जेरमयाह

जेरमयाह

जेरमयाह गूरै खोज़ी दी गल्‍ला ज़ुंण आजू निभणी

भेत

लिखणैं आल़अ: जेरमयाह अर बारूक शास्त्री।

सन: 626 का 570 ईसा आजी

जेरमयाह गूरे ज़मानै थिऐ ज़ैगै-ज़ैगै घोर जुध लागै दै, ज़ुंण बी नऊंअ राज़ एछा त, सह करा त पराणैं राज़े सोभी देशा दी कबज़अ। यहूदा मुल्ख बी थिअ धख ज़िहअ रहअ द अर तेथ बी किअ तेऊ ज़मानै बाबेल देशे कबज़अ अर तिंयां हुऐ गलाम।

जेरमयाह ज़ांऊं ज़ुआन हुअ, तेऊए अमर हुई कोई बिहा साले, तेऊ खोज़अ यहूदा मुल्खे परज़ा का समाद। सह रहअ 586 ईसा आजी तैणीं खोज़दअ लागी ज़धू बाबेल देशै एरुशलेम नगरी दी कबज़अ किअ। यहूदा मुल्खे लोगा मांझ़ै छ़ाडअ सह ज़बरी मिसर देशा लै अर तिधी बी रहअ सह बिधाते इना ई गल्‍ला खोज़दअ लागी।

एरुशलेम नगरीए कई समादा दी आसा सह तिथी बी खोज़ी दी कि तेऊ ईंयां गल्‍ला कधू खोज़ी, पर ज़ांऊं तेऊए बारूक शास्त्री नाओंए एकी साथी तेऊए तिन्‍नां गल्‍ला कताबा दी लिखी डाहणां लै मज़त किई, तेथ निं तिन्‍नैं तिंयां गल्‍ला तिथी अर धैल़ीए साबै तिंयां गल्‍ला बाढै लिखी। तिन्‍नैं डाही तिंयां सोभै गल्‍ला कठा लिखी किल्हैकि तिंयां गल्‍ला करा ती एकी रंगो भेद प्रगट।

बगती-बगती रहअ जेरमयाह खोज़दअ लागी कि परमेशरा दैणीं यहूदा मुल्खा लै सज़ा। पर तेऊ बोलअ यहूदा मुल्खे लोगा लै इहअ बी कि तम्हैं मना आपणैं दुशमण बाबेल देशा का हार संघा मना तिन्‍नों राज़। तिन्‍नैं डाहअ सह कैद-खानै पाई अर तिन्‍नैं लाअ त सह मारी बी। तेखअ खोज़ी जेरमयाह अह खरी बिधाता का।

जेरमयाह रहअ कबल्‍लअ लोगा का आद फरेऊंदअ लागी कि तिन्‍नैं चोल़ी बिधाता संघै किई दी करार अर तैही आसा बिधाता तिन्‍नां लै एता पिछ़ू सज़ा लाई दी कि तिंयां निंणै बाबेल देशा गलाम बणाईं। पर बिधाता आसा इहअ बी डाहअ द बोली कि तिंयां आणनैं तेऊ थोल़ै धैल़ै बाद तिन्‍नें आपणीं ज़ैगा लै बापस फरेऊई तेऊ ज़मानै करनी बिधाता तिन्‍नां संघै नऊंईं करार:

“मुंह पाणअ आपणअ बधान तिन्‍नें दिलै अर दमागै। हुंह हणअ तिन्‍नों परमेशर अर तिंयां हणैं मेरी परज़ा। तेखअ निं तिन्‍नां एकी-दुजै का खोज़णअ पल़णअ मुंह बिधातो अदर करा। किल्हैकि तिन्‍नां सोभी का हणअ मेरअ थोघ च़ाऐ सह आम मणछ होए या राज़ करनै आल़ै मशूर मणछ होए। मुंह करनै तिन्‍नें पाप माफ अर तेखअ निं मुंह तिन्‍नें गलती आद डाहणीं। अह गल्‍ल डाही मंऐं बिधाता बोली।”

(31:33,34)

कताबे बांड

परमेशरै शादअ जेरमयाह 1:1-19

यहूदा मुल्खा लै चतैनगी 2:1—35:19

जेरमयाह लै खरी 36:1—38:28

एरुशलेम नगरीए बरैबादीओ नतिज़अ 39:1—45:5

संसारे सोभी लोगा लै आजू हणैं आल़ी गल्‍ला 46:1—51:64

इतिहासे साबै 52:1-34