ጌሻ ማጻፋ
ኢዮቤ ማጻፋ 6
ኢዮቤ ሃሳያ
ሃይሳፌ ጉዬ ኢዮቢ ሂዝጊ ዛሪዴስ፤
«ታ ሙዞቴ ጌዳሬቲ
ኡቲዳኮ ኣዜ ዲዛይ!
ታ ሜቶይ ኡባይ
ጌዳራን ጌዳሬቲ ኡቲዳኮ
ኣዜ ዲዛይ!
ኣባ ላንቄን ዲዛ
ኣጬፔ ኣ
ዴጻናኮሺን፤
ሄሳ ጊሻስ ዳንዳያይ ፓጪዳ
ታ ሃሳያይ
ኔና ማላሊሳናስ ቤሴና።
ኡባ ዳንዳይዛ ጾሳይ
ታና ባ ዪሻታን ጫዲዴስ፤
ኢስታ ማርዜቲካ
ታ ኣሳቴ ጊዶን ላሌቲዳ፤
ዳጋንዛ ጾሳ ቦሻይ
ታ ዩሾን ዩዪ ኣዴስ።
ቱማፔ ሃርዲዳይ ጪሊላ ማታ
ዴሚዲ ጫጊ ኤሪዜ?
ቦራይካ ባሶ ማታ ዴሚኮ
ጻጊ ኤሪዜ?
ማጺኔይ ጌሎንታ ማልኦንታ
ካ ሜቴቲዜ?
ጱጱሌ ሃ ማልኢዜ?
ሃይሳ ማላ ካ
ማናስ ኮይኬ፤
ሙሲ ኣቲን ኩሼንካ ቦቺኬ።
«ታ ኣሞቲዛይሳ ጾሲ
ታስ ኢሚዳኮ ኣዜ ዲዛይ!
ኢዚ ታ ዋሶ ሲዪዳኮ
ኣዜ ዲዛይ!
ሃይሳ ኡባፌ ኢዛስ ሼኔ ጊዲን
ኢዚ ታና ሜንሬ
ዬጊዛኮ!
ባ ኩሼዛ ዬዲዲ
ኢዚ ታና ይሲዳኮ!
ሼምፖ ኢሞንታ ኣይ ሃርጌይ
ታና ሳኪኮካ
ታኒ ኡፋይሳን ጉፓና፤
ታኒ ጌሻዛ ቃላ
ኣይ ዎዴንካ ካዳቤኬ፤
«ዴኦን ዴኣና ማላ ዳንዳይዛ
ኣይ ሚኖቴ ታስ ዲዜ?
ሂዶታይ ባይንዳ ኣጊኮ
ኣይስ ዴኣዚና?
ታኒ ሹቻ ማላ ሚኖ?
ታ ኣሳቴይካ
ጻርቂማላ ሚኖ?
ታና ማዳናስ
ታስ ኣይኮ ዎልቃይ ዴና፤
ታስ ዲዛ ዎልቃይ
ኡባይ ኤኬቲቺዴስ።
«ኡባ ዳንዳይዛ ጾሳስ
ያሽ ኣጊዳዴሲኔ
ዳቡርዳዴስካ ኢዛ ላጌይ
ኢዛስ ኪያቴ ቤሳናስ ኮሼስ።
ታ ኢሻቲ ጊዲኮ ሃሮይ ሃሮቲ
ዎዳፔ ጉዬ ሜሊዛ
ኣማንንታ
ሻፋታ ማላ ባሌዛይታ።
ሻፋታን ባልጎ ባልጎ
ሻቺ ኩሜስ።
ቦኔ ኣጊናታን ጊዲኮ
ማዪ ዬስ፤
ሻፋቲካ ሃ ባይንዳ
ሜላታ ጊዴቴስ።
ጫና ሜሄታ ላጊ ኦጌራ ቢዛ
ኣሳቲ ሃ ኮሻስ
ኦጌፔ ኬኢ ባዞ ቢታ ጌሊዲ
ቶይሉ ቶይሊሼ ዬቴስ።
ቴማ ቢታፌ ቢዛ ማንዳራ ኣሳቲ
ሃ ኮዬቴስ፤
ሳባ ዴሬ ዛልኣንቻቲካ
ሃ ዴማናስ
ሂዶታ ኦቴስ።
ባንቲ ኣማኔቲ ኡቲዳ ሻፋቲ
ሜሊዳይሳ ቤኢዲ
ሂዶታ ቃንጼቴስ፤
ሃኮ ጋኪዛ ዎዴ
ዪሎቴቴስ።
ኢንቴካ ታስ ሃይታ
ሃ ሻፋታ ማላ፤
ታ ቦላ ጋኪዳ ሜቶዛ ቤኢዲ
ጌዴ ጉዬ ባቃቲዴታ።
ሂስቲን ታ ኢንቴና ሄሳ ዎይኮ
ሃይሳ ታስ ኢሚቴ፥
ዎይኮ ኢንቴ ሃሮዛፔ ኬሲዲ
ታና ኣሺቴ ጋዲና?
ቃሴ ታ ሞርኬታ
ኩሼፔ ታና ኣሺቴ፤
ዎይኮ ታና ዋዪሲዛይታ
ኩሼፔ ታና
ኬሲ ኤኪቴ ጋዲና?
«ታና ታማርሲቴ፤
ታኒካ ጮኡ ጋና፤
ታ ሞሮዛካ ታና ቤሲቴ።
ቱማ ቃላይ
ጫሞ ጊዲኮካ ኤኬቴስ፤
ኢንቴ ዋላሳይ ጊዲኮ
ኣይኮስካ ጎኤና።
ኢንቴ ታ ሃሳያ
ጫርኮ ማላ ቆዴታ፤
ሂስቲኮ ሂዶታ ቃንጺዳ ታስ
ዛሮ ኢማናስ ኣይስ ኮዬቲ?
ዪኦ ናይታ ቦላ ሳማ ዬጌታ፤
ኢንቴ ኢንቴ ሲቆ ላጌታ
ባይዛናስ ሚሻን
ማርሼቴቲ?
«ኣኔ ታና ሃ ጼሊቴ፤
ኢንቴ ሲንን ታ ዎርዶታዲና?
ኢንቴስ ቆሆ ጊዶንታ ማላ ሲሚቴ፥
ታኒ ሊኬ ኣሳኮ!
ቱሙካ ታ ኢንጻርሳን
ቆሆይ ቤታኔ?
ታ ዶናይካ ጌኔ ሚሽ
ሻኪ ኤራናስ ዳንዳዬኔ?
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.