ኢዮቤ ማጻፋ

ኢዮቤ ማጻፋ

ጊዶ ቆፋ

ኢዮቤ ማጻፋን ኑኒ ቤኢዛ ታሪኬይ ዎልቃማ ሜቶይኔ ቆሆይ ኢዛ ቦላ ጋኪዳ ኢሲ ሱሬ ኣሳ ጊሻስ ቆንጪሴስ። ሄ ኣዴዚካ ባ ናይታኔ ባ ሃሮ ኡባፌ ሜላ ኣቶይሳፌካ ቦላራ ኢታ ማዱን ማዱንጺዲ ዋዬቴስ፤ ሄሳፌ ጉዬ ጊንጾ ማላን ሄቶ ሺቂዳ ሃሳያን ኢዮቢኔ ኢዛ ላጌቲ ሃ ኢታ ዋዪሲዛ ሜቶዛን ባስ ሴቴቲዛ ዮኦዛ ቆንጪሴቴስ፤ ዉርሴንካ ጾሲ ኢዮቤስ ቆንጪሲዴስ።

ኢዮቤ ላጌቲ ኢዛ ቦላ ጋኪዳ ዋዬዛ ጊሻስ ካሴ ባንቲ ኤሪዛ ሃይማኖቴ ዎጋፔ ዴንዲዲ ባንታስ ዲዛ ዱማ ዱማ ቆፋ ሺሼቴስ፤ ሄሲካ፥ «ጾሲ ኪያ፤ ኣሳስ ሎኦ ዎጋ ኢሜስ፤ ኢታ ኣስ ጊዲኮ ቃጻዬስ» ጌቴስ። «ሄሳካ ኢዮቤ ሃ ኡባ ሜቶይ ጋኪዳይ ኢዚ ናጋራ ኦዳ ጊሻስ ጊዶንታ ኣጌና» ጌቴስ። ኢዮቤ ጊዲኮ ኢዛ ቦላ ዎሶይ ባይንዳዴኔ ሱሬ ኣስ ጊዲዳ ጊሻስ ሃይሳ ማላ ዎልቃማ ቂጻቴይ ኢዛስ ቤሴና። ኢዮቤ ማላ ሱሬ ኣሳ ቦላ ሃይሳ ማላ ዎልቃማ ሜቶይ ጋኪዳይሲ ቢርሼቶንታ ማሌ ጊዲዴስ። ሃ ኡባ ሜቶዛን ኢዮቤ ኣማኖይ ያኔ ሃ ቃጾንታ ኣጊኮካ ቱማ ፒርዲዛ ጾሳይ ሊኬ ፒርዳ ኢዛስ ኢሚዲ ኢዛ ጋኪዳ ሜቶዛፔ ኬሳና ማላኔ ካሴ ዴኦዛ ኢዛስ ዛራና ማላ ጾሳ ሚኒዲ ዎሳፔኔ ኦይሾፔ ጉዬ ጊቤና።

ጾሲ ኢዮቤ ኢዛ ኦይቺዳ ኦይሻታስ ዛሮ ማራራ ማራራ ኢሞንታ ኣጊኮካ ኢዮቤስ ዲዛ ሚኖ ኣማኖዛ ናሺዲ ጾሲ ባ ዎልቃኔ ባ ኤራቴ ማላሊሲዛ ኦጌራ ጊንጾን ኢዛስ ቆንጪሲዴስ። ሄሳፌ ጉዬ ኢዮቢ ጾሲ ባይራኔ ኤራ ጊዲዳይሳ ሻኪ ኤሪዴስ። ጾሳ ጾሳቴ ሻኪ ኤሪዳፔ ጉዬ ካሴ ኢዚ ሃንቆን ኩሚዲ ኬሲዳ ዴጾ ቃላታ ጊሻስ ዬላቲዲ ማሮቴን ጌሊዴስ።

ማጻፋስ ዉርሴ ሼምፖይ ኢዮቢ ባና ጋኪዳ ሜቶዛፔ ዛሮ ዴሚዲ ካሴ ዴኦዛን ሲሚዳይሳኔ ቃሴካ ሃሮ ባጋራ ካሴይሳፌ ሃ ኣ ዴሚዳይሳ ቆንጪሴስ። ሃራ ባጋራ ቃሴ ኢዮቤ ቦላ ጋኪዳ ሜቶይ ኣይ ጋሶን ኢዛ ቦላ ጋኪዳኮን ኢዮቤ ላጌታስ ጌሎንታ ጊሻስ ጾሳይ ኢስታ ሚን ሴሪዴስ።

ሎሴ ጊዲዳ ዱማ ዱማ ሃይማኖቴ ዎጋታፔ ጾሲ ባ ባጋራ ባይራ ጊዲዳይሳ ኢዮቢ ጻላላ ኤሪዳ ጊሻስ ባ ላጌታ ጊሻስ ዎሲዴስ፤ ጾሲካ ኢዛ ዎሳ ሲዪዴስ። ጾሲ ኢዮቤስ ዉርሴ ዴኦዛ ኮይሮይሳፌ ኣ ሎኤዴስ።

ሃ ማጻፋይ ኦይኪዳ ኩሜ ቆፋ

ኢዮቤ ጋኪዳ ሜቶታ

ኢዮቢ ባ ዬሌታ ጋላሳ ቃንጊዴስ

ኮይሮ ዩሾ ሃሳያ

ናምኣን ዩሾ ሃሳያ

ሄን ዩሾ ሃሳያ

ኢዮቤስ ዉርሴ ሃሳያ

ኤሊሁ ሃሳያ

ጾሲ ኮይሮ ዩሾ ሃሳይዳ ሃሳያ

ናምኣን ዩሾ ጾሳ ሃሳያኔ ኢዮቤ ዛሮ

ጾሲ ኢዮቤስ ዛሮ ኢሚዲ ኣንጂዴስ