ጌሻ ማጻፋ
ኢዮቤ ማጻፋ 38
ጾሳፌ ኢዮቤስ ኢሜቲዳ ዛሮ
ሃይሳፌ ጉዬ ጎዳይ
ጎቴ ጫርኮ ጊዶን ጊዲዲ
ኢዮቤስ ሂዝጊዴስ፥
«ሃይሲ ኤራይ ባይንዳ ሃሳያን
ታ ዞሬዛ ካዛይ
ኢዚ ባስ ኦኔ?
ኣኔ ኣዴ ጊዲኮ
ዳንጬታ ታ ሲንን ኤቃ፤
ታኒ ኔና ኦይቺዛይሳ
ታስ ዛራ።
ታኒ ሃይሳ ኣላሜዛ ሜሺን
ኔኒ ኣዋን ዳይ?
ኔ ኤሪዛኔ ኣኬኪዛ ጊዲኮ
ኣኔ ታስ ዮታ።
ሃይሲ ሳኣይ ኣይ ኬና ጊዳናኮ
ቆፋ ቃቺዳይ ኦኔ?
ሳኣ ቦላ ኢዚ
ሚጼ ዎዶሮታ ሚጪዳይ
ኦናኮ ኔ ኤራይ?
ቢታ ቱሳቲ ኩንዶንታ ማላ
ሚን ኦይኪዳ ዎልቃይ ኣዜ?
ኣላሜዛ ኦሶ ዶሚሺን
ዮቻ ሹች ዬጊዳይ ኦኔ?
ባካሌ ጾሊንቴቲ
ኢሲ ቦላ ዬጺዛሼ፥
ኪታንቻቲ ኡባይ ኢሊሊዛሼ
ኔኒ ኣዋን ዳይ?
«ኣባይ ቢታፌ
ቂ ኬኢዛ ዎዴ
ፑልቶ ኣይፌታ ጎርዲዳይ ኦኔ?
ኣባ ሻራን ካሚዳይ
ቃሴካ ጊርዲ ጊዳ ማን
ጎርዲዳይ ታና።
ኣባስ ዛዋ ሜዳይ
ፔንጌኔ ዛዋ ዎዳይ ታና።
ሃይሳ ጋካናዉ ያ!
ሃይሳፌ ኣፋ!
ኔ ዎልቃማ ዳምባላይ፥
‹ሃይሳን ኤቆ› ጋዲስ።1
«ኢዮቤ! ኔኒ ዬሌቶሶፌ
ዎንታይ ዎንታና ማላ
ኣዛዛ ኤራይ?
ዎንታ ፖኦስካ
ሶሆ ጊጊሳ ኤራይ?
ዎንታይ ቢታ ቦላ
ፖኦ ቤሳና ማላ
ኢታ ኣሳቲ ቆቴቲዳሶፔ
ቆንጬ ኬዛና ማላ
ኔ ኢስታ ኣዛዛ ኤራይ?
ዎንታ ፖኦይ ቢታ
ቃላምኤቲ ዲዛ ማይኦ ማላ
ቤታና ማላ ኦስ፤
ማና ሚሻ ቦላ ዲዛ
ማታሜ ማላ
ቆንጬን ቤሴስ።
ኢታቲ ፖኦ ዲጌቲዳ፤
ኢስቲ ማካላቴን ዴንዳ
ኩሼይካ ሜቂዴስ።
«ኔ ዱጌ ጪማ ኣባን
ዎዲ?
ዎጋ ጊታ ኣባ ጋርሳን
ሲሜሬታ ኤራይ?
ሃይቆ ፔንጌታ ኔና ቤሲዴ?
ጊርዲ ጊዳ ማ
ፔንጌታካ ቤያዲ?
ሳኣይ ኣይ ኬና ዳልጋ ጊዲዳኮ
ኔ ኤራይ?
ኣኔ ሃይሳ ኡባ ኤሪዛ ጊዲኮ
ኔ ታስ ዮታ።
«ፖኦይ ዲዛሶ ኤፊዛ ኦጌይ ኣዋኔ?
ቃሴካ ማይ
ዴኢዛሶይ ኣዋኮ
ኔ ኤራይ?
ኔኒ ፖኦኔ ማ
ኢስቲ ዲዛሶ ዲዛሶ
ኤፋናስ ዳንዳያዪ?
ኢስታሶይ ዲዛሶ ኤፊዛ ኦጌዛ
ኔ ኤራይ?
