Kulvi Outer Seraji Bible
जोहन्ना 16
“ईंयां गल्ला बोली मंऐं तम्हां लै एते तैणीं कि तम्हैं मुंह दी विश्वास करनअ नां छ़ाडे। तिन्नां काढणैं तम्हैं परमेशरे सभागृहा का बागै। एतरअ, हुअ पर आजू एछणअ इहअ बगत बी कि ज़ुंण बी तम्हां मारी पाए, तेऊ सोठणअ आप्पू लै इहअ कि हुंह आसा लागअ द परमेशरे च़ाकरी करदअ।
“इहअ करनअ तिन्नां तै कि तिन्नैं नां बाब परमेशर आथी बछ़ैणअ द अर नां तिंयां मुंह बछ़ैणदै। पर ईंयां गल्ला खोज़ी मंऐं तै कि ज़ेभै इहअ बगत एछे, तेभै लोल़ी तम्हां आद फिरी कि मंऐं हेरअ त तम्हां का पैहलै ई खोज़ी।
पबित्र आत्में काम
“शुरू दी निं मंऐं तम्हां का ईंयां गल्ला एते तैणीं खोज़ी कि हुंह त आप्पै तम्हां संघै। ऐबै च़ाल्लअ हुंह तेऊ सेटा लै बापस डेऊई ज़ुंणी हुंह संसारा लै आसा छ़ाडअ द। तम्हां मांझ़ै निं कोहै मुंह पुछ़दअ कि तूह किधा लै च़ाल्लअ? ज़ुंण मंऐं ईंयां गल्ला तम्हां का खोज़ी एता करै भर्हुअ थारअ मन्न दुख शोगा करै।
“तैबी खोज़ा हुंह तम्हां का सत्त आसा इहअ कि मेरअ डेऊणअ आसा तम्हां लै भलअ। ज़ै हुंह नांईं डेऊं, तै निं सह मज़त करनै आल़अ तम्हां सेटा लै एछणअ। पर ज़ांऊं हुंह डेऊणअ, तेखअ छ़ाडणअ मुंह सह तम्हां सेटा लै। तेऊ लाणअ संसारे मणछा लै दोश कि तिन्नैं किअ पाप। तिन्नां का रहैऊंणअ तेऊ कि तिन्नैं निं परमेशरे साबै धर्म किअ अर इहअ बी कि परमेशरा करनअ एकी धैल़ी ऐहा गल्लो नसाफ किल्हैकि तिन्नैं निं तिहअ किअ ज़ुंण परमेशरै तिन्नां लै बोलअ त।
“पापे बारै नसाफ करनअ तेऊ तै कि तिंयां निं मुंह दी विश्वास करदै। धर्में बारै करनअ तै कि हुंह डेऊणअ बाब सेटा लै अर तम्हैं निं मुंह भिई भाल़ी सकदै। 1 नसाफ हणें बारै करनअ तै कि एऊ संसारे राज़ै लै आसा हेरअ द दोश लाई।
“मुंह बोल़णीं ती तम्हां लै होर बी गल्ला, पर तम्हैं निं एभै तिन्नां ज़िरी सकदै। पर ज़ेभै सत्तो आत्मां एछणअ, तेऊ खोज़णीं तम्हां का सत्ते सह बात। किल्हैकि तेऊ निं आपणीं बाखा किछ़ै गल्ल खोज़णीं। पर ज़ुंण तेऊ परमेशरा का शुणनी, तेऊ खोज़णीं तिंयां ई गल्ला अर आजू हणैं आल़ी सारी गल्ला खोज़णीं तेऊ तम्हां का। पबित्र आत्मां आणनअ मेरअ प्रतप्प। किल्हैकि तेऊ खोज़णीं तम्हां का मेरी ई गल्ला। ज़ुंण बी मेरै बाबो आसा, सह आसा सोभ मेरअ। तैही बोलअ मंऐं तम्हां का, ‘तेऊ खोज़णीं तम्हां का मेरी ई गल्ला का।’
दुख बदल़णअ सुखा दी
“थोल़ी घल़ी निं हुंह तम्हां का शुझणअ आथी अर थोल़ी घल़ी बाद शुझणअ हुंह तम्हां का भिई, किल्हैकि हुंह डेऊणअ बाब सेटा लै।”
तेखअ लागै कई च़ेल्लै आप्पू मांझ़ै गल्ला करदै, “अह इहअ कै बोला, ‘थोल़ी घल़ी निं हुंह शुझणअ अर थोल़ी घल़ी बाद शुझणअ? तै कि हुंह डेऊणअ बाब सेटा लै?’” तेखअ बोलअ तिन्नैं, “अह ज़ुंण थोल़ी घल़ी बोला, अह किज़ै गल्ल आसा? हाम्हां का निस्सअ थोघ लागी किज़ै बोला?”
