Kulvi Outer Seraji Bible
जोहन्ना 11
लाज़रे मौत
बेथनी नाओंए गराऊंऐं त एक लाज़र नाओं मणछ बमार। तेऊए ती दूई बैहणी मरिअम अर मार्था। अह ती सह ई मरिअम, ज़ुंणी खुशबूदार किम्मती तेला करै प्रभू ईशूए च़रणैं मल़अ त अर आपणैं मुंडे शराल़ा करै ईशूए खूर टुशै तै, सह बमार लाज़र त तेसो सकअ भाई। तेऊए बैहणी दैनअ ईशू लै समाद, “हे प्रभू, ज़हा लै तूह खास्सअ झ़ूरा, सह आसा दाहुअ द।”
ऐहा गल्ला शूणीं बोलअ ईशू, “अह बमारी निं मौता लै आथी पर अह आसा परमेशरे प्रतप्पा हणां लै, कि इना महान कामां करै हुंह परमेशरो पूत तेऊए महान शगती रहैऊई सके।”
ईशू डाहा त दूई बैहणी मार्था मरिअम अर तिन्नें भाई लाज़रा संघै बडी झ़ूरी। ईशू का लागअ थोघ कि लाज़र आसा बमार पर सह ज़िधी थिअ, सह रहअ दूई धैल़ै तिधी। तेखअ बोलअ तेऊ दूई धैल़ै बाद आपणैं च़ेल्लै लै, “च़ाल्ला हाम्हां डेऊणअ ऐबै यहूदा मुल्खा लै।”
च़ेल्लै बोलअ ईशू लै, “हे गूरू, यहूदी च़ाहा ताह अज़ी बी पात्थरा करै मारनअ, तैबी कै तूह तिधा लै च़ाहा डेऊणअ?”
ईशू दैनअ तिन्नां लै ज़बाब, “धैल़ीए कै च़ार पहर निं हंदै? ज़ै कुंण धैल़ी हांढे, तेऊ निं ठोहल़ लागदी किल्हैकि तेऊ का शुझिआ संसारो प्रैश्शअ। पर ज़ै कुंण राची हांढे, तेऊ लागा ठोहल़ किल्हैकि राची हआ न्हैरअ।” ईशू बोली ईंयां गल्ला तिन्नां ई का, तेखअ बोलअ च़ेल्लै लै, “म्हारअ साथी लाज़र गअ सुत्ती, हुंह च़ाल्लअ तेऊ झ़ैऊंदअ डेऊई।”
तेखअ बोलअ च़ेल्लै तेऊ लै, “हे प्रभू, ज़ै सह सुत्ती गअ, तै कै अह बच़ी जाणअ?” ईशू बोलअ त तिन्नां लै कि लाज़र गअ सुत्ती, पर तिंयां समझ़ै कि तेऊ बोलअ इहअ कि सह आसा निंजा सुत्तअ द। तेखअ बोलअ ईशू तिन्नां लै साफ-साफ, “लाज़र गअ मरी, मुंह आसा एते खुशी कि हुंह ज़ेभै तेऊ प्राण शोटै हुंह निं तेभै तिधी थिई, ताकि तम्हां विश्वास होए। ऐबै च़ाल्ला हाम्हां डेऊणअ तेऊ सेटा लै।”
तेखअ थोमा, ज़हा लै दिमुस बोला, आपणैं साथी च़ेल्लै लै बोलअ, “च़ाल्ला हाम्हां बी हुअ एऊ संघै मरदै डेऊणअ।”
ईशू दैआ ज़िन्दगी
ज़ांऊं तिंयां तिधी पुजै ता, ईशू का लागअ इहअ थोघ कि लाज़रा हुऐ घोरी दाबी च़ार धैल़ै। बेथनी त एरुशलेम नगरी का कोई दूई मील दूर। खास्सै यहूदी तै तिधी मार्था मरिअमा सेटा तिन्नें भाई मरी करै चिंजदै आऐ दै। मार्था ईशूए गल्ला शूणीं आई बाता, तैणीं मिलदी, पर मरिअम रही घअरै। मार्था ईशू लै बोलअ, “हे प्रभू, ज़ै तूह इधी हंदअ, तै नांईं त मेरअ भाई कधि मरदअ, पर ऐबै बी आसा मुंह भरोस्सअ कि ज़ुंण बी तूह परमेशरा का मांगे, सह दैणअ परमेशरा ताल्है।”
ईशू बोलअ तैहा लै, “हैल़अ निं करै, तेरअ भाई हणअ ज़िऊंदअ।”
मार्था बोलअ ईशू लै, “मुखा आसा थोघ कि ज़ेभै परमेशरा मरी करै भिई करनै ज़िऊंदै तैहा बेला करनअ ताह सह बी ज़िऊंदअ।”1
ईशू बोलअ तैहा लै, “हुंह करा मूंऐं दै मणछा बी ज़िऊंदै, हुंह ई दैआ तिन्नां लै ज़िन्दगी। ज़ै कुंण मुंह दी विश्वास करे, सह ज़ै मरी बी जाए, सह हणअ भिई ज़िऊंदअ। पर ज़ुंण ज़िऊंदअ आसा अर मुंह दी विश्वास करा, तिंयां निं कधि मरनै। कै तूह ऐहा गल्ला दी विश्वास करा?”
