ኢዮቤ ማጻፋ 9

ኢዮቤ ሃሳያ

1ኢዮቢ ሂዝጊ ዛሪዴስ፤

2«ኤ! ታኒ ሃይሲ

ቱሙ ጊዲዳይሳ ኤራይስ፤

ጊዶ ኣቲን ኣሲ ጾሳ ሲንን

ዋኒ ጺሎ ጊዳናስ ዳንዳይዜ?1

3ኢዛራካ ኦኒ ማርሼታናስ

ዳንዳይዜ?

ኢዚ ኢሲ ሺ ኦይሾታ

ኦይቺዛ ጊዲኮ

ኢስታፌ ኢሲኖካ

ዛራናስ ዳንዳይዛዴይ ዴና።

4ጾሲ ኤራንቻኔ ዎልቃማ፤

ኢዛራ ኤቄቲዲ ጾኔቶንታይ?

5ኣኬኮንታ ዙማታ ኮኮርሳና፤

ባ ሃንቆዛንካ

ሺሬቺ ዬጋና።

6ጾሲ ቢታ ዲዛሶፔ ኮኮርሳና፤

ቢታ ቱሳታካ ቃሴና።

7ኣዋ ኣርሼይ ሞኮንታ ማላ

ኦናዉ ዳንዳዬስ፤

ጾሊንቴቲካ

ፖኢሶንታ ማላ

ኦና።

8ኦኒካ ማዶንታ ዲሺን

ሳሎታ ሚጪዳይ ኢዛ፤

ኢዚ ኣባ ዳምባላ ቦላ ሄሜቴስ።

9ዛርዶ፥ ኦሪዮኒኔ

ፒሊያዲሴ ጌቴቲዛ ጾሊንቴታ፥

ቃሴካ ዱጌ ባጋራ ዲዛ

ዳሮ ጾሊንቴታ፥

ሳሎ ቦላ ሜ

ዎዳይ ጾሳ።2

10ኢዚ ኦዛ ማላሊሲዛ ሚሻታ

ኑኒ ፒልጊዲ

ኣኬካናዉ ዳንዳዮኮ፤

ኢዚ ፖሊዛ ማካላ ሚሻታ

ኑኒ ቆዳናዉ ዳንዳዮኮ።

11«ጾሲ ታ ማታራ ኣኮካ

ታ ዴሚኬ፤

ሃ ታኮ ሺቂኮካ

ሻካዳ ኤሪኬ።

12ኢዚ ባ ኮዪዳይሳ ኤኪኮ

ኦኒካ ኢዛ ዲጌና፤

‹ኣይስ ሃይሳ ኦይ?› ጊዲ

ኢዛ ኦይቻናስ ጻሊዛይ ዴና።

13ጾሳይ ባ ሃንቆዛፔ

ጉዬ ሲሜና፤

ኤራኣቤ ጌቴቲዛ

ኣባ ጊዶ ዶኣታ

ማዲዛይቲካ

ኢዛ ቶሆ ጋርሳን ጉልባታና።

14«ሂስቲን ታኒ ኢዛስ ዛሮ

ዋና ኢማና ዳንዳያዚና?

ኢዛራ ማርሼታናስ

ኣይ ቃላ ታ ዴማኔ?

