Kulvi Outer Seraji Bible
जोहन्ना 21
तिबरियस समुंदरे बाढै च़ेल्लै लै प्रगट हणअ
इना गल्ला हणैं का बाद हुअ ईशू तिबरियस समुंदरे बाढै आपणैं च़ेल्लै सेटा प्रगट। तिधी हुअ इहअ कि शमौन पतरास अर थोमा ज़हा लै दिमुस बोला, अर गलील मुल्खे काना नगरी का थिऐ होर बी, नतनेल अर जबदीओ शोहरू अर ईशूए च़ेल्लै मांझ़ा का बी तै दूई होर च़ेल्लै तिधी कठा हुऐ दै।
शमौन पतरासै बोलअ तिन्नां लै, “तम्हैं बेशा अर हुंह आणू तम्हां लै म्हाछ़ली ढाकी।”
पर तिन्नैं बोलअ, “हाम्हैं बी च़ाल्लै ताह संघै।” तिंयां सोभ ज़ण्हैं किश्ती दी बेठै पर सारी राची निं तिन्नां किछ़ भेटअ।
ज़ांऊं राच भैई, ईशू खल़्हुअ समुंदरे बाढै पर तिन्नैं च़ेल्लै निं तज़ी बी सह बछ़ैणअ कि अह आसा प्रभू ईशू। तेखअ बोलअ ईशू तिन्नां लै, “लान्हैंओ, तम्हां का किज़ै खाणां लै बी आसा?”
तिन्नैं बोलअ, “किछ़ निं आथी।”
तेखअ बोलअ ईशू तिन्नां लै, “किश्तीए दैहणीं बाखा शोटा ज़ज़ाल़ तेथ भेटणीं तम्हां म्हाछ़ली।” तेखअ तिन्नैं किअ तिहअ ई। कै हुअ कि तेऊ ज़ज़ाल़ा दी शाची एतरी म्हाछ़ली कि ज़ज़ाल़ निस्सअ तिन्नें पाणीं का उझै खिंच़ुई।
इहअ करै तेऊ च़ेल्लै ज़हा लै ईशू झ़ूरी करा त, तेऊ बोलअ पतरासा लै, “अह ता म्हारअ प्रभू आसा।” शमौन पतरासै ज़ांऊं इहअ शूणअ कि प्रभू ईशू आसा, तेऊ बान्हअ च़ोल़अ किल्हैकि तेऊए आधी घेर ती नांगी अर तेऊ दैनी समुंदरे छ़ाहल़ अर सह पुजअ तैरी करै प्रभू ईशू सेटा सोभी का आजी, पर होर च़ेल्लै आऐ किश्ती दी बेशी म्हाछ़ली करै भरै ज़ज़ाल़ा खिंच़दी, समुंदरे बाढा का तै तिंयां कोई दूई शौ हाथ दूर।
ज़ांऊं तिंयां समुंदरे बाढै पुजै, तिन्नैं कै भाल़अ कि तिधी आसा कोयले आग अर तेथ प्रैंदै आसा म्हाछ़ली डाही दी सिटणा लै छ़ड़ाऊई अर रोटी बी आसा।
ईशू बोलअ तिन्नां लै, “ज़ुंण म्हाछ़ली तम्हैं एभै ढाकी, तेता मांझ़ा का दैआ थोल़ी ज़ेही।” शमौन पतरास उखल़अ किश्ती दी अर बडी-बडी म्हाछ़ली करै टिरा बहूंदअ ज़ज़ाल़ खिंच़अ समुंदरे बाढा शुक्की ज़ैगा लै। पर साबा का खास्सी म्हाछ़ली हई बी निं सह ज़ज़ाल़ धेहल़ुअ। ईशू बोलअ तिन्नां लै, “एछा, खाआ।” पर च़ेल्लै मांझ़ै निं कोही इहअ पुछ़णें हिम्मत हुई कि तूह कुंण आसा? तिन्नां का थिअ थोघ कि अह आसा प्रभू ईशू। ईशू आअ अर तिन्नां लै दैनी रोटी अर म्हाछ़ली खाणां लै। अह त चिऊथी बारी कि ईशू मरनै का बाद ज़िऊंदै हई दैनै च़ेल्लै लै दर्शण।
ईशू अर पतरास
रोटी खाणैं का बाद ईशू शमौन पतरासा का बोलअ, “शमौन, जोहन्ने शोहरूआ, तूह कै मुंह संघै इना होरी का खास्सी झ़ूरी डाहा?”
