Kulvi Outer Seraji Bible
जोहन्ना 20
रित्ती घोर
(मोत्ती 28:1-8; मार्कुस 16:1-8; लूका 24:1-12)
हबते पैहली धैल़ी मगदल़ गराऊंए मरिअम दोत्ती-दोत्थी धुंमधुंमै न्हैरै डेऊई घोरी सेटा अर तेते मोहरै दी लाई दी बडी टोल्ह भाल़ी तिन्नैं पोर्ही बदल़ी दी। एता भाल़ी ठुर्ही सह तिधा का शमौन पतरासा अर तेऊ दुजै च़ेल्लै सेटा लै, ज़सरी ईशू झ़ूरी लागा ती, अर तिन्नां सेटा एछी बोलअ, “तिन्नैं निंयं प्रभू घोरी का काढी अर हाम्हां का निं थोघै कि ऐबै किधी आसा सह डाह द?”
तेखअ ठुर्है पतरास अर सह दुजअ च़ेल्लअ घोरी सेटा लै, अर तिंयां थिऐ दुहै संघा-संघा घोरी सेटा लै ठुहर्दै लागै दै पर सह दुजअ च़ेल्लअ निखल़अ पतरासा का आजू अर सह पुजअ घोरी सेटा पैहलै। तेऊ भाल़ै बागा का भाल़ी कि ल्हास निं तिधी आथी अर तिधी थिऐ सिधै झिकल़ै पल़ै दै अर सह निं भितरा लै डेऊअ।
तेखअ पुजअ शमौन पतरास तेऊ पिछ़ू-पिछ़ू, संघा भाल़अ तेऊ घोरी भितरा लै डेऊई कि तिधी आसा सिधै झिकल़ै। ज़ुंण शाट्टअ ईशूए मुंडै थिअ पल़ेटअ द, सह निं तिधी आथी त, पर सह थिअ दुजी ज़ैगा ज़ुदअ ज़िहअ च़फल़ी डाहअ द। तेखअ आअ सह दुजअ च़ेल्लअ बी घोरी भितरा लै ज़ुंण पैहलै पुजअ त, इहअ भाल़ी हुअ तेऊ बी भरोस्सअ। तिंयां निं अज़ी बी पबित्र शास्त्रे ऐहा गल्ला समझ़ै, “तेऊ हणअ त मरी करै ज़िऊंदै।”1 तेखअ डेऊऐ ईंयां च़ेल्लै घअरा लै फिरी।
मगदल़ गराऊंए मरिअमा लै प्रगट हणअ
(मोत्ती 28:9-10; मार्कुस 16:9-11)
पर मरिअम रही घोरी बागै खल़्हुई लेरदी लागी, संघा लागी लेरदी-लेरदी घोरी भितरी भाल़ी। तैहा का शुझुऐ शेतै च़मकदै झिकल़ै बान्हैं दै दूई स्वर्ग दूत ज़िधी ईशूए ल्हास ती डाही दी, एक थिअ शरैहणैं अर एक खूरा सेटा बेठै दै। तिन्नैं बोलअ तैहा लै, “हे बैहण, तूह किल्है आसा लागी दी लेरदी?” तैहा बोलअ तिन्नां लै,
“तिन्नैं निंईं म्हारै प्रभूए ल्हास इधा का च़की, ऐबै मुखा निं थोघै कि तिन्नैं सह किधी आसा डाही दी।”
इहअ बोली ज़ांऊं तैहा पिछ़ू भाल़अ, पिछ़ू त ईशू खल़्हुअ द। पर तैहा निं बछ़ैणीं कि अह आसा ईशू। ईशू बोलअ तैहा लै, “हे बैहण, तूह किल्है आसा लागी दी लेरदी? तूह कहा लोल़ी आसा लागी दी?”