ईशू हेरअ ज़ाणीं कि तिंयां च़ाहा मुखा पुछ़णअ, तेखअ बोलअ तेऊ तिन्नां लै इहअ, “आप्पू मांझ़ै तम्हैं मेरी ऐहा गल्ला पुछ़-ज़ाच़ करदै आसा लागै दै कि अह किज़ै बोलअ, थोल़ी घल़ी निं हुंह तम्हां का शुझणअ अर थोल़ी घल़ी बाद शुझणअ तम्हां का हुंह भिई? हुंह खोज़ा तम्हां का सत्त आसा अह कि तम्हैं लेरनै हिक्का पटाक्की अर तम्हां जैंदरी पल़णअ शोग, पर एऊ संसारा मनाऊंणी खुशी। पर थारअ शोग बदल़णअ खुशी दी। ज़ांऊं बेटल़ी सूंणें दाह लागा, तेभै पल़ा तैहा लै दुख-सांगट, किल्हैकि तेभै हआ तैहा लै दुखा तकलिफे घल़ी आई दी। पर ज़ांऊं सह बच्च़ै लै ज़ल्म दैई हेरा, ऐहा गल्ले खुशी कि एकी मणछ लअ संसारै ज़ल्म, तैहा दुखा सांगटे घल़ी निं सह आद करदी।2
“तम्हां बी आसा एभै शोग, पर हुंह एछणअ तम्हां सेटा लै भिई अर तम्हैं हणैं तेभै खुश अर तैहा खुशी निं तम्हां का कोहै छ़ड़ैऊई सकदअ। तैहा धैल़ी निं तम्हां मुखा किछ़ै पुछ़णअ। हुंह खोज़ा तम्हां का सत्त कि, ज़ै तम्हैं बाब परमेशरा का किज़ै मांगे, मेरै नाओंए दैणअ तेऊ तम्हां लै। अज़ी बी निं तम्हैं मेरै नाओंऐं किछ़ै मांगअ आथी, ज़ै तम्हैं मांगे, तै जाणीं तम्हां सह गल्ल भेटी ज़ेता तम्हैं मांगा ताकि थारी खुशी पूरी होए।
संसारा प्रैंदै ज़ीत
“मंऐं बोली ईंयां गल्ला तम्हां का कथ्या खोज़ी, पर आजू एछणअ इहअ बगत कि मुंह निं तम्हां का कथ्या खोज़ी करै गल्ला खोज़णीं, पर बाबे बारै खोज़णअ मुंह तम्हां का खुल्ही करै। तैहा धैल़ी मांगणअ तम्हां मेरै नाओंआं दी अर तेभै निं मुंह इहअ बोल़णीं कि हुंह करूं बाबा का तम्हां लै अरज़।
“किल्हैकि मेरअ बाब परमेशर झ़ूरा तम्हां लै खास्सअ किल्हैकि तम्हैं झ़ूरै मुल्है अर ऐहा गल्लो विश्वास बी किअ कि हुंह आसा परमेशरा बाखा आअ द। हुंह आसा बाबा का निखल़ी संसारै आअ द, अर बाब ई सेटा डेऊणअ मुंह बापस।”
तेऊए च़ेल्लै बोलअ तेऊ लै, “भाल़ ऐबै लागअ तूह खुल्ही करै बोल्दअ, ऐबै निं तूह कोहै कथ्या खोज़ी बोल्दअ, ऐबै गई हाम्हां पाक्कै दी ठीक समझ़ एछी कि तूह ज़ाणा सोभै गल्ला, अर ताह निं किछ़ै ज़रुरत आथी कि कोई मणछ ताखा पुछ़े, ऐहा गल्ला करै करा हाम्हैं भरोस्सअ कि तूह आसा परमेशरा का निखल़अ द।”
इहअ शूणीं बोलअ ईशू तिन्नां लै, “तम्हां कै एभै हुअ भरोस्सअ? हेरा, सह घल़ी एछणी, इधी तैणीं कि सह गई एछी कि तम्हैं छिंघणैं आपणीं-आपणीं बाता, अर हुंह डाहणअ तम्हां कल्ही शोटी, तैबी निं हुंह कल्ही आथी, किल्हैकि बाब आसा मुंह संघा।3
“ईंयां गल्ला बोली मंऐं तम्हां का तै कि तम्हां मुंह दी शांती भेटे, संसारै हआ तम्हां भारी कष्ट, पर हैअ डाहै, मंऐं हेरअ संसार ज़िती।”
Source notes (3)
- Footnote जोह. 12:31
- Footnote ईशा. 26:17; मिक. 4:9
- Footnote जोह. 8:29
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.