Kulvi Outer Seraji Bible
जेरमयाह 30
बिधाता आणनीं आपणीं परज़ा गलामी का काढी
बिधाता दैनअ मुंह जेरमयाह लै इहअ एक होर समाद, तेऊ बोलअ मुल्है इहअ, “जेरमयाह, हुंह आसा बिधाता, इज़राईलो परमेशर। हुंह बोला ताल्है इहअ, ‘ज़ुंण बी हुंह ताखा खोज़ूं, तिन्नां सोभी गल्ला डाहै जंतरी दी लिखी। आजू एछणैं इहै धैल़ै कि इज़राईल अर यहूदा एछणैं तैहा ई ज़ैगा लै फिरी ज़िधा का तिंयां कैद करी निंयैं तै। मुंह पजैल़णैं तिंयां तैहा ज़ैगा बापस ज़ुंण मंऐं तिन्नें दादा-बाबा लै थिई दैनी दी। तिंयां हणैं भिई तैहा ज़ैगे मालक। अह गल्ल बोली मंऐं बिधाता।’”
बिधाता बोलअ इज़राईल अर यहूदा मुल्खे परज़ा लै इहअ, “हुंह आसा बिधाता, हुंह बोला इहअ,
‘मंऐं शूणीं लोगे लेरा-पकारा,
तिन्नां मांझ़ै आसा सिधी डअर-भगैर।
पुछ़-ज़ाच़ करा! संघा भाल़ा!
मर्धा कधू सूंणें दाह लागा? ज़ै नांईं लागदी,
तै किल्है आसा सोभी मर्धै सुंदी बेटल़ी ज़िहै आपणैं पेट डाहै दै ढाकी,
ज़िहअ कि तिन्नां आसा सूंणें दाह लागी दी?
तिन्नैं सोभी किल्है आसा आपणैं मुंह डाहै दै शेऊई?
आजू भाल़ा किहै डरैऊंणै धैल़ै एछणैं!
तिहै धैल़ै निं होर हुऐ ई आथी, तिन्नां धैल़ै पल़णीं याकबा लै खास्सी खरी,
पर तिंयां हेरनै तेता बच़ाऊई।1
तिन्नां धैल़ै चोल़णअ मुंह तिन्नें कैल़ै पाअ द जूँ पोर्ही,
मुंह पाणै तिन्नें गल़ैऊंडी अर जोच काटी,
अर तेखअ निं परदेसी तिन्नां कधि आपणैं गलाम बणाईं सकदै।
हुंह आसा स्वर्गे सारी सैनो मालक बिधाता, अह गल्ल डाही मंऐं बोली।
तेखअ करनी तिन्नां सदा मेरी च़ाकरी,
तिन्नां प्रैंदै करनअ राज़ै दाबेदे लुआदा मांझ़ै ई राज़
ज़ुंण मुंह तिन्नें परमेशर बिधाता तिन्नां लै राज़अ छ़ांटणअ।2 3
मेरअ दास याकब, तूह निं डरी आथी,
इज़राईलीओ, तम्हैं निं काम्बदै लागा।
मुंह आणनैं तम्हैं दूर देशे तैहा ज़ैगा का बच़ाऊई
ज़िधी तम्हैं कैद करी गलामी दी आसा डाहै दै।
तम्हैं एछणैं घअरा लै फिरी संघा बस्सणै आपणीं ज़ैगा राज्ज़ी-मौज़ी,
तम्हैं बस्सणै भिई राज्ज़ी-राम्बल़ै अर तेखअ निं तम्हैं कोही डरैऊंणै।
हुंह आसा तम्हां संघै अर मुंह हेरनै तम्हैं बच़ाऊई।
ज़हा-ज़हा देशै मंऐं तम्हैं छिंगै तै, तिंयां देश करनै मुंह पठ खतम।
पर तम्हां निं हुंह पठी खतम करदअ।
नैरनै मुंह तम्हैं बी पर तेथ हणअ तम्हां लै मेरअ नसाफ,
सज़ा दैणैं बाझ़ी निं हुंह तम्हां बी छ़ाडदअ।
अह गल्ल डाही मंऐं बिधाता बोली।’”
बिधाता बोला आपणीं परज़ा लै इहअ,
“थारै ज़खम आसा खास्सै डुघै, तिंयां निं पुर्हदै आथी,
ऐहा दाह का निं तम्हैं बिज़रदै।
थारी हेर-सभाल़ करनै आल़अ निं कोह आथी,
