ኢዮቤ ማጻፋ 27

ኢዮቤ ሃሳያ

1ኢዮቢካ ባ ሃሳያ

ሲንዉ ጉጂዲ ሂዝጊዴስ፤

2«ሱሬ ፒርዳ ዲጊዲ

ታ ሼምፖዮ

ኣዳፌ ጫሞ ኦዳ፤

ኡባ ዳንዳይዛ ዴኦ ጾሳ

ሱንን ጫቃይስ፤

3ጾሲ ታና

ሼምፖራ ዎዳ

ዎዴይ ጋካናስ፥

4ኡባካ ኢታ ቃላይ

ታ ዶናፔ ኬኤና፤

ታ ኢንጻርሳንካ ዎርዶ ሃሳይኬ።

5ኢንቴ ሃሳይዳይሲ ዉሪ

ሊኬ ጋዳ ሙሌካ ኤኪኬ፤

ታ ሃይቃናሼ ጋካናስ

ሱሬቴን ሚና

ኤቃናይሳ ኣጊኬ።

6ታኒ ታ ጺሎቴን

ሚና ኤቃና ኣቲን

ጺሎቴ ኣጊኬ፤

ሼምፖራ ፓጻ ዲዛ

ላይ ኡባን

ታ ዎዚናይ ሃ ሚሻን ሲና።

7«ናጋራንቻታ ቦላ

ፒርዴቲዛ ማላ

ታ ሞርኬታ ቦላ ፒርዴቶ፤

ታና ኢጺዛይታ ቦላካ

ጌኔ ኣሳታ ቦላ

ፒርዴቲዛ ማላ ፒርዴቶ።

8ጾሲ ኢስታ ሼምፖዮ

ኢስታ ኣሾፔ ሻኪዲ

ኢስታ ላይ ቃንጺዳ ዎዴ

ጾሳ ካዲዳ ኣሳታስ

ኣይ ሂዶታይ ዳንዴ?

9ሜቶይ ኢስታ ቦላ ዪዛ ዎዴ

ጾሲ ኢስታ ዋሶዛ ሲያንዴ?

10ኡባ ዳንዳይዛ ጾሳን

ኢስቲ ኡፋዬታንዴቶ?

ዎዴን ዎዴንካ

ጾሳ ሱን ጼይጋንዴቶ?

11«ጾሳ ዎልቃይ ኣይ ማላ ጊታኮ

ታ ኢንቴና ታማርሳና፤

ኡባ ዳንዳይዛ ጾሳይ

ቆፒ ዎይሳ

ታ ኢንቴፌ ቆቲኬ።

12ኢንቴኒካ ሃይሳ ኡባ ኤሬታ፤

ሂስቲን ሃይሳ ሃዳ ሚሽ

ኣይስ ሃሳዬቲ?

13«ሄኮ ኡባ ዳንዳይዛ ጾሳይ

ኢታ ኣሲኔ ጌናንቻቲ

ኤካና ላታይ

ሃይሳፌ ካሊዛይሳ።

14ኢዛ ናይቲ ቲሪፒኮካ ኦላን ዉራና፤

ኢዛ ዜሬቲካ

ካ ዪን ኮሻታና።

15ሄሳፌ ኣቲዳይቲ ሃርጌን ዉራና፤

ኣምኤቲካ ኢስታስ ዬኬቴና።

16ኢታ ኣሲ ቢራ

ቢታ ማላ ሺሻናዉ፥

ማይኦካ ማና ቢታ ማላ

ዶራናዉ ዳንዳዬስ።

17ጊዶ ኣቲን ኢታ ኣሲ ሺሺዳ

ማይኦዛ ጺሎ ኣሲ ማይኣና፤

ኢዚ ሺሺዳ ቢራካ

ጌሻቲ ጊሼቲ ኤካና።

18ኢዚ ኬጺዛ ኬቲካ

ኣቻሮ ኬ ማላኔ

ካ ናጊዛዴይ ኣቂዛ

ጋባ ማላ ላሌታና።

19ኢታ ኣሲ ዉርሴ ዎዴ

ዱሬ ጊዲዲ ኢቼስ፤

ኢዚ ቤጊዛ ዎዴ ጊዲኮ

ኢዛ ኣቆታይ ኡባይ ይዴስ።

20ዳጋማይ ኢዛ ቦላ ዲኦ ማላ

ቆፖንታ ዲሺን ጋካና፤

ጊዶካ ጎቴ ጫርኮይ

ኢዛ ዴን ኤፋና።

21ኣርሼይ ሞኪዛሶ ባጋ ጫርኮይ

ኢዛሶፔ ኢዛ ፒቲ ይሳና።

22ኢዚ ባቃቲዲ ኣቲ ባናስ

ባጼቲኮካ

ጫርኮዚ ቃቴ ባይንዳ

ኢዛ ቦላ ጌዴ ሚናና።

23ጫርኮዚ ኢዛ ቦላ ኩሼ ባቂዴስ፤

ኢዚ ዲዛሶፔ ዋይቄን

ፒጺሪ ዬጊዴስ።