Kulvi Outer Seraji Bible
जेरमयाह 36
बिधाते भबनै पहल़ी बारूकै जंतरी
ज़धू जोशियो शोहरू जेहोकीम यहूदा मुल्खो राज़अ थिअ, तेऊए राज़ा दी च़ौथी साला बोलअ बिधाता मुल्है इहअ, “जेरमयाह, तूह आण एक च़ाम्भल़े जंतरी, तेथ डाहै तूह तिन्नां सोभी गल्ला लिखी ज़ुंण मंऐं ताखा इज़राईल, यहूदा अर होरी सोभी देशे बारै खोज़ी। ज़धू जोशिया यहूदा मुल्खो राज़अ बणअ, तधा ओर्ही आझ़ तैणीं ज़ुंण बी गल्ला मंऐं ताह संघै किई तिन्नां सोभी गल्ला डाहै बाढै लिखी। झ़ाणीं यहूदा मुल्खे परज़ा तिन्नां गल्ला शूणीं हेरे ज़ुंण आफ़त मंऐं तिन्नां लै पाणीं आसा सोठी दी, अर झ़ाणीं तेता शूणीं तिंयां आपणीं बूरी बाता छ़ाडी हेरे अर तेखअ हुंह तिन्नें कदुष्ट काम अर पापा लै माफी छ़ाडूं।”
मंऐं जेरमयाह शादअ नेरीओ शोहरू बारूक, संघा बझ़ैल़ी मंऐं तिंयां सोभै गल्ला जंतरी दी लिखी डाहणैं ज़ुंण बिधाता तधू तैणीं मुखा खोज़ी ती। बारूकै डाही तिंयां सोभ गल्ला तेही ई जंतरी दी लिखी ज़ेही मंऐं तेऊ का खोज़ी। तेखअ बोलअ मंऐं बारूका लै इहअ, “हुंह आसा इधी कैद खानै बान्हीं डाहअ द, अर हुंह निं बिधाते भबनै डेऊई सकदअ। पर तूह लऐ आगली बारी बिधाते भबनै डेऊई ज़ेभै लोग ब्रत डाहा। संघा पहल़ै ऐहा जंतरी ज़ोरै-ज़ोरै, ताकि तिधी सोभै तिन्नां सोभी गल्ला शुणें ज़ुंण बिधाता मुखा खोज़ी अर ज़ुंण मंऐं ताखा लिखणैं बझ़ैल़ी। ज़ुंण बी तिधी यहूदा मुल्खे नगरी-नगरी का आऐ दै हणैं, तिन्नां सोभी का लऐ तूह एता पहल़ी करै शणाऊंईं। ताकि तिंयां शुणें कि मंऐं बिधाता तिन्नां लै किज़ै आसा लाअ द करी ज़ांऊं मुंह तिन्नां प्रैंदै आपणअ आगी ज़िहअ रोश्श तिन्नां प्रैंदै काढणअ। तेखअ झ़ाणीं तिंयां मुंह सेटा लेर-पकार पाई अरज़ करे, अर हई सका कि तेखअ तिंयां आपणीं बूरी बाता छ़ाडी हेरे।”
नेरीओ शोहरू बारूक डेऊअ बिधाते भबनै अर तेऊ किअ तिहअ ई ज़िहअ मंऐं जेरमयाह गूरै तेऊ लै बोलअ त। तेऊ पहल़ी जंतरी का बिधाते सोभ गल्ला बाढै। ईंयां गल्ला हुई जोशिये शोहरू जेहोकीम राज़ेए राज़ा दी पांज़ूई साला पोशै। एरुशलेम बिधाते भबनै तै यहूदा मुल्खे हर नगरी का लोग आऐ दै अर नगरी दी थिऐ बिधाता खुश करना लै सोभ ब्रतू रहै दै। ज़ुंण बी तिधी बिधाते भबनै थिऐ, बारूक लागअ तिन्नां सोभी नदरी जंतरी पहल़दअ। तेऊ पहल़ी तिंयां सोभ गल्ला ज़ुंण बिधाते गल्ला मंऐं जेरमयाह तेऊ का खोज़ी ती। सह थिअ शापाने शोहरू गमर्याह काईथे खुडी ज़ुंण बिधाते भबनै नऊंईं प्रऊल़ी नेल़ प्रैंदा बाखा थिई।
