Kulvi Outer Seraji Bible
जेरमयाह 41
गदाली लै द्रोह
तैहा साला शऊजै हुअ इहअ कि इशमाईल, नतानियो शोहरू एलीशामो पोचअ थिअ राज़ेए खिंबा का राज़ेए कार-करिंदै मांझ़ै एक, सह डेऊअ आपणैं दस आदमी संघा निंईं आहीकामे शोहरू राज़पाल गदाली सेटा मिज़पा नगरी। तिधी बेठै तिंयां सोभ बैल़ी रोटी खांदै कठा, नतानियो शोहरू इशमाईल अर तेऊ संघै तिंयां दस ज़ण्हैं सपाही उझ़ुऐ खल़ै अर आहीकामो शोहरू शापानो पोचअ गदाली ज़ुंण बाबेल देशे राज़ै यहूदा मुल्खो राज़पाल त बणाअं द, सह पाअ तिन्नैं तलबारा करै मारी। गदाली संघै मिज़पा नगरी ज़ेतरै बी यहूदी मणछ अर बाबेल देशे सपाही थिऐ, तिंयां बी पाऐ इशमाईल अर तेऊए आदमी सोभ मारी।
दुजै धैल़ै दोत्ती ज़ेतरी कहा का थोघ लागणअ त कि गदाली पाअ मारी, अश्शी मणछ आऐ शकेम, शिलोह अर सामरी का। तिन्नैं तै आपणीं दाल़्ही-मुछ़ा पठी छाम्बी दी, झिकल़ै तै धेल़ै दै अर घेरी ती क्रिंज़ा पाई दी संघा तै हाथै नाज़ बल़ी अर लोवान लई बिधाते भबना बाखा लै हांढदै लागै दै। नतानियो शोहरू इशमाईल डेऊअ मिज़पा का तिन्नां सेटा लै, संघा लागअ तिन्नां सेटा पुजी लेरा लाई इहअ बोल्दअ, “ज़ीबाण, तम्हैं च़ाल्ला आहीकामे शोहरू गदाली सेटा।”
ज़ेतरी तिंयां नगरी भितरी पुजै, नतानियो शोहरू इशमाईल अर तेऊए आदमी पाऐ तिंयां मारी अर तिन्नें ल्हासा डाही कुहै दी शोटी। तिन्नां मांझ़ै लागै दस आदमी इशमाईला लै इहअ बोल्दै, “ज़ीबाण, हाम्हां निं मारै आथी! हाम्हैं आसा कणक, ज़ौ, जैतूनो तेल अर मखीर खेचै च़ोरी डाहअ द।” तेखअ निं तेऊ तिंयां तिन्नां होरी संघै मारै आथी। ज़हा कुहै दी नतानिये शोहरू इशमाईलै तिन्नां मणछे ल्हासा गदाली संघै शोटी ती, सह थिअ खास्सअ डुघअ। सह कुहअ थिअ आसाह राज़ै तधू खण्हअ द ज़धू इज़राईले राज़ै बाशा यहूदा संघै जुध छ़ेल़अ त। नतानिये शोहरू इशमाईलै डाहअ सह ल्हासा करै भरी।
तेखअ किऐ नतानिये शोहरू इशमाईलै राज़ेए देई अर होर मणछ कैद ज़ुंण मिज़पा नगरी बच़ै दै थिऐ ज़ुंण बाबेल देशे सैनापति नबूज़रदानै आहीकामे शोहरू गदाली का थिऐ सभाल़ै दै। तिंयां निंयैं इशमाईलै सोभ कैद करी आप्पू संघै संघा डेऊअ अमोन नगरी बाखा लै।
ईंयां सोभ गल्ला हेरी कुंणी कोराहे शोहरू जोहनान अर होर कार-करिंदै अर सैनापति ज़ुंण तेऊ संघै थिऐ, तिन्नां का हेरअ कुंणी खोज़ी कि नतानिये शोहरू इशमाईलै किअ इहअ ज़ुल्म। तिन्नैं झाल़ै आपणैं सोभ आदमी संघा किअ नतानिये शोहरू इशमाईलो पिछ़अ। तिन्नैं हेरअ सह गबोन बडी कोफरी सेटा ठिमकी। इशमाईला संघै तै खास्सै आदमी। तिन्नैं हेरै कोराहो शोहरू जोहनान अर तेऊ संघै तिंयां होर कार-करिंदै अर सैनापति एछदै भाल़ी। तिन्नां भाल़ी हुऐ तिंयां खुश ज़ुंण इशमाईलै ज़ोरा-ज़ोरी आप्पू संघै कैद करी निंयैं तै, ज़ेतरै लोग इशमाईलै मिज़पा का कैद करी निंयैं थिऐ, तिंयां फिरै तेऊ सेटा का पिछ़ू संघा ठुर्है कोराहे शोहरू जोहनाना सेटा लै। पर नतानियो शोहरू इशमाईल अर तेऊ संघै आठ आदमी छ़ुटै जोहनाना का अर तिंयां ठुर्है अमोन नगरी लै।
तेखअ निंयैं कोराहे शोहरू जोहनान अर तिन्नैं सैनापति तिंयां सोभ मर्ध-बेटल़ी, शोहरू-शोहरी अर सोभ गुंझी नतानिये शोहरू इशमाईला का छ़ड़ैऊई गबोन बडी कोफरी सेटा का आप्पू संघै ज़ुंण मिज़पा नगरी आहीकामे शोहरू गदाली मारनै का बाद ज़िऊंदै थिऐ बच़ै दै। तिधा का लागै तिंयां हांढदै बैल़ी रहै तिंयां बेतलेम नेल़ किमहाम नाओंए सराईं दी। तिधा का थिऐ तिंयां मिसर देशा लै च़ाल्लै दै। तिंयां थिऐ कसदी लोगा का खास्सै डरै दै किल्हैकि नतानिये शोहरू इशमाईलै पाअ त आहीकामो शोहरू गदाली मारी ज़ुंण बाबेल देशे राज़ै यहूदा मुल्खो राज़पाल त डाहअ द।
Source notes (1)
- Cross-reference 2 राज़. 25:25
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.