ኢዮቤ ማጻፋ 3

ኢዮቢ ባ ዬሌቲዳ ጋላስ ቃንጌ

ኢዮቤ ሃሳያ

1ሃይሳፌ ጉዬ ኢዮቢ ሃሳያ ዶሚዴስ፤ ባ ዬሌቲዳ ጋላሳ፥

2-3«ታኒ ታ ኣዬይ ኡሎን

ሜቲዳ ኦማርሳያኔ

ታኒ ዬሌቲዳ ጋላሳያ

ቃንጌቲዳይታ ጊዴቶ!

4ሄ ጋላሳይ ማን ላሜቶ፤

ሳሎ ጾሳይ ኢዛ ቆፖፎ፤

ፖኦይ ሙሌካ ኢዛን ቤቶፎ።

5ሻሩማኒኔ ጊርዲ ጊዳ ማን

ካሜቲዳይሳ ጊዶ፤

ሻራይ ካሚን ማይ

ኢዛ ፖኦ ሚቶ።

6ሄ ጋላሳ ኦማርሳዮ

ጊርዲ ጊዳ ማይ ካሞ፤

ላይ ጋላሳታራ

ኢሲፌ ታይቤቶፎ፤

ኣጊናታ ቆዳን ጌሊ ቆፌቶፎ።

7ሄ ጋላሳ ኦማርሳይ

ኣይኮይ ባይንዳዝ ጊዶ፤

ኡፋይሳ ቃላይካ ኢዛን ሴቴቶፎ።

8ሌዋታኔ1 ጌቴቲዛ ዶኣ

ቃሴናስ ዳንዳይዛይቲ፥

ጋላሳታ ቃንጊዛይቲ፥

ሄ ጋላሳዮ ቃንጌቶ።

9ሄ ጋላሳ ኦማርስ

ባካሌ ጾሊንቴቲ ሜቶ፤

ፖኦ ሂዶታይ ኢዛን ቤቶፎ፤

ዎንታ ጻልቄይ ኢዛን ጻልቆፎ።2

10ታ ኣይፌታፔ ሜቶ ጌንና፥

ታ ኣዬይ ኡሎ ታ ቦላ

ጎርዶንታ ኣጊዳ ጊሻስ

ሄ ጋላሳይ ቃንጌቲዳይሳ ጊዶ።

11«ታ ኣዬይ ኡሎን ዳሼ

ሃ ጊዳ ኣቲዳኮ ኣዜ!

ታ ኣዬይ ኡሎፔ ኬኢዳ ማላ

ኣይስ ሃይቃቤኪና?

12ጉልባቴቲ ታና ሞኪ ኤካናስ፥

ንቲካ ታና ንናስ

ኣይስ ቤቲዶ?

13ሃኢ ታኒ ሳሮን ኢቺዳኮ፥

ስካዳካ ሼምፖ

ዴማናኮሺን።

14ሃኢ ላሌቲ ቤቲዛይታ

ባስ ኬጺዳ ቢታ ካዎታራኔ

ዞሪዛይታራ ታ ስካዳ

ሼምፖ ዴማናኮሺን።

15ባ ኬ ዎርቃኒኔ

ቢራን ኩንዳ፤

ዳናታራ ታ ኢሲፌ

ሼምፓናኮሺን።

16ቃሴካ ኣይስ ቢታ ጋርሳን

ሞጌቲዳ ኣዉጫያ፥

ዎይኮ ኢሲ ጋላሳ ፖኦ

ሙሌካ ቤኦንታ ና ማላ

ኣይስ ጊዳቤኪና?

17ሄን ኢታታ ዋዪሶይ ኣታና፤

ዳቡርሲዛ ኦሶን

ዴኢዳይቲ ሼምፓና።

18ቃሼቲ ዲዛ ኣሳቲካ ሳሮ ዴማና፤

ባና ኦሲሲዛ ኣሳታ ሃንቆ ቃላ

ሲያናይሳፌካ ኣታና።

19ላፋቲኔ ጊታ ኣሳቲ

ኢሲፌ ቤታና፤

ኣይሌቲካ ሄን

ባ ጎዳታፔ ዎዜታና።

20«ጾሲ ኡንኦ ቦላ ዲዛይታስ ፖኦ፥

ዱሳዚ ጫሞ ቆፋን ኩሚዳዴስ

ዴኦ ኣይስ ኢሚዜ?

21ሃይቆ ላሞቲዛይታሲኔ

ቆቴቲ ዲዛ ኣቆፔ

ኣ ኮዪዲ ዴሞንታይታስ

ዴኦ ኣይስ ኢሚዜ?3

22ዱጌ ዱፎን ጌሊሼ ኡፋዬቲዛይታስ

ዴኦይ ኣይስ ኢሜቲዜ?

23ኢዚ ቢዛ ኦጌይ

ኢዛዴፌ ጌሜቲዳዴሲኔ

ጾሲ ጎርዲ ዎዳ ኣሳስ

ፖኦይ ኣይስ ኢሜቲዜ?

24ዬሆይ ታስ ካ ጊዲዴስ፤

ዋሶይካ ታስ

ጎጊዛ ሃ ማላ ጊዲዴስ።

25ታ ያዪዳ ሚሽ ታ ቦላ ዪዴስ፤

ታ ዳጋሚዳይሲካ

ታ ቦላ ጋኪዴስ።

26ታ ጊዶን ሂርጋይ ጻላ ዲዛ ጊሻስ

ሳሮይ፥ ዎፓይኔ

ሼምፖይ ዴና» ጊ ቃንጊዴስ።