Kulvi Outer Seraji Bible
जेरमयाह 37
राज़ै सिदकिया किई जेरमयाह सेटा अरज़
बाबेल देशे राज़ै नबूकदनेसरै बशैल़अ जोशियो शोहरू सिदकिया, जेहोकीमे शोहरू जकोनये ज़ैगा यहूदा मुल्खो राज़अ। पर नां सिदकिया, नां तेऊए कार-करिंदे अर नां आम लोगै तिन्नां गल्ला दी धैन दैनअ ज़ुंण समाद बिधाता आपणैं गूर मुंह जेरमयाह बाती दैनअ।
राज़ै सिदकिया छ़ाडै शेलेमयाहो शोहरू जेहूकल अर मासेया प्रोहतो शोहरू सपन्याह प्रोहत मुंह सेटा लै। तिन्नां का दैनअ मुल्है इहअ समाद, “जेरमयाह गूरा, ज़ीबाण, तूह कर हाम्हां बाखा बिधाता सेटा अरज़।” तधू निं हुंह जेरमयाह कैद किअ आथी त अर हुंह रहा त लोगा जैंदरी एछदअ डेऊंदअ लागी।
बाबेल देशे सैना तै एरुशलेम नगरी फेर डेरै पाऐ दै, तिन्नां का लागअ थोघ कि मिसर देशे माहा राज़ेए सैना आई सिदकिया राज़े साथ दैंदी यहूदा मुल्खे सिऊंआं भितरी, तिंयां हटै तेखअ एरुशलेम नगरी का पिछ़ू।
तेखअ बोलअ इज़राईले परमेशर बिधाता मुखा इहअ, “जेरमयाह गूरा, ज़ुंण राज़ै सिदकिया ताह सेटा लै पुछ़दै आसा छ़ाडै दै, तिन्नां का दै तूह तेऊ लै इहअ समाद कि मिसर देशे माहा राज़ेए सैना आई तेरअ साथ दैणा लै यहूदा मुल्खा बाखा, पर इना डेऊणअ आपणैं देशा लै बापस फिरी। तेखअ एछणी बाबेल देशे सैना भिई बापस फिरी संघा छ़ेल़णअ तिन्नां राज़धानी एरुशलेम जुध। तिन्नां करनअ ऐहा नगरी कबज़अ संघा चैल़णीं एथ सारै दी आग।
“हुंह बिधाता बोला ताल्है इहअ कि तूह निं आप्पू धोखै दी रही, ज़ुंण तूह इहअ सोठा, ‘बाबेल देशे सैना निं फिरी एछणी।’ पर तिंयां एछणैं पाक्कै दी बापस। ज़ै तूह ताह संघै जुधा लै आई दी बाबेल देशे सारी सैना पठी बरैबाद बी करे कि तिन्नें डेरै होए सिधै इहै मणछ बच़ै दै ज़ुंण खास्सै ज़खमी हई लाम्मै आसा पल़ै दै, तिन्नां तोही उझ़णअ खल़ै अर अह एरुशलेम नगरी पाणीं तिन्नां आग चैल़ी ढोल़ी।”
जेरमयाह किअ कैद अर सह छ़ुटअ बी
बाबेल देशे सैना हटी राज़धानी एरुशलेम नगरी का पिछ़ू किल्हैकि मिसर देशा का आई मिसर देशे माहा राज़ेए सैना यहूदा मुल्खे मज़त करदी। हुंह निखल़अ एरुशलेम नगरी का बिन्यामीन मुल्खा लै ताकि तिधी हुंह तिधे लोगा संघै ज़िम्मीं दी आपणअ हेस्सअ ढाकूं। पर ज़ांऊं हुंह 2बिन्यामीन प्रऊल़ी3 सेटा पुजअ, तिधी त सपाही पहरअ पाअ द, तिन्नां सपाहीओ दलपति थिअ शेलेमयाहो शोहरू जिरियाह, सह थिअ हनन्याहो पोचअ, तेऊ ढाकअ हुंह बिधातो गूर जेरमयाह तिधी, संघा बोलअ इहअ, “तूह आसा इधा का बाबेल देशा आल़ै सेटा लै ठुर्ही च़ाल्लअ द डेऊई भाल़ी!”
हुंह जेरमयाह रहअ तेऊ लै इहअ बोल्दअ लागी, “ईंयां गल्ला निं शुची आथी! हुंह किधी च़ाल्लअ बाबेल देशे लोगा सेटा डेऊई!” पर जिरियाह निं मेरी गल्ला शूणीं ई आथी। तेऊ किअ हुंह कैद संघा निंयं कार-करिंदै सेटा लै। तिंयां थिऐ मुल्है रोश्शै लाल-पिंऊंल़ै हुऐ दै अर तिन्नैं च़िक्कअ हुंह ज़िहअ नां किहअ। तेखअ डाहअ हुंह जोनातान काईथे घअरै खुडी कैद करी। तेऊओ घअर त तिन्नैं आम मणछा कैद करना लै डाहअ द।4 हुंह डाहअ तिन्नें सोभी का थाल्लै खुडी एकी कमरू दी खास्सै धैल़ै कैद करी। बागै डाहै पहरी लाई।
ज़ांऊं खास्सै धैल़ै बितै, राज़ै सिदकिया शादअ हुंह आपणैं मैहला लै संघा पुछ़अ मुखा च़ुप्प-च़ुप्पै, “जेरमयाह, तूह खोज़ बिधाता ताखा किज़ै समाद किनी आसा दैनअ द?”
मंऐं बोलअ, “हाँ आसा, तूह दैणअ बाबेल देशे राज़ेए हाथै।”
तेखअ पुछ़अ मंऐं राज़ै सिदकिया का, “मेरअ किज़ै कशूर आसा अर मंऐं ताल्है, तेरै कार-करिंदै या तेरी परज़ा लै किज़ै ज़ुल्म किअ कि तंऐं डाहअ हुंह कैद खानै हूल़ी? ऐबै किधी आसा तिंयां तेरै गूर ज़ुंणी ताल्है इहअ खोज़अ त कि बाबेल देशे राज़ेए सैना निं एऊ देशा संघै कधि जुध छ़ेल़णअ? माहा राज़अ, मेरै मालक, ऐबै शुण मेरी अरज़ तूह कर तिहअ ज़िहअ हुंह बोला। ज़ीबाण, ऐबै निं मुंह जोनातान काईथे घअरै बापस कैद करी, ज़ै तूह करे, ता हुंह मरनअ हेरे तिधी।”
राज़ै सिदकिया किअ हुकम कि मुंह राज़ेए मैहलै खोल़ै खुडी कैद करे। तेखअ डाहअ हुंह तिधी। ज़ेभै तैणीं सारी नगरी दी रोटी निं मुक्की, तेभै तैणीं करा तै धैल़ मुल्है तिन्नां का एक रोटी दैई ज़ुंण तिधी रोटी बेच़दै हआ तै।
Source notes (4)
- Cross-reference 2 राज़. 24:17; 2 इति. 36:10
- Cross-reference जेर. 17:19
- Footnote बिन्यामीन प्रऊल़ी एरुशलेम नगरीए उतरा बाखा दुआली दी
- Cross-reference इब्रा. 11:36
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.