Kulvi Outer Seraji Bible
जेरमयाह 26
जेरमयाह गूरे पेशी
यहूदा मुल्खै बणअ जोशियो शोहरू जेहोकीम राज़अ, तेऊओ राज़ शुरू हंदी पुजअ मुंह जेरमयाह सेटा बिधातो समाद। बिधाता बोलअ मुल्है इहअ, “मेरै भबने खोल़ै खल़्हुई खोज़ तिन्नां सोभी गल्ला ज़ेतो मंऐं ताल्है हुकम किअ कि तिन्नां खोज़ै यहूदा मुल्खे सोभी नगरीए लोगा का ज़ुंण तिधी मुंह सेटा माथै टेक्कदै एछा। ज़ाथी निं मेरअ एक बैण बी खोज़णैं बाझ़ी छ़ाडी। तै झ़ाणीं यहूदा मुल्खे मणछ शुणें अर तिंयां कदुष्ट काम करनै छ़ाडी हेरे। ज़ै तिंयां इहअ करे, तै निं मुंह तिन्नां लै सह आफ़त पाणीं, ज़िहै मंऐं तिंयां तिन्नें पापी कामां पिछ़ू पठी बरैबाद आसा लाऐ दै करी।
“तिन्नां लै बोलै तूह इहअ, ‘बिधाता बोला तम्हां लै इहअ कि ज़िहअ हुंह बोला तिहअ शूणां, ज़ुंण बधान मंऐं तम्हां लै आसा दैनअ द, तेते साबै ज़िऊआ ज़िन्दगी। ज़ुंण मेरै दास गूर तम्हां का मेरी गल्ला खोज़ा, तिन्नां बी शूणां कि किज़ै बोला। ज़हा हुंह तम्हां सेटा लै छ़ाडी करा। पर तम्हैं निस्सै तिन्नों धख ज़िहअ बी शूणीं। 2ज़ै तम्हैं इहै ई नशूण रहे, तै करनअ मुंह हेरे एऊ भबना लै तिहअ ई ज़िहअ मंऐं मेरी शिलोह नाओंए ज़ैगा लै किअ त। तेखअ काढणअ सोभी देशे लोगा एरुशलेम नगरीओ नाअं सिधअ फिटक दैणा लै।’”
ज़ेभै हुंह जेरमयाह बिधाते भबनै इना गल्ला खोज़दअ त लागअ द, तेभै तै सोभै प्रोहत, गूर अर तिधी आऐ दै सोभ लोग शूणैं लागै दै। ज़ेतरी हुंह इना सोभी गल्ला खोज़ी मुक्कअ ज़ेतो खोज़णेंओ बिधाता मुल्है हुकम त किअ द, तेतरी हेरअ हुंह तिधी तिन्नैं प्रोहत अर गूरै अर होरी लोगै ढाकी संघा बोलअ तिन्नैं हाक्का-भ्रुंगा पाई, “ऐहा गल्ला पिछ़ू पाणअ तूह हाम्हां मारी ई! तंऐं किल्है बोली ईंयां गल्ला बिधाते नाओंऐं? ताह किहअ करै हुई इहअ बोल़णें हिम्मत कि बिधाते ऐहा पबित्र ज़ैगो हाल हणअ शिलोह ज़िहअ? तूह किहअ करै सका बोली कि अह नगरी हणीं उज़र अर पठ शुन्नीं?” तेखअ झाल़्हुऐ तिधी बिधाते भबनै आऐ दै सोभ लोग मुंह जेरमयाह फेर।
ज़ांऊं यहूदा मुल्खे कार-करिंदै का थोघ लागअ कि इहअ-इहअ हुअ, तिंयां डेऊऐ राज़ेए मैहलै का बिधाते भबना लै। संघा रहै तिधी नऊंईं प्रऊल़ी सेटा बैठक। तेखअ लागै सोभ प्रोहत अर गूर तिन्नां कार-करिंदै का गल्ला खोज़दै, “अह मणछ आसा मारना ई लै, अह आसा एही गल्ला खोज़दअ कि अह नगरी हणीं आजू पठी बरैबाद। तम्हैं हेरी तिंयां गल्ला आपणैं कानै शूणीं।”3
