ኢዮቤ ማጻፋ 12

ኢዮቤ ሃሳያ

1ኢዮቢ ሂዝጊ ዛሪዴስ፤

2«ቱሙካ ኢንቴ ኬሂ ኤራንቻታ፤

ኢንቴ ሃይቂሺንካ ኤራቴ

ኢንቴናራ ኢሲፌ ሃይቃና

ሚሳቴስ።

3ጊዶ ኣቲን ታስካ ኢንቴይሳ ማላ

ኣኬካይ ዴስ፤

ታኒ ኢንቴፌ

ኣይ ሚሻንካ ጉጺኬ፤

ኢንቴ ሃሳይዳይሳ

ኣሲ ኡባይ ኤሬስ።

4«ታ ጾሳ ጼይጊን

ታስ ኢዚ ዛሪዳ ዎዴይ ዴስ፤

ሃኢ ታኒ ታ ላጌታስ

ቂስ ጊዳዲስ፤

ታኒ ሞሮይ ባይንዳ ጺሎ

ኣሳ ኡባስ ቂስ ኣታዲስ።

5ሜቶይ ኢዛ ቦላ ጋኮንታ ኣሳ

ማታን ሜቶቲዳ ኣሳ ሜቶ

ሌቃናይሲ ካዉሻ ሚሻ፤

ጊዶ ኣቲን ኩንዳናስ

ጋንዲጋርዛዴ ሱጊ ዬጌታ።

6ባ ኤቃ ጾሳታ ጎይኒዛይቲ፥

ካይሶቲኔ ጾሳ ካዲዳ

ኣሳቲካ ሳሮን ዴቴስ።

7«ጊዲኮካ ሜዶሳታ ኦይቻ፤

ኢስቲ ኔና ታማርሳና፤

ሳሎ ካፎታ ኦይቻ፤

ኢስቲ ኔስ ዮታና።

8ዎይኮ ቢታይስ ዮታ፤

ኢዛካ ኔና ታማርሳና፤

ኣባ ጊዶ ሞሌቲካ

ኔስ ዮታና።

9ሃይሳ ኡባ ጊዶፌ ጾሳ ኩሼይ

ሃይሳ ኦዳይሳ

ኤሮንታይ ኦኔ?

10ሼምፖራ ፓጻ ዲዛ

ሜቴ ኡባይኔ

ኢሲ ኢሲ ኣሳ ሼምፖይ

ጾሳ ማታ ጊዶን ዴስ።

11ኢንጻርሲ ካ ቃና

ሻኪ ኤሪዛይሳ ማላ፥

ሃይካ ሃሳያ ቆሞታ

ሻኪ ኤሬስ።

12ኤራቴይ ጪማቴን፥

ኣኬካይካ ላይ

ኣዱሳቴን ቤቴቴስ።

13«ጾሳስ ጊዲኮ

ኣ ኤራቴኔ

ዎልቃይ ዴስ፤

ዞሬይኔ ኣኬካይ

ኢዛ ማታፔ ቤቴቴስ።

14ጾሲ ላሊዳይሳ

ኦኒካ ዛሪ ኬጻናዉ

ዳንዳዬና፤

ጾሲ ቃቺዳይሳ

ኦኒካ ቢርሻናዉ ዳንዳዬና።

15ጾሲ ኢራ ዲጊኮ ኮሻ ጊዳና፤

ኢራ ቡኪሲኮ

ቃሴ ቢታይ ሃሮን ሜጬታና።

16ጾሲ ሚኖኔ ጾኒዛዴ፤

ባሌቲዛዴይኔ

ባሌዛዴይ፥

ናምኣቲካ ኢዛ ጎዳቴ

ጋርሳና።

17ኢዚ ዞሪዛይታ ኤራቴ ዲጋና፤

ዴሬ ካሌዛይታ

ኢዚ ኤያ ኦና።

18ኢዚ ካዎታ ካዎቴ

ኣራታፔ ዎና፤

ቃሾ ኣሳ ማላ ዳንጮ ቢርሺሳና።

19ቄሴታፔ ኢስታ ቄሴቴ

ዎ ኤኪዲ ኢስታ ጎዳና፤

ጎዳቴ ቦላ ዲዛይታ

ኢስታ ጎዳቴፌ ዲጋና።

20ኣማኔቲዳ ኣሳታ ጮኡ ኦና፤

ጪማታፔካ ኣኬካ ዲጋና።

21ጊታ ኣሳታ ዬላቻና፤

ዎልቃማታ ዎልቃ ዲጋና።

22ማሶን ቆቴቲዳ

ጹራ ቆንጪሳና፤

ሳካና ማ

ፖኦን ላማና።

23ካዎታካ ጊታሳና፤

ዛሪዲካ ይሳና፤

ካዎቴካ ዳርሳና፤

ዛሪዲካ ላላና።

24ካሌዛይታስ ኣኬካይ

ፓጫና ማላኔ

ኦጌይ ባይንዳ ባዞ ቢታን

ቶይላታና ማላ ኢዚ ኦና።

25ፖኦይ ባይንዳ ማሶን

ኢስቲ ጴታና ማላኔ

ማቲዳ ኣሳ ማላ

ኢስቲ ጋዲጋዳና ማላ ኦና።