Kulvi Outer Seraji Bible
जेरमयाह 18
खमार अर माट्टअ
बिधाता दैनअ मुंह जेरमयाह लै इहअ समाद, “जेरमयाह, तूह डेऊ उंधै खमारे घअरा लै, तिधी खोज़णअ मुंह ताखा आपणअ समाद कि लोगा का किज़ै खोज़णअ।” हुंह डेऊअ उंधै खमारे घअरा लै, तिधी भाल़अ मंऐं कि खमार आसा थरेटा प्रैंदै किज़ू बणाऊंदअ लागअ द। ज़हा माट्टे भांडै सह बणाऊंदअ त लागअ द, सह निं तिहअ बणअ ज़िहअ सह च़ाहा त, तेऊ बणाअं तेऊ ई माट्टे गारी करै किज़ै होर भांडअ ज़िहअ तेऊओ दिल बोलअ तिहअ।
तेखअ बोलअ बिधाता मुल्है इहअ, “इज़राईलीओ, ज़िहअ एऊ खमारै किअ, हुंह सका तम्हां संघै ज़ाथी तिहअ ई करी, माट्टे गार आसा खमारे हाथै। इज़राईलीओ! तिहै ई आसा तम्हैं मेरै हाथै।1 ज़ै केभै बी हुंह इहअ च़ाहूं कि तम्हैं पेच़णैं मुंह गोधी का, ज़ै हुंह ढोल़णअ च़ाहूं, देश अर राज़ खतम करनअ च़ाहूं, तेखअ ज़ै सह देश ज़हा लै मंऐं इहअ करनअ सोठअ, ज़ै सह देश पाप करनै का पिछ़ू हटे, तेखअ निं मुंह तिहअ करनअ ज़िहअ मंऐं बोलअ त कि मंऐं लाअ इहअ करी। दुजी बाखा आसा एही गल्ल, ज़ै हुंह इहअ बोले कि मंऐं लाअ कोई देश बणाईं अर रोही, तेखअ ज़ै सह देश मेरअ हुकम नांईं मने अर पाप करे, तै निं मुंह तेऊ देशा लै तिहअ करनअ ज़िहअ मंऐं तेता लै बोलअ त।
“ऐबै खोज़ तूह यहूदी अर एरुशलेम नगरीए लोगा का इहअ कि हुंह बिधाता बोला तम्हां लै, ‘भाल़ा! हुंह आसा थारै बारै सोठदअ लागअ द कि मुंह किज़ै करनअ। तम्हां लै लाई मंऐं आफ़त दैई पल़णै। तम्हां मांझ़ै हुअ एकी-एकी पापी ज़िन्दगी ज़िऊंणीं छ़ाडणीं। तम्हां हुई कदुष्ट अर पापी काम करने छ़ाड़ पाणीं।’
“तिन्नां दैणअ ताल्है इहअ ज़बाब, ‘इहअ निं हई सकदअ, हाम्हां रहणअ ज़िहअ म्हारअ दिल बोला तिहअ ई करदै लागी। ज़िहअ म्हारै कदुष्ट अर हठू मन्नैं आसा सोठअ द, हाम्हां करनअ तिहअ ई।’”
लोगै निं बिधाते चतैनगी दी धैन दैनअ
तैही बोलअ बिधाता इहअ,
“सोभी देशा का पुछ़ एक सुआल, तिन्नां का पुछ़ इहअ,
‘तम्हां मांझ़ै कधू कुंणी शूणअ कि आझ़ा का पैहलै हुई एही गल्ला?
इज़राईली मणछै किई एही डरैऊंणी गल्ला कि
तेता शूणीं उंगरै घेरीए शराल़ बी।
लाबानोन बणें धारा कै कधू हिंऊंआं बाझ़ी एही रही?
इना ठांढी दारा का कधू पाणींए गाडा शुक्की? ज़ाथी निं कधि शुक्की!’
पर मेरी परज़ा बिस्सरअ हुंह पठी। तिंयां ज़ाल़ा ऐबै बृथा मुहुर्ती सेटा धूप!