तेखअ बोलअ मंऐं सोभी कार-करिंदै लोगा लै इहअ, “ज़ुंण तम्हैं हुंह एऊ भबना अर ऐहा नगरीए बारै बोल्दअ शूणअ, तेता खोज़दअ छ़ाडअ हुंह बिधाता आप्पै। तैही हुअ तम्हां आपणैं च़ाल-च़लणा दी सदेर करनअ। तिहअ करा ज़िहअ थारअ परमेशर बिधाता बोला। ज़ै तम्हैं इहअ करे, तै झ़ाणीं सह तैहा आफ़ता पाणै का पिछ़ू हटी जाए बिधाता बोलअ कि तेऊ करनअ इहअ। रही मेरी गल्ल, हुंह आसा इधी थारै हाथै! थारअ ज़िहअ दिल बोला अर ज़िहअ तम्हां का भलअ ज़ाण्हिंआं तम्हैं करा मुंह संघै तिहअ। पर एक गल्ल लआ तम्हैं शूणीं, ज़ै तम्हैं मुंह मारी पाए, तम्हां अर ऐहा नगरी लागणअ तेतो दोश किल्हैकि मेरअ निं किछ़ कशूर आथी। किल्हैकि सह आसा बिधाता ज़ुंणी तम्हां सेटा हुंह एही चतैनगी दैंदअ छ़ाडअ।”
तेखअ बोलअ तिन्नैं कार-करिंदै अर तिधी होरी लोगै तिधी प्रोहत अर सोभी गूरा लै, “एऊ मणछा लै निं हाम्हैं मौते सज़ा दैई सकदै, एऊ किई हाम्हां सेटा म्हारै परमेशर बिधाते नाओंऐं गल्ला।”
तेखअ उझ़ुऐ सैणैं मांझ़ै कई मणछ खल़ै संघा लागै लोगा लै बोल्दै ज़ुंण तिधी फेर तै झाल़्हुऐ दै, “ज़धू हिजकिया यहूदा मुल्खो राज़अ थिअ, तधू खोज़ी ती मोरेशेत नगरीए मिका हाम्हां सोभी यहूदी का एही गल्ला, ‘स्वर्गे सारी सैनो मालक बिधाता बोला इहअ कि आजू हणअ इहअ,
“सियोन बणाणीं बाहै दै खेचा ज़ेही,
एरुशलेम हणीं एही उज़र कि तेथ रहणीं सिधी पात्थरे डिंगरी,
अर बिधातो भबन हणअ झ़ंहर-झ़ाकल़।”’4
“राज़ै हिजकिया अर कोही यहूदी निं मिका तैहा गल्ला खोज़णैं पिछ़ू मारअ। हथू किअ हिजकिया बिधाते तैहा गल्लो अदर, सह रहअ किहअ नां किहअ करै बिधाता खुश करदअ लागी। तेखअ बच़ाऊई बिधाता एरुशलेम नगरी अर बिधाता निं तेखअ सह आफ़त पाई ज़िहअ बिधाता बोलअ त कि तेऊ करनीं इहअ करै सह बरैबाद। इहअ करै लाई हाम्हैं आप्पू लै आप्पै घोर आफ़त पाई!”
एक त होर मणछ शमयाहो शोहरू उरियाह, सह थिअ किर्यात-ज़रीम नगरी का, तेऊ बी बोली ती ऐहा नगरी अर एऊ देशे बारै एही ई गल्ला ज़िहअ अह जेरमयाह आसा बोल्दअ लागअ द। ज़ांऊं यहूदा मुल्खे राज़ै जेहोकीम, तेऊए सपाही अर कार-करिंदै का थोघ लागअ कि उरियाह आसा इहअ बोल्दअ लागअ द, राज़अ त तेऊ मारना लै ताखुअ द, पर उरियाह का गअ थोघ लागी अर सह डेऊअ डरै मारै मिसर देशा लै ठुर्ही। जेहोकीम राज़ै छ़ाडै अकबोरो शोहरू एलनातान अर तेऊ संघै होर कई आदमी मिसर देशा लै कि तिंयां उरियाह बापस आणदै। तिन्नैं पजैल़अ उरियाह मिसर देशा का जेहोकीम राज़ै सेटा बापस अर तेऊ पाअ सह मारी अर तेऊए ल्हास डाही तेऊ मल्थानै शोटी ज़िधी आम मणछ आपणैं मुल्दै दाबा।
पर तिधी त शापानो शोहरू आहीकाम, तेऊ दैनअ मेरअ साथ, तेऊ निं मुंह तिधी लोगे हाथै दैणैं दैनअ अर इहअ करै निं तिधी मेरी हत्या हुई।
Source notes (4)
- Cross-reference 2 राज़. 23:36—24:6; 2 इति. 36:5-7
- Cross-reference ज़ैह. 18:1; भज. 78:60; जेर. 7:12-14
- Cross-reference शधा. 6:11-14
- Cross-reference मिक. 3:12
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.