जेरमयाह 11

जेरमयाह अर करार

1बिधाता दैनअ मुंह जेरमयाह लै इहअ समाद, 2“जेरमयाह, शुण कि मेरी करारे बिधी किज़ै आसा। यहूदा अर एरुशलेम खोज़ सोभी का इहअ 3कि तिन्‍नां लै पल़णअ मुंह इज़राईले परमेशर बिधातो फिटक ज़ुण मेरी करारे बिधी नांईं मने। 4अह करार आसा मंऐं तिन्‍नें दादा-बाबा संघै तधू किई दी ज़धू मंऐं तिंयां मिसर देशा का आणै तै काढी, ज़ुंण देश तिन्‍नां लै लोहै गाल़णे भठी ज़िहअ थिअ। मंऐं बोलअ त तिन्‍नां लै इहअ कि तिन्‍नां सोभी गल्‍ला करै तेही ई ज़िहअ मंऐं हुकम आसा किअ द। मंऐं बोलअ त तिन्‍नां लै ज़ै तिंयां मेरअ हुकम शुणें, तै हणैं तिंयां मेरी परज़ा अर हुंह हणअ तिन्‍नों परमेशर। 5तै हणीं मेरी सह ज़बान पूरी ज़ुंण मंऐं तिन्‍नें दादा-बाबा संघै किई ती कि तिंयां बणाणैं मुंह तैहा रज़दी-पज़दी ज़ैगे मालक ज़ेथ दुधा-मखीरे गाडा बगा अर ज़ेथ तिंयां आझ़ बस्सै दै आसा।”

मंऐं बोलअ बिधाता लै, “हाँ बिधाता, एवमस्तू।”

6तेखअ बोलअ बिधाता मुल्है इहअ, “यहूदा नगरी-नगरी अर एरुशलेम हर बाता डेऊ। संघा खोज़ मेरअ समाद सोभी का कि मेरी करारे बिधी मना संघा करा तेते ई साबै ज़िहअ हुंह बोला तिहअ। 7ज़धू मंऐं तिन्‍नें दाद-बाब मिसर देशे गलामी का छ़ड़ैऊई आणै तै, तधा ओर्ही आझ़ तैणीं आसा हुंह तिन्‍नां लै भिई-भिई बोली चतैनगी दैंदअ लागअ द कि ज़िहअ हुंह बोला तिहअ शूणां। 8पर तिन्‍नैं किई मेरी गल्‍ला शूणीं नां शूणीं! उंबल़ै रहै तिंयां सोभ कबल्‍लै हठू अर कदुष्ट हंदै लागी। मंऐं किअ त तिन्‍नां लै हुकम कि तिंयां करै मुंह संघै हुई दी करारे सोभ गल्‍ला तेही ई पूरी, पर तिंयां हुधूऐ! तैही दैनअ मंऐं तिन्‍नां लै तिन्‍नां सोभी फिटका लागणै ज़ुंण करार पूरी नांईं हणैं करै पल़णै तै।”

9बिधाता बोलअ मुल्है इहअ, “यहूदा मुल्ख अर राज़धानी एरुशलेम नगरीए लोग आसा मुल्है द्रोह करदै लागै दै। 10तिन्‍नैं ढाकी पाप करने सह ई बात ज़हा बाता तिन्‍नें दाद-बाब थिऐ, तिंयां हुधूऐ तिहअ करनअ लै ज़िहअ मंऐं तिन्‍नां लै बोलअ थिअ, तिंयां लागै होरी देअआ पूज़दै। इज़राईल अर यहूदा पाई दुही सह करार चोल़ी ज़ुंण मंऐं तिन्‍नें दादा-बाबा संघै किई ती। 11तैही दैआ ऐबै हुंह बिधाता तिन्‍नां लै चतैनगी कि तिन्‍नां लै दैणअ मुंह आफ़त पल़णै अर तेता का निं तिंयां ऐबै छ़ुटी सकदै। तेखअ पाए तिंयां मुंह सेटा ज़ेही बी लेरा-पकारा, पर हुंह निं तेखअ तिन्‍नें शुणदअ। 12तेखअ डेऊणैं यहूदा मुल्ख अर राज़धानी एरुशलेम नगरीए लोग तिन्‍नां देअआ सेटा लेरा लाई मज़त मांगदै ज़हा लै तिंयां पज़ाया दैआ तै, अर तिंयां निं तिन्‍नां तैहा आफ़ता का बच़ाऊई सकदै ज़ुंण एछणैं आल़ी आसा। 13यहूदा मुल्खे आसा ज़ेतरी नगरी तेतरै देअ, ज़ुंण एरुशलेम नगरी आसा बस्सै दै, तिन्‍नैं आसा सारी बाता नशर्म बाल देअए बेदी डाही दी बणाईं अर तिंयां हआ तेथ धूप ज़ाल़दै लागै दै।