तिन्नां लागै तैहा बाता बदल़ ज़ेथ तिन्नां हांढणअ लागा!
ज़ुंण असली पराणीं बात आसा, तेथ निं तिंयां ऐबै हांढदै!
तिंयां लागै ऐबै नऊंईं लाई दी बाता हांढदै।
तिन्नैं बणाअं अह देश डरैऊंणी च़िज़े ज़ैगा,
लोगा करनी अह ज़ैगा सदा सुहांगा लै।
एसी बाती एछदै-नांहंदै हणैं एता भाल़ी रहैन हई,
तिंयां लागणै आपणीं मुंडकी झ़ल़ाऊंदै।
मुंह छिंगणी मेरी परज़ा तिन्नें दुशमणा जैंदरी
ज़ेही पुर्बा बाखे बागरी करै धूल़अ-माट्टअ छिंघिआ।
तिन्नां बाखा डाहणीं मुंह पिठ फरेऊई,
ज़ेभै तिन्नां लै आफ़त पल़णीं, तेभै डाहणैं मुंह तिंयां शोटी।”
लोगै आणअ जेरमयाह हारी-मारी
तेखअ लागै लोग इहअ बोल्दै, “हाम्हां करनअ जेरमयाह लै किज़ै कबध! हाम्हां का आसा बधान सखाऊंणै आल़ै होर बी बतेर्है प्रोहत। अक्ली आल़ै मणछ बी आसा हाम्हां का बतेर्है ज़ुंण सलाह सका दैई। बिधातो समाद खोज़णैं आल़ै गूर बी आसा हाम्हां का होर बी। च़ाल्ला, हाम्हां बोल़णअ तेऊए बारै कि अह निं ठीक आथी। एऊए निं कोही गल्ला दी धैन दैआ।”
मंऐं किई बिधाता सेटा एही अरज़,
“हे बिधाता, मेरी गल्ला दी दै धैन, तूह शुण कि मेरै दुशमण मुल्है किज़ै बोला!
ज़ुंण मंऐं भलअ किअ, तेते बदल़ै कै मुल्है बूरअ बभार लोल़ी हुअ?
तज़ी बी आसा तिंयां मुल्है खात्ती खण्हदै लागै दै कि हुंह तेथ पल़े!
तूह कर तैहा गल्ला आद कि हुंह रहअ तिन्नें तैणीं ताह सेटा अरज़ करदअ लागी,
ताकि तेरअ रोश्श तिन्नां प्रैंदा का दूर होए।
पर बिधाता, ऐबै बोला हुंह इहअ कि तिन्नें लान्हैं-सुन्हैं लोल़ी भुखै मूंऐं,
आप्पू लोल़ी तिंयां जुधा दी तलबारा करै मारी पाऐ।
तिन्नें बेटल़ी लोल़ी बिधबा हुई अर तिन्नें लोल़ी अत्री हुई।
तिन्नें मर्ध लोल़ी नबिज़री बमारी करै मूंऐं अर
तिन्नें खारकै ज़ुआन शोहरू लोल़ी जुधा दी तलबारा करै मारी पाऐ।
नच़ानक लोल़ी तिन्नें दुशमण तिन्नां लै चुटी पल़ै।
तिन्नें घअरै लोल़ी मखाण पल़अ द शुण्हुंअ।
तिन्नैं आसा मुल्है खात्ती डाही दी खण्हीं कि हुंह तेथ बधल़िए,
तिन्नैं आसा मुंह ढाकणा लै ज़ैगै-ज़ैगै ज़ज़ाल़ डाहै दै छ़ैई।
पर हे बिधाता, ताखा आसा तिन्नें सोभी गल्लो थोघ कि
तिन्नैं आसा मुंह मारना लै जोग किअ द।
तूह निं तिन्नें पाप अर ज़ुल्म माफ करी। तिन्नां शोट हारी-मारी धरनीं,
रोश्शै कर तिन्नां संघै इहअ ई बभार।”
Source notes (1)
- Cross-reference रोम. 9:21
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.