ኢዮቤ ማጻፋ 15

ኤልፋዜ ሃሳያ

1ቴማኔ ዴሬ ኣስ ኤልፋዜይ ሂዝጊዴስ፤

2«ቱሙ ኤራ ኣሲ

ጫርኮ ማላ ኩሼን ኦይኬቶንታ

ሚሽ ሃሳዪ ኤሪዜ?

ኢዛ ኡሎን ቆሂዛ ቆፋይ

ዳናስ ቤሲዜ?

3ኤራ ኣሲ ኣይኮ

ጎኦንታ ቃላታኒኔ

ጎኣይ ባይንዳ ሃሳያን

ማርሼቲዜ?

4ኔኒ ጾሳስ ያዪዛይሳ ኣጋዳሳ፤

ጾሳስ ቤሲዛ

ጎይኖዛካ ዲጋሳ።

5ኔ ቆሃንቻ ጊዲዳይሲ

ኔ ሃሳያን ኤሬቴስ፤

ጊዶ ኣቲን

ጪንጫቴ ሃሳያን

ካማናስ ባጼታሳ።

6ኔ ቦላ ፒርዲዛይ

ኔ ዶናፔ ኣቲን

ታና ጊዲኬ፤

ኔ ሃሳያይ ኔናቴ ቆንጪሴስ።

7«ኣሳፔ ሲንን

ዬሌቲዳይ ኔኔ?

ዙማቲ ሜታናፔ

ሲንን ኔ ዬሌታዲ?

8ቱሙ ጾሳ ጹራ ሲያዲ?

ኣሳ ኤራቴ ኤሪዛይ

ኔና ጻላ ኔስ ሚሳቲዜ?

9ኑኒ ኤሪዛይሳፌ ዱማ ሚሽ

ኔ ኤሪዛይሲ ኣዜ?

ኑ ኤሪዛይሳፌ ኔስ ቆንጪዳ

ዱማ ሚሺ ኣዜ?

10ዬሌታን ኔ ኣዋፔ ጪሚዛ

ሁኤይ ፑሉሚዳ ጪማቲ

ቆፋን ኑናራ ዴቴስ።

11ኑ ባጋራ ኔስ ዮቴቲዛ

ጾሳፌ ኢሜቲዳ ሚንይ

ኔስ ጊዴኔ?

12ኔና ኔ ዎዚናይ

ኣይስ ሃራሶ ኤፊዜ?

ኣይስ ሃንቆን ዴሬቃ ጼላይ?

13ሃይሳ ኦሶን ጾሳ ቦላ

ኔ ኣያና ዴንዳሳ።

ሃይሳ ማላ ሃንቆ ቃላ

ሃሳያናዉ ጋካዳሳ።

14«ኣሲ ጌሽ ጊዳናስ ዳንዳይዜ?

ኣሾ ማይኢዳይ

ጺላናስ ዳንዳይዜ?

15ጾሳይ ባ ኪታንቻታ ቦላ

ኣማኔቴና፤

ሳሎይካ ኢዛ ሲንን

ጌሽ ጊዴና።

16ሞሬቲዳይኔ ቱኒዳይ

ናጋራካ ሃ ማላ

ኡዪዛ ኣሲ ኣይ ማላ ኢታ?1

17-18«ኢስታ ኣዋቲ ቆቶንታ

ኢስታስ ኦዳይሳ፥

ኤራንቻቲ ቆንጪሲዳይሳ፥

ታኒካ ፒልጊዳይሳ

ታ ኔና ኤሪሳይስ፤

ሲያ ታ ኔስ ዮታይስ።

19ቢታያ ኢስታስ ጻላ ኢሜታዱስ፤

ኢማቲካ ኢስታ ጊዶን

ዋላኬቲቤቴና።

20ኣስ ዋዪሲሼ ዴኢዛ ኢታ ኣሲ

ባ ላይ ኩሜን

ዋዬቲሼ ዳና።

21ዳጋንዛ ጊሪስ ኢዚ

ባ ሃይን ሲያና፤

ኡባ ሚሺ ሳሮ ሚሳቲዲ

ኢዛስ ቤቲዛ ዎዴ

ኢዛ ይሲዛ ሚሺ

ኢዛ ቦላ ያና።

22ኢዛስ ቃዳይ

ማሻን ሃይቆ ጊዲዳ ጊሻስ፥

ማፔ ኣታና ሂዶታይ

ኢዛስ ዴና።

23ካፎስ ዎራ ኣቲዳ ካ ማላ

ኢዚ ዎራ ኣታና፤

ኢዚ ያና ማ ጋላሳይ

ኢዛኮ ማቲዳይሳ ኢዚ ኤሬስ።

24ሜቶይኔ ጬጬይ ኢዛ ያሻና፤

ኦላስ ጊጌቲዳ ካዎ ማላ

ኢዛ ቦላ ሚናና።

25ሃይሲ ሃናናይ ጾሳ ቦላ

ባ ኩሼ ዴንዳ ጊሻሳ፤

ኡባ ዳንዳይዛ ጾሳ ቦላ

ጻሊዳ ጊሻሳ።

26ኢዚ ባ ኦርዴኔ

ሚኖ ጎንዳሌ ኤኪዲ

ጾሳራ ኤቄታና ኬዚዴስ።

27«ኢዛ ኣይፌይ ሞን ጎዜቲዴስ፤

ኢዛ ጼሳይካ ኦርዲዴስ።

28ሃይሲ ሃ ኣዴዚ

ሙሌራ ኩንዲዲ

ይዳ ካታማታን፥

ላሌታናስ ማቲዳ

ካይሳ ኬታ ጊዶን ዴስ።

29ዱሬቴና፤ ኢዛ ሃሮይካ

ዳሮ ዎዴ ጋምኤና፤

ቢታ ቦላካ ኣኬና።

30ማፔ ኣቲ ባናዉ

ዳንዳዬና፤

ታማ ላጮይ ሃጋታ

ሜሊሲዳይሳ ማላኔ

ጪሻቲካ ጫርኮን

ቆኪዳ ሚ ማላ ጊዳና።

31ሃዳ ሚሻን ኣማኔቲሼ

ባና ባርካ ባሌፎ፤

ሄሳንካ ኢዚ ጎኣይ ባይንዳይሳ

ጊዲ ኣታና።

32ኢዚ ዎዴይ ጋኮንታ ዲሺን

ኡይ ሜሊዛ ማላኔ

ሃጋቲካ ጪሊሎንታ

ሚ ማላ ሃናና።

33ኢዚ ቡሮን ካጾንታ ዲሼ

ኣይፌዚ ቆቆፌቲዛ

ዎይኔ ሚ ማላኔ

ጪሻይ ቆቆፌቲዛ

ዎጋራ ሚ ማላ ጊዳና።

34ጾሳ ጾሳቴ ኤሮንታ ኣሳታስ

ዜሬ ዴኤና፤

ጉቦን ኦሴቲዳ ኬቲካ

ታማን ዲፒ ጊ ጹጌታና።

35ሃይሳ ማላ ኣሳቲ

ጌኔ ሚሽ ቆፔቴስ፤

ሜቶካ ሜቴስ፤

ኢስታ ዎዚናይካ

ባሌን ኩሚዴስ።»