15ጌሽ ጊዳ ታ ቤቲዳኮካ፤

ታ ቦላ ፒርዲዛዴይ

ታና ማራና ማላ

ዎሳና ኣቲን

ኢዛስ ዛሮ ኢማናስ ጻሊኬ።

16ታ ኢዛ ሱን ጼይጊኮ

ኢዚ ዛሮ ታስ ኢሚዛ ጊዲኮካ

ታ ማጋና ኢዚ ሲያና ጋዳ

ታ ኣማኔቲኬ።

17ኢዚ ታና ጎቴ ጫርኮን ሊቂሳና፤

ኣይኮ ጋሶይካ ባይንዳ

ታስ ማዱን ሃ ዳርሳና።

18ሼምፖ ታ ዛራና ዎዴይ

ጋካናስካ

ታስ ሼምፖ ኢሜና፤

ታ ሼምፖን ዋዬ ኩንዴስ።

19ታስ ዲዛ ዎልቃን

ታ ኢዛራ ባጼታና ጎንታ ማላ

ዎልቃን ኢዛራ ኤቄቲዲ

ዳንዳያናይ ዴና፤

ታ ሞቴታዳ ኢዛ

ላና ጎንታ ማላ

ኢዛ ፒርዲዛ ኣሳታኮ

ሺሻናስ

ዳንዳይዛ ኣሲ ዴና።

20ታኒ ጌሺኔ ጺሎኮሺን

ታ ሃሳያይ ታና

ቆሃንቻ ኬሴስ፤

ታ ሃሳይዛ ሃሳያቲ ኡባይ

ታ ቦላ ፒርዴቴስ።

21«ኣይኮካ ታኒ

ቦሬይ ባይንዳዴ ጊዲኮካ

ታ ጊሻስ ቆፒኬ፤

ታ ሼምፖዮካ ሃራሴታይስ።

22ጾሲ ጺሎዛኔ ቆሃንቻዛካ

ይሲዛ ጊሻስ

ኣይኮ ዱማቴካ ዴና

ታ ጊዳይ ሄሳ ጊሻሳ።

23ኣሲ ኢታ ሜቶን ዉርሺን

ኢዚ ጌሻ ኣሳ ሜቶ ቂስ።

24ቢታይ ኢታ ኣሳታ ኩሼን

ኣ ኢሜቲሺን

ኢዚ ፒርዲዛ ኣሳታ ኣይፌ ጎዜስ፤

ሃይሳ ኦዳይ ጾሳ

ጊዶንታ ኣጊኮ ሃራይ ኦኔ?

25«ታ ላይቲ ዎጺዛይታፔ

ሃ ኣ ኤሶቴቴስ፤

ኣይኮ ኡፋይሲካ

ታ ዴሞንታ ኣቴስ።

26ኢስቲካ ሶኬ ጊዛይሳፌ ኦሴቲዳ

ዎጎሎ ማላ ኤሶቴቴስ፤

ባቂ ኤኪዛ ጎሌ ካፎ ማላ

ኤሶቴቴስ።

27ታኒ ታ ዙዙን ባላና፤

‹ታ ሲንካ ካሬ ኣጋዳ

ኣኔ ፖኢሳ ቤሳይስ› ጊኮ፥

28ጾሲ ታና ጌሽ ኦዲ

ቆዶንታይሳ ታኒ ኤሪዛ ጊሻስ

ሜቶይኔ ዋዬይ

ታ ቦላ ጋካና ጋዳ ያያይስ።

29ሂስቲን ታ ቆሃንቻ

ጌቴታ ቆዴቲዳ ጊዲኮ

ታስ ሃዳ ዳቡራይ ኣዛሴ?

30ታኒ ታ ኣሳቴ

ሳሙናን ሜጪዛ ጊዲኮ፥

ታ ኩሼዛካ

ኬሃ ጌሺዛ ጊዲኮ፥

31ሃ ኡባ ኦንካ

ኔኒ ዱጌ ኢታ ጪማን ታና ኦላና፤

ታ ማይኦቲካ ታና ሻቴታና።

32ኢዚ ታ ማላ ኣስ ጊዶንታ ጊሻስ፥

ፒርዲዛ ኣሳታኮ ቢዲ

ፒርዴቶስ ጋናዉ ዳንዳይኬ።

33ኑ ቦላ ባ ኩሼዛ

ጋ ዎዲ

ፒርዲ ኑና ሻኪዛ ኣሲ

ኑ ጊዶን ዲዛኮ፥

34ኢዛ ቴማቴ

ታና ሂርጊሶንታ ማላ

ጾሲ ባ ጉፌዛ

ታ ቦላፌ ዴንዳኮ፥

35ታኒ ኢዛስ ያዮንታ

ሃሳያናኮሺን፤

ሃኢ ጊዲኮ ታ ዲዛ ሃኖን ዳሼ

ሃሳያና ዳንዳይኬ።