Kulvi Outer Seraji Bible
जोहन्ना 10
फुआल अर भेडे कथ्या
“हुंह खोज़ा तम्हां का सत्त कि ज़ुंण बी भेडा सेटा भडैल़ै भितरा लै दुआरा बाती नांईं डेऊंदअ, पर कहा होरी बाता उखल़ा, सह आसा च़ोर डाकू। पर ज़ुंण दुआरा बाती भडैल़ै लै डेओआ, सह आसा तिन्नां भेडो असली फुआल। तेऊ लै खोल्हा दुआरो पहरी दुआर अर भेडा शूणां तेऊए हाक्का। सह शादा तिन्नां नाओंआं लई करै बागा लै। भेडा बागा लै काढी हांढा सह फुआल तिन्नां आजू-आजू अर भेडा हांढा तेऊ पिछ़ू-पिछ़ू। किल्हैकि तिंयां बछ़ैणा तेऊए बोल। तिंयां निं कहा पराऐ मणछा पिछ़ू कधि डेऊंदी। पर तेऊ का ठुर्हा तिंयां दूर, किल्हैकि तिंयां निं पराऐ मणछो बोल बछ़ैणदी।”
ईशू खोज़ी तिन्नां का अह कथ्या पर तिन्नैं निं एतो मतलब समझ़अ कि ईंयां कै गल्ला बोली।
ईशू आसा असली फुआल
ईशू बोलअ तिन्नां लै भिई, “हुंह खोज़ा तम्हां का सत्त कि भेडो सह दुआर आसा हुंह ज़ेता बाती सोभै सका परमेशरा सेटा पुजी। ज़ेतरै बी मुखा पैहलै आऐ, तिंयां थिऐ च़ोर अर डाकू अर भेडा निं तिन्नें बोल शूणीं।1 दुआर आसा हुंह, ज़ै कुंण मुंह करै भितरा लै डेओए तेऊ भेटणअ उद्धार। सह रहणअ भितरी-बागै एछदअ-डेऊंदअ अर घाहा पाणीं खांदअ-पिंदअ लागी।2
“च़ोर निं किज़ू होरी कामैं एछदअ सह एछा सिधअ च़ोरी करदअ, मारदअ अर बनाशा करदअ। हुंह आसा आअ द एते तैणीं कि सोभी लै ज़िन्दगी भेटे अर टिरा-बहूंदी भेटे।
“हुंह आसा असली फुआल। असली फुआल दैआ आपणीं भेडे तैणीं ज़ान। ज़ुंण जुआरअ हआ, सह निं असली फुआल हंदअ। नां सह मालक हंदअ, ज़ेभै रुहलअ भेडा खांदअ एछा, तेभै ठुर्हा सह तेऊ भाल़ी भेडा छ़ाडी दूर अर सह रुहलअ पाआ तिन्नां भेडा खाई अर तिन्नां दरल़ाऊआ सातै-बातै। सह जुआरअ ठुर्हा तिधा का थिऐ कि सह आसा जुआरअ, तेऊ निं भेडो फिकर हंदअ।
“असली फुआल आसा हुंह। ज़िहअ मुंह मेरअ बाब बछ़ैणा, तिहअ बछ़ैणा हुंह तेऊ। ज़िहअ बाब मुंह बछ़ैणा तिहअ बछ़ैणा हुंह आपणैं बाब। ठीक इहअ ई, हुंह बछ़ैणा आपणीं भेडा अर मेरी भेडा बछ़ैणा मुंह अर हुंह दैआ आपणीं भेडा लै ज़ान। मेरी आसा होर बी भेडा ज़ुंण एऊ भडैल़ै दी नांईं आथी। मुंह आसा तिंयां झाल़णीं बी ज़रूरी। तिन्नां शुणनअ मेरअ बोल, अर, तेखअ हणअ मेरी भेडो एक्कै छ़ुंड, अर हुंह एक्कै फुआल।3
“तैही डाहा बाब मुंह संघै झ़ूरी, किल्हैकि हुंह दैआ आपणअ प्राण कि भिई बापस लई सकूं। एता निं कोहै मुखा छ़ड़ैऊई सकदअ, पर हुंह दैआ एता आप्पै। मुंह आसा एता दैणैंओ हक बी अर बापस लणेंओ हक बी। मुल्है आसा परमेशरै अह हुकम दैनअ द।”
इना गल्ला पिछ़ू पल़ी यहूदी आप्पू मांझ़ै भिई फूट। तिन्नां मांझ़ै लागै कई लोग बोल्दै, “एऊ दी आसा भूत, एऊ शूणैं किज़ू आसा लागै दै।”
तिन्नैं होरी बोलअ इहअ, “भूत शाचै दै मणछा ज़ेही निं ईंयां ई गल्ला आथी, भूत कै कांणै मणछा शरैछै करा?”
