ጌሻ ማጻፋ
ኢዮቤ ማጻፋ 26
ኢዮቤ ሃሳያ
ኢዮቢ ሂዝጊ ዛሪዴስ፤
«ሃይሳ ኔ ሃሳዮይሳን
ዳቡራንቻታ ማዲዳ
ኔስ ሚሳቲዜ?
ቄሴይ ኣርጋጪዳዴ ሚንዳ
ኔስ ሚሳቲዜ?
ኣ ኤራቴ ፓጪዳዴስ
ኔ ኣይ ዞሬ ኢማዲ!
ኣይ ኤራቴካ
ኢዛዴስ ቆንጪሳዲ!
ሂስቲን ሃይሳ ኔ ሃሳያና ማላ
ኔና ማዲዳይ ኦኔ?
ኔ ሃሳያና ማላ
ኔና ዴንዳይ
ኦና ኣያና!»
«ዎልቃማ ዎጋ ጊታ ኣባፌ
ጋርሳን ዲዛ ሃይቂዳይታ ሼምፖቲ
ዎልቃማ ኮኮርሳን ዴቴስ።
ሲኦሌይካ ጾሳ ሲንን
ቆንጬን ዴስ፤
ኣባዶኔ ጌቴቲዛሶዛ
ኣይ ሚሺካ
ካማናዉ ዳንዳዬና።
ጾሲ ፑዴሃ ባጋራ ዲዛ ሳሎዛ
ጫርኮ ቦላ ሚጪዴስ፤
ቢታካ ኣይኮይ ባይንዳሶን
ኩሎቲ ዳና ማላ ኦዴስ።
ጾሲ ሻራቲ
ሃ ጹንጺ ኦይካና ማላ ኦስ፤
ሃፌ ዴንዶይሳን
ሻራቲ ዳኬቴቴና።
ኢዚ ኡቲዛ
ካዎቴ ኣራታ ጌንና፤
ሻራራካ ካማና።
ፖኦኔ ማ ሻካናስ
ዎልቃማ ዎጋ ጊታ ኣባ ሲንን
ሳሎዛ ዛዋ ኦዲ ሚጪዴስ።
ኢዚ ሃንቂዛ ዎዴ
ሳሎ ቱሳቲ ዳጋማን ኮኮሬቴስ።
ኢዚ ባ ዎልቃን ኣባ ጮኡ ኦስ፤
ኢዛ ኣ ኤራቴይካ
ኤራኣቤ ጌቴቲዛይሳ ይሳና።
ባ ፔኖዛን ሳሎዛ ጌሻና፤
ጾንጌቲዛ ሾሻ
ባ ኩሼን ጫዳና።
ሃይታንቲ ኡባይ
ጾሲ ኦዛ ኦሶታፔ
ጉታ፤
ኑ ሲዪዛይሲ ኢዛስ ሳሱኬ ጻላ፤
ዎልቃማ ጊሪሳ ኢዛይሳ
ኦኒ ኣኬካናዉ ዳንዳይዜ?»
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.