ኢዮቤ ማጻፋ 8

ቤሊዳዴ ሃሳያ

1ሹሃ ዴሬ ኣስ ቤሊዳዴ ጌቴቲዛይሲ ሂዝጊዲ ዛሪዴስ፤

2«ኔ ዶናፔ ኬኢዛ ቃላቲ

ጎቴ ጫርኮ ማላ፤

ኣዉዴ ጋካናስ ሃይሳ

ኔ ሃሳያኔ?

3ጾሲ ፒርዳ ቦካሲ ኤሪዜ?

ኡባ ዳንዳይዛ ጾሳይ

ጺሎቴ ቦካሲ ኤሪዜ?

4ኔ ናይቲ ጾሳ ቆሂዳ ጊዲኮ፥

ኢስቲ ባንታ ፒርዳ ኤኪዳ ጉሳ።

5ጊዲኮካ ኔ ጾሳኮ ሲሚኮ፥

ኡባ ዳንዳይዛ

ጾሳ ዎሲኮ፥

6ሱሬኔ ጌሽ ጊዲኮ

ኢዚ ኤሶቲ ኔስ ቤሲዛ ሶሆን

ኔና ዛራና።

7ኔ ዶሜይ

ጉ ሚሳቲኮካ፥

ኔስ ፖሎይ ኬሂ ሎኦ ጊዳና።

8«ኣኔ ካሴ ዬሌታ ኦይቻ፤

ካሴ ኣዋቲ ጋኪዳሶዛ

ፒልጋ ጼላ።

9ኑ ላይዚ

ቡሮ ጉ ጊዲዳ ጊሻስ

ኑኒ ኣይኮካ ኤሮኮ፤

ኑ ላይይካ

ኤሾ ማላ ኣዛዛ።

10ኢስቲ ኔስ ታማርሲዛይሲኔ

ኔስ ዮቲዛይሲ

ባ ኣኬኪዛይሳፌ

ኤኪዲ ጊዴኔ?

11ቱሙካ ጫሬይ ባይንዳሶን

ሻጫ ማታይ ሞኪ ኤሪዜ?

ሃ ባይንዳሶን

ማርጮይ ጪሊሊዜ?

12ሃይሲ ሃኖንታ ኣጊኮ ዲጪዲ

ቡች ጋካናፔ ሲንን

ቡሮ ጪሊላን ዲሼ ሜሌስ።

13ጾሳ ዶጊዛ ኣሳታ

ኡባ ዉርሴይ

ሄሳ ማላ ሃናና፤

ጾሲ ባዋ ጊዛ ኣሳታ

ሂዶታይ ቃንጼታና።

14ኣቻሮ ኬ ማላ

ሚሻን ኣማኔቴቴስ፤

ኢስቲ ሂዶታ ኦዛ

ሚሺ ዲኮካ

ካዉሻራ ያና።

15ኣቻሮ ኬ ቦላ

ኢስቲ ዜምፒዛ ጊዲኮ

ኢዚ ሚኒ ኤቄና፤

ኣቻሮ ኬዛ ኢዚ ኦይኪኮ

ዱጼሬቲ ዎና።

16ሃ ካሊዳ ሃሩማይ

ሆኦ ዴሚዲ ዳዬስ፤

17ጻጶዛ ሹቻ

ሙሄ ጊዶን ዬዴስ፤

ዛላ ዛኣን ጻጴስ።

18ባ ዲዛሶፔ ሾዴቲዛ ዎዴ

ኢዚ ዲዛሶዚ ኤሬቴና።

19ኢዛ ዉርሴ ሄሳ ማላ ጊዴስ፤

ሃራ ማታቲ ቢታፌ ዶሌቴስ።

20«ጾሲ ዎሶይ ባይንዳ

ኣሳታ ኦሌና፤

ኢታ ኣሳታ ቄሴ ሚንና።

21ሄሳ ጊሻስ ኔኒካ

ኡፋይሳን ሚጫና ማላኔ

‹ኢሊላና› ማላ ኢዚ ኦና።

22ኔና ኢጺዛ ኣሳቲ ጊዲኮ

ዬላ ማይኣና፤

ኢታ ኣሳታ ኬካ ያና።»