तैहा बोलअ, “हाँ प्रभू हुंह करा ऐहा गल्ला दी विश्वास कि परमेशरो पूत मसीहा ज़ुंण एऊ संसारै एछणैं आल़अ त, सह आसा तूह ई।”
ईशू का छ़ुटी लेरा
इहअ बोली सह डेऊई अर आपणीं बैहणी मरिअमा का च़ुप्प-च़ुप्पै बोलअ, गूरू आसा इधी, सह शादा ताह पोर्ही। इहअ शूणीं सह तेभी पुजी ईशू सेटा। ईशू निं अज़ी गराऊंए पुजी त, पर सह थिअ अज़ी तिधी, ज़िधी तेऊ मार्था भेटी ती।
तिन्नैं यहूदी, ज़ुंण पांडा भितरी तिन्नां लै चिंजदै थिऐ आऐ दै, तिन्नैं ज़ाणअ कि मरिअम डेऊई हणीं घोरी सेटा तैहा ज़ैगा लेरा लांदी, ज़िधी लाज़र आसा दाबअ द, तेखअ डेऊऐ तिंयां बी तैहा पिछ़ू।
ज़ांऊं मरिअम तिधी पुजी, ज़िधी ईशू त, तिधी पुजधी तैहा ईशू सेटा माथअ टेक्कअ अर खूरा दी उटी बाखा लेरदी-लेरदी बोलअ, “हे प्रभू, ज़ै तूह इधी हंदअ, तै नांईं त मेरअ भाई मरदअ।”
तिन्नां लेरदै भाल़ी हुअ ईशू खास्सअ दुखी, अर आप्पू बी भर्हुअ तेऊओ गअल़। तेखअ बोलअ ईशू मरिअम अर तिन्नां यहूदी लै ज़ुंण मरिअमा संघै थिऐ आऐ दै, “तम्हैं तेऊए ल्हास किधी आसा डाही दी?”
तिन्नैं बोलअ, “हे प्रभू च़ाल्ल, आप्पै भाल़।” ईशूए आछी का छ़ुटै आशू। तेखअ लागै यहूदी आप्पू मांझ़ै बोल्दै, “भाल़ा अह तेऊ संघा केतरी झ़ूरी डाहा त।” पर तिन्नां मांझ़ै बोलअ कई लोगै इहअ बी, “अह ज़ुंण कांणै मणछा ठीक करदअ फिरा, इहअ बी निं करी सकअ कि सह मणछ नांईं मरदअ?”