थारै दुखणैं लै निं मल्हम ई आथी,
तम्हां लै निं आशा ई आथी कि ऐहा दाहा का बिज़री तम्हैं नरोगै होए।
थारै साथी ज़हा लै तम्हैं झ़ूरा, तिन्नैं हेरै तम्हैं बिस्सरी,
तिंयां निं तम्हां झेठू एछदै।
हुंह पल़अ तम्हां लै दुशमणा ज़िहअ चुटी।
मंऐं दैनी तम्हां लै खास्सी सज़ा किल्हैकि
तम्हैं किऐ खास्सै पाप।
तम्हैं निं आपणैं इना ज़खमे खरी खोज़दै लागा,
तम्हैं निं एता का बिज़रदै, एतो मल्हम निं आथी।
तम्हैं किऐ खास्सै पाप अर तैही दैनी मंऐं तम्हां लै एही सज़ा।
पर ऐबै हणैं तिंयां ई बरैबाद ज़ुंण तम्हां बरैबाद करदै आसा लागै दै।
ऐबै निंणै थारै सोभ दुशमण तिन्नें आपणैं देशा का दूर कैद करी,
ज़ुंणीं तम्हैं हंतै, तिंयां हंतणैं होरी अर
ज़ुंणीं तम्हैं लुटै, तिंयां बी लुटणैं होरी तिहै ई।
पर मुंह करनअ थारअ लाज़ संघा करनै भिई राम्बल़ै,
मुंह करनै तम्हैं थारै ज़खमा का नरोगै।
अह गल्ल डाही मंऐं बिधाता बोली।
तम्हां लै बोला थारै दुशमण, ‘सियोन आसा छ़ाडी दी,
एसे हेर-सभाल़ करनै आल़अ निं कोहै आथी।’”
बिधाता बोला इहअ,
“मुंह दैणीं याकबे आद-लुआदा लै खास्सी बर्गत अर तिंयां करनै मुंह भिई सफल।
तिन्नां लै झ़ूरनअ मुंह खास्सै।
ज़ेही एरुशलेम नगरी ढोल़ी बरैबाद किई ती, सह च़िणनी भिई तेही ई।
तिंयां राज़ेए मैहलै बी च़िणनै भिई तैहा ई ज़ैगा।
तिधी बस्सै दै लोगा करनअ गिहा बोली शूकर,
तिधा का शुण्हनै खुशीए बोल।
मुंह दैणीं तिन्नां लै खास्सी बर्गत, अर तेता करै करनअ लोगा तिन्नों अदर।
तिन्नें आद-लुआद फल़णीं-फुलणीं भिई खास्सी
तिंयां पैहलकै ज़मानै थिऐ।
ज़ुंण तिन्नां संघै बूरअ बभार करे, तिन्नां लै दैणीं मुंह सज़ा।
तिन्नों सैणअ हणअ तिन्नां ई मांझ़ा का,
तिन्नां प्रैंदै राज़ करनअ तेऊ।
सह शादणअ मुंह आप्पू सेटा लै अर सह एछणअ मुंह नेल़।
किल्हैकि ज़ै हुंह ज़ाज़त निं दैंऊं, तै निं मुंह नेल़ कोह एछी सकदअ।
तेऊ करनी तत्त-दिला का मेरी ई च़ाकरी।
तेभै हणैं तिंयां मेरी परज़ा अर
हुंह हणअ तिन्नों परमेशर।”
भाल़ा! बिधातो रोश्श फुटअ बादल़ा ज़िहअ, सह आसा एही हारनै मारनै आल़ी ढिशा-बागरी ज़िहअ ज़ुंण कदुष्ट मणछे मुंडै बेघै ज़ोरै लागणीं। बिधातो अह आगी ज़िहअ रोश्श निं तेभै तैणीं पिछ़ू हटदअ, ज़ेभै तैणीं अह आपणअ काम पूरअ निं करी हेरे। आजू एछणैं इहै धैल़ै तेभै जाणीं तम्हां ईंयां सोभै गल्ला समझ़ एछी।
Source notes (3)
- Cross-reference आम. 5:18-20; ईशा. 2:12-21; सप. 1:7-11,14-18
- Cross-reference लूक. 1:69; शधा. 2:30
- Cross-reference जेर. 46:27,28
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.