओर मन्दरो रे नवें बड़े द्वारो दे बैठीगे। तेबे पुरोईते ओर भविष्यबक्ते ओर परदाने सबी लोका खे बोलेया, “ये माणूं मौता री सजा जोगा ए, कऊँकि इने एस शईरो रे बारे दे एड़ी भविष्यबाणी करी राखी जेतेखे तुसे बी आपणे काने की सुणी चूकी रे।”1
यिर्मयाह रा बचाव
तेबे यिर्मयाहे यहूदा रे सारे परदान ओर सबी लोका खे बोलेया, “जो वचन तुसे सुणी राखे, सेयो यहोवे ई माखे एते मन्दरो रे ओर एस शईरो रे खलाफ भविष्यबाणिया री रवाजा पाँदे बोलणे खे पेजी राखेया। तुसे लोक आपणा चाल-चलण ओर आपणे काम सुदारो ओर तुसे आपणे परमेशर यहोवे री गल्ल मानो, तेबे यहोवे तुसा रे खलाफ बोली दी मुसीबता रे बारे दे आपणा बचार बदली देणा। देखो, आऊँ तुसा रे वशो रे ए, जो कुछ तुसा री नजरा रे खरा ओर ठीक ए सेई मां साथे करो। पर ये पक्का जाणी लो कि जे तुसे माखे काई देयोगे, तो आपू खे ओर एस शईरो खे ओर एथो रे रणे वाल़ेयो खे निर्दोषो रा अत्यारा बणाओगे, कऊँकि यहोवे आऊँ सच्चो खे ई ये वचन सुनाणे खे पेजी राखेया।”
यिर्मयाह रा छाडेया जाणा
तेबे परदान ओर सबी लोके पुरोईता खे ओर नबिया खे बोलेया, “यिर्मयाह, नि मारेया जाण चाईए। यिर्मयाहे जो कुछ बोलेया से म्हारे परमेशर यहोवे री ई वाणी ए।” तेबे देशो रे बुजुर्गा बीचा ते कई जणे उठी की प्रजा री सारी मण्डल़िया खे बोलणे लगे, “यहूदा रे राजा हिजकिय्याह रे राजो रे दिना दे मोरेशेत शईरो रा रणे वाल़ा मीका भविष्यबाणी करो था, तिने यहूदा रे सारे लोका खे बोलेया, ‘सेना रा यहोवा एड़ा बोलोआ कि सिय्योन बायी की डोरू बणाया जाओ ओर यरूशलेम खण्डहर ऊई जाणा ओर मईलो वाल़ा पाह्ड़ जंगल़ी जगा ऊई जाणी।’ पर क्या यहूदा रे राजा हिजकिय्याहे या किने यहूदिये से मरवाया? क्या तिने राजे यहोवे रा डर नि मानेया ओर तेसते बिनती नि कित्ती? तेबे यहोवे जो मुसीबत तिना पाँदे ल्याऊणे खे बोलेया था, तेतेरे बारे दे क्या से पछताया नि? एड़ा करी की आसा आपणे प्राणो रा बड़ा नुकशाण करना।”
भविष्यवक्ता ऊरिय्याह
तेबे शमायाह रा पाऊ ऊरिय्याह नाओं रा किर्यत्यारीम शईरो रा एक मर्द जो यहोवे रे नाओं ते भविष्यबाणी करो था तिने बी एस शईरो रे बारे दे ओर एस देशो रे खलाफ ठीक एड़ी ई भविष्यबाणी कित्ती जेड़ी यिर्मयाहे यबु करी राखी। जेबे यहूदा रे यहोयाकीम राजे, तेसरे सारे सिपाईए ओर सब परदाने ऊरिय्याह रे वचन सुणे, तेबे राजे तेसखे काणे री कोशिश कित्ती ओर ऊरिय्याह ये सुणी की डरो रे मारे मिस्रो खे नठी गा। तेबे यहोयाकीम राजे मिस्रो खे लोक पेजे, मतलब अकबोरो रा पाऊ एलनातान कई मर्दा साथे मिस्रो खे पेजेया। सेयो परदान ऊरिय्याह खे मिस्रो ते निकयाल़ी की यहोयाकीम राजे गे ली आए ओर तिने से तलवारी साथे मरवाई की तेसरी लोथ आम माणूंआ री कब्रा दे सटयाई ती। फेर बी शापानो रा पाऊ अहीकाम यिर्मयाह साथे खड़ा रया ओर तिने न्याय करने वाल़े समजयाए की तेसखे लोका रे आथो दे नि देयो ताकि से काया जाओ।
Source notes (1)
- Footnote प्रेरि. 6:11-14
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.