राज़ दरबारै डेऊई पहल़ी सह जंतरी
बारूक त जंतरी पहल़दअ लागअ द, तिधी त गमर्याहो शोहरू अर शापानो पोचअ मिका शूणअ लागअ द, तेऊ शूणीं तिंयां गल्ला बाढै कि बिधाता किज़ै बोला। तेखअ डेऊअ सह राज़ेए मैहला लै उंधै काईथे खुडी लै। तिधी तै सोभ कार-करिंदै बेठै दै। तिधी त राज़ दरबारो काईथ एलीशामा, शमयाहो शोहरू दलाया, अकबोरो शोहरू एलनातान, शापानो शोहरू गमर्याह, हनन्याहो शोहरू सिदकिया अर होर सोभ कार-करिंदै बेठै दै। मिका खोज़ी तिन्नां का तिंयां सोभ गल्ला बाढै ज़ुंण तेऊ बारूक जंतरी का पहल़दअ शूणअ। तिन्नैं कार-करिंदै छ़ाडअ नेरीए शोहरू बारूका सेटा लै नतानियो शोहरू जेहूदी ज़ुंण शेलेमयाहो पोचअ अर कूशीओ पोचअ थिअ। तेऊ बोलअ बारूका लै, “ज़ुंण जंतरी तंऐं लोगा सेटा पहल़ी, तैहा आण आप्पू संघै संघा च़ाल्ल।” बारूक डेऊअ तिन्नां सेटा लै अर सह जंतरी बी निंईं तेऊ आप्पू संघा। कार-करिंदै बोलअ तेऊ लै, “धरनीं बेश, संघा शणांऊ हाम्हां का ऐहा जंतरी पहल़ी करै।” बारूक लागअ तिन्नां सेटा तैहा जंतरी का पहल़दअ।
ज़ांऊं बारूक पहल़ी मुक्कअ, तेता शूणीं छ़ुटअ तिन्नां डरै दर्छ़णअ अर तिंयां लागै एकी-दुजे मुंहैं भाल़ै। तिन्नैं बोलअ बारूका लै, “हाम्हां हुई ईंयां सोभ गल्ला राज़ै का खोज़णीं।” तेखअ बोलअ तिन्नैं बारूका लै, “तूह खोज़ हाम्हां का इहअ कि तंऐं ईंयां गल्ला किधा का लिखी? तंऐं ईंयां गल्ला जेरमयाह का शूणीं लिखी?”
बारूकै दैनअ तिन्नां लै ज़बाब, “ईंयां सोभ गल्ला खोज़ी मुखा जेरमयाह, सह रहअ बोल्दअ लागी हुंह रहअ एता सैही करै धरनीं जंतरी दी लिखदअ लागी।”
तेखअ बोलअ तिन्नैं कार-करिंदै बारूका लै, “ताह अर जेरमयाह हुअ ऐबै लुक्कणअ। तम्हैं रहै एही ज़ैगा लुक्की, कोही का निं लोल़ी थोघ लागअ कि तम्हैं किधी आसा।”
राज़ै पाई जंतरी दहई
तिन्नैं कार-करिंदै डाही सह जंतरी तिधी एलीशामा काईथे खुडी। तेखअ डेऊऐ तिंयां राज़ दरबारै राज़ै सेटा। तिधी खोज़ी तिन्नैं पठी गल्ला तेऊ का। तेखअ छ़ाडअ जेहूदी तैहा जंतरी आणदअ। तेऊ आणी सह एलीशामा काईथे खुडी का संघा पहल़ी सह तिधी राज़ै अर तिन्नां कार-करिंदै सेटा ज़ुंण तिधी राज़ै सेटा खल़्हुऐ दै थिऐ। ईंयां तै हिंऊंदे धैल़ै अर राज़अ त तेऊ मैहलै ज़ेथ सह हिंऊंदै रहा त। तिधी त सह आगी सेटा नैथदअ लागअ द। ज़ेतरी जेहूदी तैहा जंतरी का चअन-च़ार बरकै पहल़ी