तैहा बोलअ बागो बेठू समझ़ी तेऊ का, “हे मालक, ज़ै तंऐं सह इधा का च़कअ, तै खोज़ मुखा कि तंऐं किधी आसा सह डाहअ द।”
ईशू बोलअ तैहा लै, “मरिअम”
तैहा भाल़अ पिछ़ू अर इब्रानी बोली दी बोलअ, “रबूनी,” मतलब “गूरू।”
ईशू बोलअ तैहा लै, “मुंह निं छ़ूंऐं आथी, हुंह निं अज़ी आपणैं बाब परमेशरा सेटा लै उझै डेऊअ। पर मेरै तिन्नां साथी-भाई सेटा लै डेऊ अर तिन्नां का बोलै कि हुंह च़ाल्लअ आपणैं बाब अर थारै बाब अर आपणैं परमेशर अर थारै परमेशरा सेटा लै उझै डेऊई।”
मगदल़ गराऊंए मरिअमै खोज़ी ईंयां सारी गल्ला च़ेल्लै का, “मंऐं भाल़अ प्रभू अर तेऊ किई मुंह संघै ईंयां गल्ला।”
च़ेल्लै लै प्रगट हणअ
(मोत्ती 28:16-20; मार्कुस 16:14-18; लूका 24:36-49)
तैहा ई धैल़ी ज़ुंण हबतेओ पैहलअ धैल़अ त, सान्हां ज़िहअ ईशू खल़्हुअ भितरा बाखा दुआरै ज़िधी च़ेल्लै तै। यहूदी सैणें डरै तै तिंयां दुआर हूल़ी भितरी बेठै दै।
ईशू तिन्नां सेटा खल़्हुई करै तिन्नां लै बोलअ, “तम्हां सोभी लोल़ी शांती हुई।” इहअ बोली फिरअ ईशू तिन्नां बाखा संघा रहैऊऐ ईशू तिन्नां का आपणैं हाथ खूर। तेखअ हुऐ तिंयां च़ेल्लै प्रभू ईशू भाल़ी खास्सै खुश।
ईशू बोलअ तिन्नां लै, “तम्हां सोभी लै शांती होए अर ज़िहअ हुंह मेरै बाब परमेशरै संसारा लै छ़ाडअ, तिहअ ई छ़ाडा हुंह ऐबै तम्हां।” इहअ बोली तेऊ तिन्नां लै एक फूक मारी संघा बोलअ, “हुंज़ा, पबित्र आत्मां।” ज़सरै पाप तम्हैं माफ करे, तिंयां हणैं माफ हेरै दै करी, अर ज़सरै पाप तम्हैं डाहे, तिंयां रहणैं।
थोमा लै प्रगट हणअ
पर तिन्नां बारा च़ेल्लै मांझ़ा का एक च़ेल्लअ ज़हा नाअं थोमा दिमुस आसा, ज़ेभै ईशू आअ, तेभै निं सह तिन्नां संघै त, ज़ांऊं होरी च़ेल्लै तेऊ का खोज़अ, “हाम्हैं भाल़अ प्रभू सह हुअ ज़िऊंदअ।” पर तेऊ निं विश्वास हुअ।
तेऊ बोलअ, “ज़ांऊं तैणीं हुंह तेऊए हाथै कीला करै पल़ै दै खाढ निं भाल़ूं अर तेथ दी आपणीं गुंठी निं पाई लऊं अर तेऊए कुछी दी हाथ पाई निं भाल़ूं तेभै तैणीं निं हुंह विश्वास करदअ।”
तेता का आठा धैल़ै बाद तै भिई च़ेल्लै घअरा भितरी दुआर हूल़ी करै बेठै दै अर थोमा बी थिअ तिन्नां संघै। तेखअ आअ ईशू बी तिन्नां सेटा अर तिन्नां सेटा खल़्हुई करै बोलअ, “तम्हां लै लोल़ी शांती हुई।” तेखअ बोलअ ईशू थोमा लै, “आपणीं गुंठी पाआ मेरी नथअई दी, अर बैहम निं करै पर विश्वास कर कि हुंह आसा ज़िऊंदअ।” इहअ शूणीं थोमा ज़बाब दैनअ, “हे प्रभू, मेरै परमेशर,” ईशू बोलअ तेऊ लै, “तंऐं ता किअ मुंह दी भाल़ी हेरी करै विश्वास पर परमेशरा हणअ तिन्नां मणछा लै खुश, ज़ुंणी मुंह बाझ़ी भाल़ै हेरै किअ विश्वास।”
ऐहा कताबो मकसद
ईशू रहैऊऐ आपणैं च़ेल्लै का होर बी कई नछ़ैण ज़ुंण ऐहा कताबा दी निं आथी लिखै दै। पर ईंयां गल्ला लिखी मंऐं एते तैणीं कि तम्हैं विश्वास करी सके कि ईशू ई आसा मसीहा परमेशरो पूत अर तेऊए नाओंआं दी विश्वास करी भेटणीं तम्हां सदा रहणैं आल़ी ज़िन्दगी।
Source notes (1)
- Cross-reference भज. 16:10
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.