14“जेरमयाह, तूह निं मुंह सेटा इना लोगा लै अरज़ करी अर नां इना बाखा मुंह सेटा गल्‍ला करदअ लागी। ऐबै ज़ेभै इना लै आफ़त पल़ी अर ईंयां मुखा मज़त मांगे, मुंह निं इने शुणनी।”

15बिधाता बोलअ इहअ,

“हुंह झ़ूरा यहूदा मुल्खे परज़ा लै,

पर तिंयां आसा होरी खास्सै संघै ज़ुल़ी कदुष्ट काम करदै लागै!

ऐबै निं तिन्‍नां मेरै भबना दी रहणैंओ हक आथी।

तिंयां कै सोठा कि तिंयां मानत मनी अर

डागै-चैणैंओ बल़ीदान करी बरैबादी का बच़ी जाणैं?

एतरअ बूरअ करी कै तिन्‍नां खुशी भेटणीं?1

16मंऐं बोलअ त तिन्‍नां लै कि तिंयां आसा हरै घणैं जैतूने बूटा ज़िहै,

ज़ेथ शोभलै-शोभलै बित्तै पल़ लागा,

पर ऐबै एछणअ मुंह गुल़ूबिज़ल़ू ज़ेही छ़ेल़ करदी

ज़बर ढिश डुआल़ै ज़िहअ, तेते पाचा दी चैल़णीं मुंह आग अर शाण्हीं पाणीं चोल़ी।

17“यहूदा अर इज़राईल आसा मंऐं बिधाता रोहै दै ज़ुंण स्वर्गे सारी सैनो मालक आसा। पर ऐबै दैणअ मुंह तिन्‍नां थारै दुशमणा बरैबाद करनै। अह आफ़त पाई तिन्‍नैं आप्पू लै आप्पै किल्हैकि तिन्‍नैं किअ बूरअ, बाल देअआ सेटा बल़ीदान करै अर धूप ज़ाल़ी ठैऊई तिन्‍नैं मुल्है रोश्श।”

जेरमयाह लै हान्‍नी करने सोठ

18बिधाता हेरअ मुखा खोज़ी कि तेरै दुशमण मुल्है तेरी हान्‍नी करना लै केही बिक्री सोठदै आसा लागै दै। मुखा आसा तिन्‍नें बारै थोघ। बिधाता रहैऊअ मुखा कि तिन्‍नैं मुल्है किज़ै आसा लाअ द करी। 19हुंह त होछ़ै मिम्मूं ज़िहअ नज़ाण ज़ुंण काटी हआ लाअ द, मुखा निं थोघ आथी त कि तिंयां आसा मेरी हान्‍नी करने बिकरी करदै लागै दै। तिंयां बोला इहअ, “अह हरअ अर फल़ा दैणैं आल़अ बूट पाणअ हाम्हां काटी, अह पाणअ हाम्हां मारी अर एऊओ निं लोल़ी आजू कहा नाअं बी आद रहअ।”

20मंऐं किई बिधाता सेटा एही अरज़,

“स्वर्गे सारी सैने मालक बिधाता, तूह आसा धर्मीं नसाफ करनै आल़अ,

ताखा हआ तिन्‍नां गल्‍लो बी थोघ ज़ुंण मणछ दिलै सोठा।

मंऐं डाही ऐबै आपणीं गल्‍ला ताखा खोज़ी, ऐबै लोल़ी मुखा शुझुअ

कि तंऐं हेरअ इना लोगा का बदल़अ लई।”2

21अनातोत नगरीए लोग च़ाहा तै मुंह मारनअ, तिन्‍नैं बोलअ मुल्है इहअ, “ज़ै तूह इहअ ई बिधातो प्रच़ार करदअ रहे, तूह पाणअ हाम्हां मारी।” 22तैही बोला तिन्‍नें बारै स्वर्गे सारी सैनो मालक बिधाता, “मुंह दैणीं तिन्‍नां लै सज़ा! तिन्‍नें खारकै मणछ पाणै जुधा दी मारी अर तिन्‍नें शोहरू-शोहरी मरनै भुखै। 23तिन्‍नां मांझ़ै बच़णैं सिधै धख ज़िहै मणछ ज़िऊंदै। अनातोत नगरी लै सज़ा दैणें धैल़ी आसा मंऐं काढी हेरी दी। तिन्‍नां लै लणी मुंह सज़ा दैई।”