मुक्कअ, राज़ै पाई सह जंतरी छ़ूरी करै धेल़ी संघा शोटी सह तिधी आगी जैंदरी। सह रहअ तेता तेभै तैणीं धेल़दअ लागी ज़ेभै तैणीं सह आगी जैंदरी पठी दझ़ी निं मुक्की। राज़ै अर तिन्नैं कार-करिंदै शूणीं तैहा जंतरी दी लिखी दी सोभ गल्ला, पर तिन्नां मांझ़ै निं कोह डरअ नां तिन्नां मांझ़ै दुखा दी कुंणी आपणैं झिकल़ै धेल़ै। हाँ, एलनातान, दलाया अर गमर्याह किई ती राज़ै सेटा एही अरज़ बी कि ऐहा जंतरी निं धेल़ै आथी, पर तेऊ निं तिन्नां बाखा लै धैन ई दैनअ।
तेखअ किअ राज़ै आपणैं शोहरू जर्मेल, अजरीएले शोहरू सरयाह अर अबदीएले शोहरू शेलेमयाह लै हुकम, “जेरमयाह गूरा अर एऊए काईथ बारूका ढाका संघा डाहा कैद खानै पाई।” पर बिधाता डाहै हाम्हैं च़ोरी।
जेरमयाह लिखी होर जंतरी
ज़ांऊं जेहोकीम राज़ै सह जंतरी दहई पाई ज़ुंण मंऐं बारूका का लिखणैं बझ़ैल़ी ती, तेखअ बोलअ बिधाता मुल्है इहअ, “जेरमयाह, तूह लिख एही ई एक होर जंतरी, तेथ लिख तिन्नां सोभी गल्ला ज़ुंण तैहा पैहलकी जंतरी दी थिई, ज़ुंण यहूदे राज़ै जेहोकीमै दहई पाई। यहूदे राज़ै जेहोकीमा लै बी बोलै तूह इहअ कि हुंह बिधाता बोला ताल्है इहअ, ‘तंऐं पाई सह जंतरी आगी जैंदरी दहई! तंऐं बोलअ बारूका लै, “तंऐं इहअ किल्है लिखअ कि बाबेल देशो राज़अ एछणअ ज़रूर? तंऐं किल्है लिखअ कि तेऊ करनी अह ज़ैगा पठी एही बरैबाद कि तेऊ करनै ऐहा ज़ैगे मणछ अर डागै-चैणैं सोभ खतम?” ऐबै बोला हुंह बिधाता ताह जेहोकीमा लै ज़ुंण यहूदा मुल्खे राज़अ आसा! ताह बाद निं तेरै खिंबा का आजू कोह राज़ै दाबेदे राज़गाद्दी दी बेशणअ। तेरी ल्हास डाहणीं बागै धैल़ी धुप्पै जाम्हदी अर राची ओशा करै भिज़दी शोटी। ज़ुंण तंऐं, तेरी आद-लुआद अर तेरै कार-करिंदै पाप किऐ, तेता लै लणी मुंह तम्हां सोभी लै सज़ा दैई। तंऐं निं मेरी चतैनगी लै धैन दैनअ अर नां यहूदा मुल्ख अर राज़धानी एरुशलेम नगरीए परज़ा धैन दैनअ! ऐबै पाणीं मुंह तिंयां सोभै आफ़ता तम्हां प्रैंदै ज़ुंण मंऐं करनअ आसा सोठअ द।’”
तेखअ आणी मंऐं जेरमयाह एक होर जंतरी संघा दैनी मंऐं आपणैं काईथ बारूका का ज़ुंण नेरीओ शोहरू थिअ। तेखअ लिखी तैहा नऊंईं जंतरी तिंयां सोभै गल्ला पठी ज़ुंण तैहा पैहलकी जंतरी दी थिई ज़ुंण यहूदा मुल्खे राज़ै जेहोकीमै दहई पाई ती।
Source notes (1)
- Cross-reference 2 राज़. 24:1; 2 इति. 36:5-7; दान. 1:1-2
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.