लाज़र ज़िऊंदअ करनअ
खास्सअ दुखी हई पुजअ ईशू तैहा ज़ैगा, ज़िधी लाज़र त दाबअ द। सह थिई एक घोर कोती दी अर एकी बडै पात्थरा करै त घोरीओ मोहरअ बंद किअ द। ईशू बोलअ तिन्नां लै, “एऊ पात्थरा बदल़ा पोर्ही।”
तेखअ बोलअ तेऊ मूंऐं दै मणछे बैहणी मार्था, “हे प्रभू, तेऊ का हणीं ऐबै बास्स-शल़ैन्ह लागी दी, आझ़ गऐ तेऊ मरी च़ार धैल़ै हई।”
ईशू बोलअ तैहा लै, “मंऐं ताखा किज़ै बोलअ त कि, ज़ै तूह विश्वास करे तै भाल़णअ ताह परमेशरो प्रतप्प।” तेखअ बदल़अ तिन्नें सह पात्थर पोर्ही अर ईशू सरगा बाखा भाल़ी बोलअ, “हे मेरै बाब परमेशर, हुंह करा ताल्है शूकर कि तंऐं हेरी मेरी अरज़ शूणीं। मुखा त थोघ कि तूह शूणां हर बगत मेरी, पर इहअ बोलअ मंऐं तै कि ज़ुंण मुंह फेर ईंयां लोग आसा, ईंयां बी विश्वास करे हुंह आसा तंऐं छ़ाडअ द।”
इहअ बोली पाई ईशू ज़ोरै हाक, “हे लाज़र, बागा लै निखल़।” ज़ुंण लाज़र मरी गअ त, सह निखल़अ घोरी का बागा लै! तेऊए देही ती मरगे झिकल़ै करै पल़ेठुई दी अर तेऊओ मुंह त कुआया करै बंद। तेखअ बोलअ ईशू तिन्नां लै, “एऊ खोल्हा पोर्ही अर एऊ दैआ डेऊणैं।”
ईशूए खलाफ छ़ल़
(मोत्ती 26:1-5; मार्कुस 14:1,2; लूका 22:1,2)
तेखअ कई यहूदी मणछ ज़ुंण तिधी मरिअमा सेटा तै आऐ दै तिन्नां मांझ़ै किअ कई मणछै एऊ च़मत्कारा भाल़ी तेऊ दी विश्वास। तेखअ तिन्नां मांझ़ै दैनअ कई ज़ण्हैं फरीसी सेटा डेऊई ईशूए एऊ कामों समाद। इहअ शूणीं किई बडै प्रोहतै अर फरीसी कठा हई एक सभा संघा बोलअ, “हाम्हैं कै करा, अह मणछ, बडै स्वर्गे नछ़ैण अर च़मत्कार रहैऊआ?” ज़ै हाम्हैं एऊ लै एही ई ढील दैंदै रहे, सोभी करनअ तेऊ दी विश्वास कि अह आसा मसीहा, अर रोमी लोगा करनअ म्हारै भबनै अर देशा दी कबज़अ।
तेखअ तिन्नां मांझ़ै काईफा ज़ुंण तैहा साला माहा प्रोहत त, तेऊ बोलअ, “तम्हैं करा एही गल्ला कि ज़िहअ तम्हां का निं किछ़ै थोघ आथी! अर नां इहअ सोठदै कि तम्हां लै आसा अह भलअ कि म्हारै लोगा लै एक मणछ मरे, सारी ज़ाती, बरैबाद हणैं का बच़े।” सह गल्ल निं तेऊ आप्पू बाखा बोली, सह थिअ तैहा साला माहा प्रोहत, तेऊ किई आजू हणैं आल़ी गल्ला प्रगट कि ईशू मरनअ इज़राईली परज़ा लै। नां कि सिधअ तैहा ज़ाती लै, पर एते तैणीं बी कि परमेशरे छिंघुऐ दै बच्च़ै बी कठा करे। तैहा ई धैल़ी ओर्ही लागै तिंयां ईशू मारने जोगा करदै।
तैही निं तधा पोर्ही ईशू यहूदी मणछा जैंदरी प्रगटअ डेऊअ, पर तिधा का डेऊअ रेगीस्ताना नेल़ मुल्खै एप्रैम नगरी लै संघा रहअ आपणैं च़ेल्लै संघै तिधी।
यहूदी मणछो ऊवार्णैओ थैर त नेल़ अर सराज़ा का बी डेऊऐ कई लोग एरुशलेम तेऊ थैरा लै ताकि आप्पू शुचै करी सके।2 तिंयां लागै ईशू लोल़ै अर भबनै खल़ै हई बोल्दै कि तम्हैं कै समझ़ा? कि सह ऊवार्णे थैरा लै एछणअ कि नांईं? फरीसी अर बडै प्रोहतै बी थिअ सोभी लै इहअ हुकम डाहअ द करी कि, ज़ै कहा का ईशू शुझिए, तै खोज़ै हाम्हां का, ताकि तेऊ कैद करी सके।
Source notes (2)
- Cross-reference शधा. 24:15
- Cross-reference 2 इति. 30:17
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.