पतरासै बोलअ, “हाँ प्रभू, ताखा आसा ऐहा गल्लो थोघ कि हुंह ताल्है केतरअ झ़ूरी डाहा।”
ईशू बोलअ तेऊ लै, “मेरै मिम्मूं च़राऊ।”
ईशू पुछ़अ पतरासा लै दुजी बारी भिई, “शमौन जोहन्ने शोहरूआ, तूह मुंह संघै बेघै झ़ूरी डाहा?”
तेऊ दैनअ ज़बाब, “हाँ प्रभू, ताखा, आप्पै आसा थोघ कि हुंह केतरी झ़ूरी करा।”
ईशू बोलअ तेऊ लै, “मेरी भेडे हेर-सभाल़ कर।”
चिऊथी बारी तेऊ भिई पतरासा लै बोलअ, “शमौन जोहन्ने शोहरूआ, तूह मुंह संघै बेघै झ़ूरी डाहा?”
पतरास हुअ बडअ दुखी कि तेऊ बोलअ चिऊथी बारी, “तूह मुंह संघै झ़ूरी करा?” तेखअ बोलअ तेऊ, “हे प्रभू, तूह ताखा आसा सोभी गल्लो थोघ, ताखा आसा थोघ कि हुंह, संघै केतरी झ़ूरी करा।”
तेखअ बोलअ ईशू तेऊ लै, “मेरी भेडा च़राऊ।”
तेखअ बोलअ ईशू तेऊ लै, “हुंह खोज़ा ताखा सत्त कि ज़ेभै तूह ज़ुआन त, तेभै बान्हां त तूह आपणीं गाची आप्पै अर तूह ज़िधी च़ाहा त तिधा लै डेओआ त हांढा-फिरा। पर ज़ांऊं प्रोढअ हणअ तेभै करनै ताह आपणैं हाथ लाम्मै अर तेरी गाची बान्हणीं होरी। ज़िधा लै तूह नांईं बी च़ाहंदअ, तूह निंणअ तिन्नां तिधा लै बी।”
इना गल्ला बोली खोज़अ तेऊ इहअ कि पतरासा केही मौता मरी करै रहैऊंणअ परमेशरो प्रतप्प, संघा इहअ बोली तेऊ लै बोलअ, “मुंह पिछ़ू एछ।”
ईशू अर तेऊओ च़ेल्लअ
पतरासै भाल़अ पिछ़ू सह च़ेल्लअ एछदअ ज़हा संघै ईशू झ़ूरी डाहा त, ज़ुंणी ईशू का ऊवार्णे थैरे भोज़ खांदी ईशूए हिक्का बाखा ढूल़ी करै इहअ पुछ़अ त, “हे प्रभू, ताह ढाकणैं बझ़ैल़दअ कुंण आसा?” तेऊ भाल़ी बोलअ पतरासै ईशू लै, प्रभू, “एऊओ कै हाल हणअ?”
ईशू बोलअ तेऊ लै, “ज़ै हुंह इहअ च़ाहूं कि मुंह एछणैं तैणीं ज़िऊंदअ रहे, एते ताह कै पल़ी? तूह एछ मुंह पिछ़ू।” इहअ करै पल़ी तिन्नां सोभी भाई मांझ़ै अह गल्ल कि ईशूओ सह च़ेल्लअ निं मरनअ आथी। तज़ी बी निं ईशू इहअ बोली त कि सह निं मरनअ आथी, पर तेऊ बोलअ त इहअ कि, “ज़ै हुंह च़ाहूं कि मुंह एछणें तैणीं सह ज़िऊंदअ रहे, एते ताह कै पल़ी?”
नचोल़
अह आसा सह ई च़ेल्लअ ज़ुंण इना गल्ले शाजत दैआ अर ज़ुंणी ईंयां गल्ला लिखी दी आसा, अर हाम्हैं ज़ाणा कि तेऊए शाजत आसा शुची।
होर बी आसा खास्सै काम ज़ुंण ईशू किऐ, ज़ै तिंयां एक, एक करी सोभ लिखै हंदै, हुंह समझ़ा इहअ कि तेते हणीं ती एतरी कताबा कि पूरै संसारै बी निं च़ाल्ली ती तिंयां एछी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.