Kulvi Outer Seraji Bible
जेरमयाह 27
जेरमयाह पाअ आपणैं कैल़ै जूँ
ज़धू जोशियो शोहरू सिदकिया यहूदा मुल्खो राज़अ बणअ, तेऊओ राज़ शुरू हंदी ई बोलअ बिधाता मुल्है इहअ,
“जेरमयाह, एक जूँ बणा तूह संघा जोच तेऊ तेते शांभै दी जोच लाई आपणैं कैल़ै। तेखअ लिख तूह एक समाद एदोम, मोआब, अमोन, सूर अर सदोन नगरीए राज़ै लै। तेऊ समादा दैऐ तिन्नें दूते हाथै ज़ुंण राज़धानी एरुशलेम यहूदा मुल्खे राज़ै सिदकिया सेटा आसा आऐ दै। तूह दैऐ तिन्नां दूते राज़ै लै इहअ लिखी नढैऊऐ बोलै तिन्नां लै कि स्वर्गे सारी सैनो मालक बिधाता ज़ुंण इज़राईलो परमेशर आसा, सह बोला इहअ, ‘आपणैं-आपणैं मालका का खोज़ै कि बिधाता बोला इहअ, “मंऐं आसा आपणैं महान बल अर ज़ोरा करै सारअ भ्रमंड बणाअं द, संसारे मणछ, सोभ ज़ीब ज़ुंण पृथूई दी आसा बस्सै दै, तिंयां बी आसा मंऐं ई बणाऐं दै। ज़हा लै हुंह च़ाहा हुंह दैआ आपणीं इना च़िज़ा तिन्नां लै। सह आसा हुंह ज़ुंणीं इना देशा प्रैंदै आपणैं दास बाबेल देशे राज़ै नबूकदनेसरा लै राज़ दैनअ, मंऐं किअ इहअ कि बणें ज़ीबा प्रैंदै बी हणअ तेऊओ राज़। सोभी देशा करनी तेऊए च़ाकरी। ज़ेभै तैणीं तेऊए देशो राज़ खतम हणैंओ बगत निं एछे, तेभै तैणीं रहणअ इना सोभी देशा प्रैंदै आजू तेऊए शोहरू अर पोचैओ बी राज़। तेता बाद करनअ बडै-बडै देशा अर महान राज़ै बाबेल देशा प्रैंदै राज़।”
“‘पर ज़ै कुंण देश अर राज़ बाबेल देशे राज़ै नबूकदनेसरे च़ाकरी नांईं करे, तिंयां ज़ै तेऊओ जूँ आपणैं कैल़ै नांईं पाण दैए, तेऊ देशा लै पाणीं मुंह जुधे तलबार, नकाल़ अर माहा मरी। ईंयां गल्ला रहणीं तिन्नां लै तेभै तैणीं पल़ी ज़ेभै तैणीं कि सह देश पठी खतम निं होए। अह गल्ल डाही मंऐं बिधाता बोली।
“‘तम्हैं निं आपणैं इना गूरे गल्ले ज़ाणैं लागी अर नां इना मणशाण झ़ैऊंणै आल़ेए गल्ला शूणीं। नां तम्हैं डांऊं-च़ेल्लै बाखा धैन दैई अर नां तिन्नें गल्ला मनी ज़ुंण तम्हां का धैनै-सुपनै हुई दी गल्ला खोज़ा। ईंयां सोभ बोला तम्हां लै इहअ, “तम्हां निं बाबेल देशे राज़ेए गलामी कधि लागणीं करनी!” ईंयां आसा झ़ुठी गल्ला खोज़ी तम्हां ठगदै लागै दै, ज़ै तम्हैं इने शुणें, तम्हैं शोटणै हेरै थारै आपणैं देशा का दूर। मुंह काढणैं तम्हैं आप्पै दूर अर तेखअ हणैं तम्हैं पठी खतम। पर ज़ुंण देश बाबेल देशे राज़ैओ जूँ आपणैं कैल़ै जोचणा लै तैर होए अर तेऊए गलाम हई तेऊए च़ाकरी करे, तेऊ देशा दैणअ मुंह तिन्नें आपणीं ज़ैगा बस्सी रहणैं कि तिंयां आपणैं खेचै बाही-बऊई करै ज़िऊंदै रहे। अह गल्ल डाही मंऐं बिधाता बोली।’”
