ኢዮቤ ማጻፋ 37

1«ዎልቃማ ኡሾፔ ዴንዶይሳን

ታ ዎዚናይ ኮኮሪዴስ፤

ያሻቴፌ ዴንዶይሳን

ፒሪ ባና ጋኪዴስ።

2ኢዛ ዶናፔ ኬኢዛ ቃላ ሲዪቴ፤

ዳዳ ማላ ጉሚዛ

ጊሪሳ ቃላ ሲዪቴ።

3ሳሎፔ ጋርሳን ዎልቃን

ዎልቃሜስ፤

ቢታ ጋጻ ጋካናዉ ኪቴስ።

4ሄሳፌ ጉዬ ዎልቃማ

ባ ጊሪሳ ሲሴስ፤

ያሺሲዛ ባ ጊሪሳ

ዳዳ ማላ ጉንስ፤

ዎልቃን ፖኦይካ

ዛሪ ዛሪ ቤቴስ፤

ባ ያሺሲዛ ጊሪሳን ጉሜስ፤

ኢዚ ባ ጊሪሳ ሲሲዛ ዎዴ

ዎልቃን ዲጌና።

5ጾሳ ጊሪሳ ጉንይ

ማላሊሲዛ ጊታ ጉን

ጉሜስ፤

ኑኒ ኤራናዉ ዳንዳዮንታ

ጊታ ሚሻታ ኦስ።

6ቢታ ቦላ ሻቺ

ዎና ማላ ኦስ፤

ዎልቃማ ኢራይካ

ቡካና ማላ ኣዛዜስ።

7ኢዚ ሜዳ ኣሳቲ

ኢዛ ኦሶ ኤራና ማላ

ኡባ ኣሳይ ባንታ ኦሶዛ

ኦንታ ማላ ቴቄስ።

8ሄ ዎዴ ዎራ ዶኣቲ፥

ባቃቲዲ ባንታ ቆቴቴሶ

ጌሌቴስ፤

ባንታ ጎንጎሎዛን ቆቴቴቴስ።

9ዎልቃማ ጫርኮይ

ፑዴሃፔ ዴንዴስ፤

ሞጪዛ ጫርኮይ ፑዴሃፔ ዬስ።

10ጾሳ ፔኖይ ሃ ሞጪሴስ፤

ኢዛፔ ሻች ሜስ።

11ሻራይ ሃ

ቶካና ማላ ኦስ፤

ባ ጊዶን ዎልቃን

ዎልቃማና ማላ ኦስ።

12ጎዳ ካሌን ሻራቲ

ቢታ ዩሾን ዩዬቴስ፤

ባንታና ማዲዛ

ኣዛዞታካ ፖሌቴስ።

13ጾሲ ኢራ ቡኪሲዛይ

ቢታ ኢርጺሳናስ፥

ኣሳታ ቃጻያናስ

ዎይኮ ባ ሲቆ ቆንጪሳናሳ።

14ኢዮቤ! ኔኒ ታኪ ጋዳ ሲያ፤

ጾሲ ኦዛ

ማላሊሲዛ ኦሶታ

ዎዚናን ዎዳ ኣኬካ።

15ጾሲ ሻራ ዎስቲ ኣዛዚዛኮ፥

ዎልቃንካ

ዎስቲ ዎልቃንዛኮ

ኔኒ ኤራይ?

16ሻራ ሳሎ ቦላ

ዎስቲ ዎዳኮ፥

ማላሊሲዛ ኡባ ኤሪዛ ጾሳ

ኦሶዛ ኔ ኤራይ?

17ሳሎይ ጻርቂማላ ሚሳቲዛ ዎዴ፥

ዎልቃማ ባዞ ጫርኮይ

ቢታ ቦላ ጫርኪዛ ዎዴ

ኔኒ ሆምቤን ሴራና።

18ጾሲ ሳሎ ሴሪዳ

ማስቶቴ ማላ ሚጪኮ፥

ኔኒ ኢዛ ማታን ኡታዳ

ማዳናዉ ዳንዳያይ?

19«ኑስ ኤራይ ፓጬ ጊዲዳ ጊሻስ

ኑኒ ኣይ ጊዲ

ጾሳስ ዛራናኮ

ኔኒ ኑና ኣኔ ታማርሳ።

20ጾሳራ ሃሳያና

ጋዳ ኦይቺኬ፤

ታ ኢዛ ኦይቻዳ ኣዛስ

ኢዚ ታና ይሳና ማላ

ዴን?

21ጫርኮይ ሻራ ሳሎፔ

ቁጪ ጌሺዛ ዎዴ፥

ኦኒካ ጾልቂዛ ኣርሼ

ቲሺ ሂስቲ

ጼላናስ ዳንዳዬና።

22ፑዴሃፔ ዎርቃ ማላ

ጾልቂዛ ፖኦይ ያና፤

ጾሲ ማላሊሲዛ

ቴማን ቆንጫና።

23ኡባ ዳንዳይዛ ጾሳይ

ኑ ቆፋፔ ቦላ፤

ኢዛ ዎልቃይ ጊታ፤

ኢዚካ ቱሙ ፒርዲዛዴ።

24ባንታ ቆፋን፥

‹ኑኒ ኣ ኤራንቻታ› ጊዛይታ

ኢዚ ካስ፤

ሄሳ ጊሻስ ኣሳይ ዉሪ

ኢዛስ ያዬስ።»