ኔኒ ቢታይ ሜቲዛ ዎዴ
ዬሌቲዳ ጊሻሲኔ
ኔስ ላይይካ
ዳሮ ጊዲዳ ጊሻስ
ኔ ኤሮንታ ኣጋካ!
ሻቺ ዎዛ
ኬን ጌላዲዬ?
ዎይኮ ኡቲዳ ሻቻ
ዶሬ ቤያዲ?
ሃይሳ ሃ ሻቻዛ
ታ ኦላ ጋላሳሲኔ
ሜቶ ጋላሳስ
ጎኤታናስ ሚንጃ ዎዳዛ።
ዎልቃን ኣዋፔ ዴንዲዜ?
ዎይኮ ኣርሼይ ሞኪዛ ባጋፌ
ጫርኮይ ቢታ ቦላ ላሌቲዛሶ
ኤፊዛ ኦጌይ ኣዋኔ?
ኢራ ዎዛሶ ጊግሲዳይ
ዳዳይ ዋላኬቲዳ ኡሾስ
ኦጌ ጊግሲዳይ ኦኔ?
ኦኒካ ባይንዳ ቢታን
ኣሲካ ዶንታ ባዞን ኣሺዛይ፥
ኢራይ ቡካና ማላካ
ኦዛይ ኦኔ?
ኣሲ ባይንዳ ሶሆዛኔ
ባዞ ቢታ
ሃ ካልሲዳይ
ቢታይካ ማታ ሞካና ማላ
ኦዳይ ኦኔ?
ኢራኔ ጻዛ ኢሚዛይ ኦኔ?
ሻቺኔ ኬንቾ
ኢሚዛይ ኦኔ?
ኬንቾ ሃ ሹቻ ማላ
ሚንስ፤
ኣባ ሃካ ሻቻ
ሹቻታና ማላ ኦስ።
«ፒሊያዲሴ ጌቴቲዛ ጾሊንቴታ
ኢሲ ቦላ ቃቻናስ ዳንዳያይ?
ኦሪዮ ጌቴቲዛ ጾሊንቴቲ
ኢሲ ቦላ ኦይኬቲዳ ዎዶሮዛ
ዱናዉ ዳንዳያይ?2
ጾሊንቴታ ኡባ
ኢስታ ዎዴን ዎዴን
ኬሳናዉ ዳንዳያይ?
ዛርዶ ጌቴቲዛ ዶኣ
ሜይ ዲዛ ጾሊንቴ፥
ኢስታ ማራታራ
ኔ ካሌናዉ ዳንዳያይ?
ሳሎቲ ኣይ ማላ ዎጋን
ኣቂዛኮ ኤራይ?
ሃይሳ ሃ ዎጋዛካ
ቢታ ቦላ ኦሲሳና ዳንዳያይ?
«ዳሮ ኢራ ኔስ ቡኪሳና ማላ
ሻራ ኔ ኣዛዛናዉ ዳንዳያይ?
ዎልቃን ኔ ኣዛዞን ዎልቃሚዜ?
ዎልቃን ኔ ዬዳናስ ዳንዳያይ?
ኢስቲካ ኔስ፥
‹ሄኮ ኑ ሃን ዶስ› ጊ ኤሪዞ?
ዎዚናስ ጪንጫቴ
ቆፓናስ ካሃ ኢሚዳይ ኦኔ?
ባ ኤራን ሻራታ ቆዳናስ
ዳንዳይዛይ ኦኔ?
ሳሎፔ ሃ ዱጌ ቲጋናስ
ዳንዳይዛይ ኦኔ?
ጉዱላ ኦይሴዲ
ጳሼ ኬሳናስ
ዳንዳይዛይ ኦኔ?
«ማጫ ጋሞይ ዎራ ጊዶን
ዛማዳ ኡቲዳሺን
ኔ ኢዚስ ሚዛ ሚሽ ሻንካታዳ
ኢማናስ ዳንዳያይ?
ዎይኮ ጋፊ ኡቲዳ ኢዚ ማራታ
ካልሳናዉ ዳንዳያይ?
ቁሮቲ ጋፊዲ ቢቻሪዛ ዎዴ
ኢስታ ጪዬቲካ ሚዛ ሚሽ
ይዲ ታኮ ዋሲዛ ዎዴ
ኢስታስ ሚዛ ሚሽ
ኢሚዛይ ኦኔ?
Source notes (2)
- Cross-reference ኤር 5፡22
- Cross-reference ኢዮ 9፡9፤ ኣሞ 5፡8
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.