यहूदी मणछै निं विश्वास किअ
तधू तै हिंऊंदे धैल़ै अर एरुशलेम नगरी हुअ एरुशलेम नगरी परमेशरे भबनो पूज़ो थैर। ईशू त परमेशरे भबने खोल़ै राज़ै सुलैमाने च़ऊंरै लागअ द हांढदअ। तिधी आऐ यहूदी तेऊ फेर संघा बोलअ, “ताह केभै तैणीं डाहणैं हाम्हैं दबिधा दी पाई? ज़ै तूह मसीहा आसा, तै बोल हाम्हां का एचल़ी कि हुंह आसा।”
ईशू दैनअ तिन्नां लै ज़बाब, “मंऐं हेरअ तम्हां का बोली पर तम्हैं निं विश्वास करदै। ज़ुंण काम हुंह आपणैं बाबे नाओंए करा तिंयां आसा मेरै शाजत। पर तम्हैं निं तै विश्वास करदै, किल्हैकि तम्हैं निं तम्हैं निं मेरी हेल़्हीए भेडा आथी। मेरी भेडा शूणां मेरै बोल, अर हुंह बछ़ैणा तिन्नां, अर तिंयां हांढा मुंह पिछ़ू-पिछ़ू। हुंह दैआ तिन्नां लै सदा रहणैं आल़ी ज़िन्दगी। तिन्नां निं मेरै हाथा का कोहै छ़ड़ैऊई सकदअ। सह आसा मेरअ बाब ज़ुंणी तिंयां मुल्है आसा दैनी दी सह आसा सोभी का बडअ अर तेऊए हाथा का निं कोहै तिन्नां छ़ड़ैऊई सकदअ। हुंह अर मेरअ बाब आसा एक्कै।”
यहूदी च़कै ईशू मारना लै पात्थर। एता भाल़ी बोलअ ईशू तिन्नां लै, “मंऐं किऐ आपणैं बाबा बाखा का खास्सै काम। इना मांझ़ै कहा कामां पिछ़ू लाई तम्हैं मुल्है पात्थरै बाही?”
यहूदी मणछे सैणैं दैनअ तेऊ लै ज़बाब, “भलै कामां पिछ़ू निं हाम्हैं ताल्है पात्थरै बाहंदै, तंऐं किई परमेशरे निंदा, किल्हैकि मणछ हई बी बोला तूह आप्पू लै परमेशर!”4
ईशू दैनअ तिन्नां लै ज़बाब, “थारै बधाना दी कै इहअ निं आथी लिखअ द, ‘हुंह बोला तम्हैं आसा दईब।’ ज़ै परमेशरै तिन्नां लै दईब बोलअ ज़हा सेटा परमेशर पुजअ अर पबित्र शास्त्रे गल्ल निं टल़दी आथी। तै ज़ुंण मेरै बाब परमेशरै पबित्र बणाईं करै संसारै छ़ाडअ, तम्हैं बोला तेऊ लै कि तूह करा परमेशरे निंदा। तैही बोलअ मंऐं, हुंह आसा परमेशरो पूत।
“ज़ै हुंह बाबो काम नांईं करदअ, तै निं मुंह प्रैंदै विश्वासा करने ज़रुरत आथी। पर ज़ै हुंह तेऊए काम करा, तै तम्हैं च़ाऐ मेरअ विश्वास करा, च़ाऐ नां करा, पर इना कामों विश्वास, करा, ताकि तम्हां का थोघ लागे अर समझ़ एछे कि बाब आसा मुंह दी अर हुंह आसा बाब दी।”
तेखअ किई तिन्नैं तेऊ ढाकणें कोशिश पर सह निं तिन्नें हाथै आअ।
तेखअ डेऊअ ईशू जरदण नदी पार एकी ज़ैगा लै, अर सह रहअ तिधी, ज़िधी पैहलै जोहन्ना डुबकी दैआ त। कई लोग आऐ तेऊ सेटा अर तिन्नैं बोलअ, “जोहन्ना, निं किछ़ै नछ़ैण रहैऊअ पर ज़ुंण बी तेऊ ईशूए बारै बोलअ सह थिअ शुचअ।” तेखअ कई लोगै किअ तिधी ईशू दी विश्वास कि सह ई आसा मसीहा।
Source notes (4)
- Footnote जेर. 23:1; जोह. 10:27
- Footnote भज. 23:1; ईशा. 40:11; एज. 34:15
- Footnote ईशा. 56:8; एज. 34:23; 37:24
- Cross-reference लेब. 24:16
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.