ኢዮቤ ማጻፋ 10

1«ዱሲ ታና ሳሌዴስ፤

ታ ዴኢዛ ጫሞ ዴኦዛ

ቆንጬን ሲሳና።

2ታኒ ጾሳ ሂዝጋና፤

ታ ቦላ ኔስ ላንጬይ ዲኮ

ታስ ቆንጪሳ ኣቲን

ታ ቦላ ፒርዶፋ!

3ሃይሳ ሊኬ ኔ ታና ሜቶይሲ

ኔስ ዎጋ?

ኔኒ ኔርካ ሜዳ ኣሳ

ኔ ካናስ ኔስ ቤሲዜ?

ኢታ ኣሳታ ዱላታይ

ኔና ኡፋይሲዜ?

4ኔ ኣይፌይ ኣሳ ኣይፌ ማላ?

ዎይኮ ኔ ኣሳ ጼላይ?

5ኔ ዎዴቲ ኣሳይሳ ማላ?

ዎይኮ ኔ ላይቲ

ኣሳ ላይ ማላ ቃን?

6ኣይስ ኔ ታ ቆሆዛ ጼላይ?

ኣይስ ኔ ታ ናጋራካ

ካላ ካላዳ ኣጎንታ ኢጻይ?

7ታኒ ቆሆንታይሳኔ

ኔ ኩሼፔ ኦኒካ

ታና ኣሾንታይሳ ኔ ኤራሳ።

8ታስ ሜኔ ማላ

ኢሚ ሜዳይ

ኔ ኩሼታ፤

ሂስቲን ሃኢ ሃ ኩሼቲ

ታና ዛሪ ላሊ ይሳኔ?

9ማና ሚሻ ማላ ኔ ታና

ቢታፌ ሜይሳ ቆፓ፤

ሂስቲን ሃኢ ኔ ታና

ጉዱላ ማላ ሊቂሳኔ?

10ታና ማ ማላ ቲጋዳ፥

ሜቆ ማ ማላ

ኢርኪሳ ኦዳሳ።

11ታ ኣሳቴ ጋልባኒኔ

ኣሾን ካማዳሳ፤

ሜቄኒኔ ሻያን

ጋ ኦይዳሳ።

12ዴኦኔ ሜርና ሲቆ

ታስ ኢማዳሳ፤

ኔ ናጎይካ

ታ ኣያና ሚንዴስ።

13«ሄኮ ሃይታ ሃ ሚሻታ

ኔ ዎዚናን

ቆታ ዎዳ ዳሳ፤

ኔ ቆፋይካ ሃይሳ ጊዲዳይሳ

ታ ኤራዲስ።

14ታ ቆሂዳ ጊዲኮ

ኔ ኣይፌቲ ቤያና፤

ታ ናጋራ ጊሻስ

ታና ቃጻዮንታ ኣካ።

15ታ ናጋራ ኦዳኮ

ኤሶራ ሜቶ ጊዶን ኩንዳና፤

ሎኦ ሚሽ ኦዳ ጊዲኮካ

ጋላቴቲኬ፤

ታ ጊልቂን ዬላይ ታና ጋኪዴስ።

16ታ ኦቶሬቲዳኮ

ኔ ታና ጋሞ ማላ

ሻንካታዳ ኦይካና፤

ኔ ታና ቆሃናስ

ዛራ ዛራ ሻንካታና።

17ታ ቦላ ማርካቲዛ ኣሳታ

ኔ ኡባ ጋላስ ዴማና፤

ታ ቦላ ኔ ሃንቆይ

ጌዴ ዳሪ ዳሪ ባና፤

ኔኒ ታና ቆሃናስ

ኡባ ጋላስ ኦራ ቆፋታ

ኦላ ኣሳታ ማላ

ታ ቦላ ዴንሳ።

18«ታ ጎዳ ጾሳዉ!

ኣይስ ታ ዬሌታና ማላ ኦዲ?

ኦኒካ ታና ቤኦንታ

ታ ሃይቃይቺዳኮ

ሎኦኮሺን!

19ታ ሜቶንታ ኣታርኪና፤

ታኒ ታ ኣዬይ ኡሎፔ

ዱፎን ቢዳኮ

ታስ ሎኦ ጊዳናኮሺን!

20ታ ዳና ላይያ

ቃን ጊዴኬ?

ሄ ቃን ላይይን

ጉራ ታ ኡፋዬታና ማላ

ታና ኣጋርኪ!

21ሄሲካ ታኒ ናምኣን

ሃ ሲማናስ ዳንዳዮንታ

ጊርዲ ጊዳ ማሶ

ባናፔ ሲንና።

22ታ ባናሶዚ ማ ኩዋይኔ

ሺሮይ ኩሚዳ ቢታ፤

ሄን ዲዛ ፖኦዚ ማ ማላ።»