मंऐं दैनअ यहूदा मुल्खे राज़ै सिदकिया लै इहअ समाद, “आपणीं परज़ा संघी जोछू ऐबै बाबेल देशे राज़ै नबूकदनेसरे गलामीए जूँआं हेठै। तूह कर तेऊए अर तेऊए लोगे च़ाकरी, तै रहणअ तूह ज़िऊंदअ। ज़ोरा-ज़ोरी किल्है शाचअ ताह अर तेरी परज़ा जुधे तलबारा, नकाल़ अर माहा मरी करै मरनअ? बिधाता बोलअ आप्पै इहअ कि ज़ुंण बाबेल देशे राज़े गलामी नांईं मने तिन्नें हणीं एही दशा। तिन्नां गूरे ज़ाणैं निं लागी ज़ुंण ताल्है इहअ बोला, ‘ताह निं बाबेल देशे राज़े गलामी कधि पल़णीं करनी।’ तिंयां आसा ज़ाथी झ़ुठअ बोल्दै अर ताह धोखै दी पांदै लागै दै। बिधाता बोलअ तिन्नें बारै आप्पै इहअ, ‘ईंयां निं मंऐं आथी छ़ाडै दै, तिंयां आसा मेरै नाओंऐं झ़ुठी गल्ला खोज़दै लागै दै। तैही लाऐ मंऐं तम्हैं ऐहा ज़ैगा का दूर काढी अर तम्हैं मरनै पठ अर तिहै ई हाल हणैं इना गूरे ज़ुंण ताखा इना एही झ़ुठी गल्ला खोज़दै आसा लागै दै।’”
तेखअ खोज़अ मंऐं सोभी प्रोहत अर सोभी आम लोगा का बिधातो समाद। मंऐं बोलअ इहअ, “बिधाता बोला तम्हां लै इहअ, ‘ज़ुंण गल्ला ईंयां गूर तम्हां का खोज़ा, तेते ज़ाणैं निं लागी। तिंयां बोला तम्हां लै इहअ, “बाबेल देशा का जाणैं बिधाते भबने चाण-भांडै बापस फिरी।” इने ईंयां गल्ला आसा ज़ाथी पठ झ़ुठी! तम्हैं निं इने गल्ला शुणदै लागी! तम्हैं मना बाबेल देशे राज़े गलामी; तै बच़णैं तम्हैं ज़िऊंदै! अह नगरी किल्है शाची तम्हां एही उज़र करनी ज़ेथ सिधी पात्थरे डिंगरी बच़े? ज़ै तिंयां असली दी मेरै गूर आसा, अर ज़ै तिंयां असली दी तिंयां मेरअ समाद खोज़दै आसा लागै दै, तै करदै तिंयां मुंह स्वर्गे सारी सैने मालक बिधाता सेटा अरज़ कि ज़ुंण चाण-भांडै अर खज़ानै एरुशलेम मेरै भबना दी अर यहूदा मुल्खे राज़ेए मैहलै अज़ी बच़ै दै आसा, तिंयां निं बाबेल देशा लै लोल़ी निंयैं।
“‘ज़धू बाबेल देशे राज़ै नबूकदनेसरै जेहोकीम राज़ैओ शोहरू यहूदा मुल्खो राज़अ जकोनया अर यहूदा मुल्ख अर राज़धानी एरुशलेम नगरी का तेऊए कार-करिंदै कैद करी निंयैं, तेऊ छ़ाडै तधू कांस्से थाम्ह, कांस्से बडै-बडै हांडै; गाड्डै अर मेरै भबने खज़ानै दी कई चाण भांडै इधी।
“‘ऐबै शूणां तम्हैं कि हुंह स्वर्गे सारी सैनो मालक बिधाता इज़राईलो परमेशर तिन्नां चाण-भांडे बारै किज़ै बोला ज़ुंण यहूदा मुल्खे राज़धानी एरुशलेम मेरै भबनै अर राज़ेए मैहलै पिछ़ू आसा बच़ै दै। तिंयां निंणै ऐबै सोभ बाबेल देशा लै अर तिंयां रहणैं तेभै तैणीं तिधी, ज़ेभै तैणीं मुंह तिन्नें भिई आद निं फिरे। तेखअ आणनैं मुंह तिंयां बापस संघा डाहणैं तिंयां तिधी ज़िधी तिन्नें ज़ैगा आसा। अह गल्ल डाही मंऐं बिधाता बोली।’”
Source notes (1)
- Cross-reference 2 राज़. 24:18-20; 2 इति. 36:11-13
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.