ጌሻ ማጻፋ
ኢዮቤ ማጻፋ 11
ዞፋሬ ሃሳያ
ናኢማኔ ዴሬ ኣስ ዞፋሬይ ሂዝጊዴስ፤
«ሃይሳ ሃ ሃዳ ቃላታስ ኡባስ
ዛሮ ኢሚዛይ ባዬ?
ኣሲ ሃሳያ ዳሮን
ጺሎ ጊዳና ዳንዳይዜ?
ኢዮቤ! ኔ ሃሳይዳ
ሃዳ ሃሳያታስ
ዛሮይ ኢሜቶንታ ሚሳቲዜ?
ኔ ሃይሳ ማላ ቂልጪሺን
ኔና ሴራና ኣሲ
ባይንዳዝ ሚሳቲዜ?
ኔ ቆፋን፥ ‹ታኒ ጺሎ› ጋሳ፤
ጾሳስካ፥ ‹ኔ ሲንን
ታኒ ጌሻ› ጋሳ።
ጾሲ ኔስ ሃሳይዳኮኔ
ሊኬ ዛሮ ኢሚዳኮ
ኣዜ ዲዛይ!
ኤራቴስ ኦጌይ
ዳሮ ጊዲዳ ጊሻስ፥
ጾሳይ ኔስ ኤራቴ
ጹራ ቆንጪሲዳኮ
ኣዜ ዲዛይ!
ሄሳ ጊሻስ
ጾሲ ኔና ቃጻዪዛይ
ኔስ ቤሲዛይሳፌ
ጉራ ጊዲዳይሳ ኤራ።
«ኔኒ ጾሳስ ጪማ ጊዲዳ ጹራ
ኤራናስ ዳንዳያይ?
ኡባ ዳንዳይዛ ጾሳ
ፒልጋዳ ጋካናዉ ዳንዳያይ?
ኢዛ ጊታቴይ ሳሎፔ ቦላ፤
ኔኒ ኣይ ኦናዉ ዳንዳያይ?
ኢዛ ጪማቴይካ
ሲኦሌፔካ ዚቃ፤
ኔኒ ኣይ ኤራይ?
ጾሳ ጊታቴይ ቢታፌ ዳሬስ፤
ኣባፌ ኣኬስ።
ጾሲ ዪዲ ቃቺኮ፥
ጌዴ ፒርዳ ኬ ሺሺዳኮ
ኦኔ ኢዛ ዲጋናይ?
ጾሲ ጎኦንታ ኣሳታ ኤሬስ፤
ኢዚ ቆሆ ቤዪሼ
ጮኡ ጊዲ ጼሌና።
ኤያ ኣሲ ኤራንቻ ጊዳናፔ
ሃሬይ ኣስ ጊዲዲ
ዬሌታናይሲ ካዉያና፤
ጊዲኮካ ኔኒ
ኔ ዎዚና ሱሪሲኮ፥
ኔ ኩሼዛ ሚጫዳ
ፑዴ ጾሳኮ ዎሲኮ፥
ኔኒ ናጋራፔ ሃኪኮ፥
ኢታ ሚሺካ
ኔሶን ቤቶንታ ማላ
ኔ ኦኮ፥
ሄ ዎዴ ቁ ጋዳ
ዬላይ ባይንዳ ኡባ ሚሽ
ኔ ቤያና፤
ዬላይ ባይንዳ
ሚና ኤቃናዉ ዳንዳያሳ።
ኔ ሜቶዛ ኡባ ኔ ዶጋና፤
ኔ ኣኬኪዛይካ
ኣ ቢቺዳ
ሃሮ ሃ ማላ ጊዳና።
ኔ ሼምፖያ ሴታ ጋላሳ
ኣዋፔ ኣዳ ፖኣና፤
ማይካ ዎንታ
ፖኦ ማላ ጊዳና።
ኔስ ሂዶታይ ዲዛ ጊሻስ
ኔኒካ ኣማኔታዳ ዳና፤
ጾሲ ኔና ናጊዛ ጊሻስ
ኔኒ ሂርጋይ ባይንዳ
ዎፑ ጋዳ ዳና።
ኔ ኦናስካ ባቦንታ ኢቻና፤
ዳሮ ኣሳቲካ ኔ ሲንን
ቦንቾ ዴማናስ ኮያና።
ኢታታ ኣይፌይ ቆቃና፤
ኢስቲ ኣታና ኦጌቲ ኡባይ
ጎርዳ ጊዳና፤
ኢስታ ዉርሴይካ ሃይቆ።»
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.