जोहन्‍ना

जोहन्‍ना

जोहन्‍ना लिखअ द खुशीओ समाद

भेत

लिखणैं आल़अ: जोहन्‍ना

पहल़णैं आल़ै: संसारे सोभ लोग

सन: 85-90

जोहन्‍ना लिखै दै एऊ खुशीए समादा दी आसा ईशू परमेशरे सदा रहणैं आल़ै बैणे रुपै पेश किअ द, “ज़ुंण मणछ देही दी आअ अर हाम्हां मांझ़ै रहअ।” ऐहा कताबा दी आसा इहअ साफ बोलअ द कि अह खुशीओ समाद आसा एते तैणीं लिखअ द कि एता पहल़णैं आल़ै इहअ विश्वास करे, “ईशू ई आसा करार किअ द उद्धार करनै आल़अ अर परमेशरो पूत, अर तिन्‍नां ईशू दी विश्वास करनै करै सदा रहणैं आल़ी ज़िन्दगी भेटी सके।”

इधी आसा ईशू परमेशरे सदा रहणैं आल़ै बैणे रुपै रहैऊअ द। तेखअ आसा खुशीए समादे पैहलै सात नुआहरै कामें या स्वर्गे नछ़ैण अर च़मत्कारे बारै खोज़अ द। तेता करै हआ इहअ प्रगट कि ईशू आसा करार किअ द उद्धार करनै आल़अ मतलब परमेशरो पूत। दुजअ भाग आसा शिक्षा। इना दी आसा अह गल्‍ल समझ़ाऊई दी कि इना रहैन करनै आल़ै कामों किज़ै मतलब आसा। एथ आसा इहअ बी खोज़अ द कि किहअ करै किअ कई लोगै ईशू दी विश्वास अर तेऊए च़ेल्‍लै बणै, ज़ै कि होरी लोगै किअ बरोध अर तिन्‍नैं बोलअ हाम्हैं निं ऐहा गल्‍ला मंदै। 13-17 धैऊआ आसा तैहा राचीए बारै ज़हा राची ईशू ढाकअ, ईशूए आपणैं च़ेल्‍लै संघै पाक्‍की साझ़, क्रूसा दी मरनै का पैहली बैल़ी च़ेल्‍लै तैर करनै अर तिन्‍नां लै हैअ दैणैं आल़ै ईशू बोलै दै बैणे बारै बाढै खोज़ी दी। खिरीए धैऊआ दी आसा ईशूए ढाकणें बारै, मकदमें बारै, क्रूसा दी मारने, दाबी डाहणें, मरी करै ज़िऊंदै हणें अर ज़िऊंदै हणैं का बाद च़ेल्‍लै दी प्रगट हणें बारै लिखअ द।

जोहन्‍ना दैआ मसीहा बाती सदा रहणैं आल़ी ज़िन्दगीए दाने बारै ज़ोर। अह आसा एक इहअ दान ज़ुंण अज़ी शुरू हआ अर अह भेटा तिन्‍नां ज़ुंण ईशू बात, सत्त अर ज़िन्दगीए रुपै मना। जोहन्‍ने खास गल्‍ल आसा एथ एही कि आत्मिक च़िज़ा रहैऊंणा लै आसा तेऊ संसारे ज़िन्दगीए हर धैल़ै काम एछणैं आल़ी आम च़िज़ा परमेशरे असली भेद समझ़ाऊंणा लै किई दी, ज़िहअ कि पाणीं, रोटी, प्रैश्शअ, फुआल अर तेऊए भेडा, बेल अर तेते फल़।

जोहन्‍ना किल्है लिखी ईंयां गल्‍ला? सह दैआ एतो ज़बाब हाम्हां लै आप्पै इहअ, “ताकि तम्हैं ईशू दी भरोस्सअ करे कि सह आसा मसीहा अर परमेशरो पूत।” इहअ किहअ करै सका हई? एतो ज़बाब दैआ ईशू ज़ेभै निकूदमास ईशू का सुआल करा:

“किल्हैकि परमेशरै किई सारै संसारा संघै एही झ़ूरी कि तेऊ दैनअ आपणअ कल्हअ शोहरू बल़ीदान हणां लै ताकि ज़ुंण बी तेऊ दी विश्वास करे सह निं लोल़ी मूंअ, पर तेऊ लोल़ी सदा रहणैं आल़ी ज़िन्दगी भेटी।”

(3:16)

कताबे बांड

भेत 1:1-18

जोहन्‍ना डुबकी दैणैं आल़अ अर ईशूए शुरूआती च़ेल्‍लै 1:19-51

ईशूए च़ाकरी 2:1—12:50

एरुशलेम नगरी खिरीए धैल़ै 13:1—19:42

ईशूओ मरी करै ज़िऊंदै हणअ अर तेऊओ शुझणअ 20:1-31

नचोल़, गलील मुल्खै भिई शुझणअ 21:1-25