Kulvi Outer Seraji Bible
जेरमयाह 28
हनन्याह गूरे झ़ुठी गल्ला
तैहा ई साला, यहूदा मुल्खै त सिदकिया राज़अ, तेऊए राज़ा दी च़ौथी साला शाऊंणै लागअ गबोन नगरीए अजूरो शोहरू हनन्याह गूरै बोलअ बिधाते भबनै प्रोहत अर सोभी लोगा नदरी मुल्है इहअ, “स्वर्गे सारी सैनो मालक बिधाता ज़ुंण इज़राईलो परमेशर आसा, तेऊ खोज़अ मुखा इहअ, ‘मुंह पाणअ बाबेल देशे राज़ेए गलामीओ जूँ चोल़ी। ज़ुंण मेरै भबने खज़ानै अर चाण-भांडै राज़ै नबूकदनेसरै बाबेल देशा लै च़की निंयैं, तिंयां पजैल़णैं मुंह दूई साला भितरी इधी ऐहा ई ज़ैगा बापस। यहूदा मुल्खे जेहोकीम राज़ैओ शोहरू जकोनया बी पजैल़णअ मुंह तिन्नां कार-करिंदै अर सोभी परज़ा संघी बापस ज़ुंण बाबेल देशा लै कैद करी गलाम आसा बणाऐं दै। मुंह पाणअ बाबेल देशे राज़ेए गलामीओ जूँ चोल़ी। अह गल्ल डाही मंऐं बिधाता बोली।’”
तेखअ बोलअ मंऐं जेरमयाह तिधी सोभी प्रोहत अर तिधी तिन्नां सोभी लोगा नदरी हनन्याह गूरा लै ज़ुंण तिधी बिधाते भबनै तै खल़्हुऐ दै, मंऐं बोलअ हनन्याह लै, “हनन्याह, एवमस्तू! ज़ाथी लोल़ी इहअ ई हुअ! बिधाता लोल़ी त इहअ ई किअ! ईंयां गल्ला लोल़ी ती एही निभी, ज़िहअ तूह बोल्दअ आसा लागअ द कि आजू हणअ इहअ। बिधाता लोल़ी तै आपणैं भबनो खज़ानअ अर सोभ चाण-भांडै बाबेल देशा का बापस आणै अर तिंयां सोभ लोग बी लोल़ी तै ऐहा ज़ैगा बापस पजैल़ै ज़ुण कैद करी दूर आसा निंयैं दै। पर तूह डाह मेरी एक गल्ल शूणीं, इधी सोभी लोगा लै बी बोला हुंह कि मेरी गल्ल शूणां कि हुंह किज़ै बोला। आझ़ा का पैहलै बी ज़ुंण गूर मुखा अर ताखा आजी हुऐ, तिन्नैं बी खोज़ी ती आपणैं ज़मानै बडै-बडै महान देश अर बडै-बडै राज़ा लै एही गल्ला कि आजू हणैं जुध, देशै पल़णै नकाल़ अर माहा मरी एछणी। पर ज़ै कुंण गूर इहअ खोज़ा, ‘आजू हणीं शांती,’ ज़ै असली दी आजू तिहअ ई निभे; तै ज़ाणनअ इहअ कि सह गूर आसा बिधाता छ़ाडअ द।”
तेखअ ज़ुंण जूँ मंऐं जेरमयाह आपणैं कैल़ै थिअ जोची डाहअ द, सह काढअ हनन्याह गूरै मेरै कैल़ै का पोर्ही संघा पाअ चोल़ी, तेखअ लागअ हनन्याह गूर सोभी लोगा नदरी इहअ बोल्दअ, “बिधाता बोला इहअ, ‘इहअ ई पाणअ मुंह बाबेल देशे राज़ै नबूकदनेसरे गलामीओ जूँ चोल़ी। दूई साला का आजी हेरनअ मुंह अह गलामीओ जूँ सोभी देशे कैल़ै का पोर्ही काढी।’” इना गल्ला शूणीं लागअ हुंह तिधा का हांढदअ।
इना एही गल्ला हणैं का थोल़ै धैल़ै बाद बोलअ बिधाता मुल्है इहअ, “जेरमयाह, तूह डेऊ हनन्याह गूरा सेटा संघा बोल तेऊ लै इहअ, ‘बिधाता बोला ताल्है इहअ, “तूह सका काठो जूँ चोल़ी, पर मंऐं बणाअं एते ज़ैगा ऐबै लोहेओ जूँ।” हुंह स्वर्गे सारी सैनो मालक बिधाता, इज़राईलो परमेशर बोला इहअ कि इना देशे कैल़ै पाणअ मुंह लोहेओ जूँ। ईंयां करनै मुंह बाबेल देशे राज़ै नबूकदनेसरे गलाम। इना लागणीं तेऊए च़ाकरी करनी। हुंह बिधाता बोला कि बणें ज़ीबा बी करनी राज़ै नबूकदनेसरे च़ाकरी।’”
मंऐं जेरमयाह खोज़ी ईंयां गल्ला हनन्याह गूरा का, मंऐं बोलअ तेऊ लै इहअ बी, “हनन्याह! तूह निं बिधाता आथी छ़ाडअ द, तंऐं पाऐ ईंयां लोग धोखै दी। लोगै किअ तेरी झ़ुठी गल्लो भरोस्सअ। ऐबै बोला बिधाता ताल्है इहअ, ‘तूह निं मुंह ऐबै ऐहा पृथूई दी डाहणअ आथी, ऐहा साला मुक्कणैं का आजी जाणअ तूह मरी किल्हैकि तंऐं पाऐ लोग मुंह बिधाता का कबाता।’”
ज़िहअ बिधाता बोलअ थिअ, हनन्याह गूर मूंअ दूई भिन्नैं बाद तैहा ई साला शऊजै।
Source notes (1)
- Cross-reference 2 राज़. 24:18-20; 2 इति. 36:11-13
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.