Kulvi Outer Seraji Bible
जोहन्ना 8
कंज़री बेटल़ी लै माफी
तेखअ डेऊऐ सोभ ज़ण्हैं आपणैं-आपणैं घअरा लै पर ईशू डेऊअ जैतून धारा लै। दुजै धैल़ै दोत्ती डेऊअ ईशू भबना लै। तिधी आऐ कई लोग तेऊ सेटा लै, अर सह लागअ भबने खोल़ै बेशी तिन्नां लै शिक्षा दैंदअ।
तेखअ आणी शास्त्री अर फरीसी तेऊ सेटा लै एक कंज़री बेटल़ी। सह ढाकी ती तिन्नैं मोक्कै दी कंझ़रदी। सह किई तिन्नैं सोभी लोगा नदरी खल़ी संघा बोलअ तिन्नैं ईशू लै, “हे गूरू, अह बेटल़ी ढाकी हाम्हैं मोक्कै दी कंज़रैई करदी। बधाना दी आसा मोसा हाम्हां लै बोलअ द कि एही बेटल़ी लै लागा पात्थरो ढो दैणअ, ऐबै तेरी ऐहा बेटल़ीए बारै किज़ै राऐ आसा?”1
अह गल्ल बोली तिन्नैं तेऊ परखणां लै ताकि तेऊ दी किज़ै नां किज़ै दोश काढी सके, पर ईशू रहअ उटी बाखा गुंठी करै धरनीं किज़ू लिखदअ लागी। ज़ांऊं तिंयां पुछ़दै ई तै लागै दै, ईशू फिरअ तिन्नां लै स्मुखअ संघा बोलअ, “तम्हां मांझ़ै ज़ुंणी कधि पाप निं किअ, सह बाहा ऐहा बेटल़ी लै सोभी का पैहलै पात्थरै।”2 तेखअ लागअ ईशू भिई गुंठी करै धरनीं माट्टै दी किज़ू लिखदअ।
इहअ शूणीं लागै करै तिंयां सोभ बडै का होछ़ै तैणीं एक-एक करी आपणीं बाता हांढदै। ईशू रहअ तिधी एक्कै ज़ण्हअ, अर सह बेटल़ी रही तिधी खल़्हुई। ईशू बोलअ तैहा बेटल़ी, “हे ज़नानी, तिंयां केस्सी डेऊऐ? ताल्है सज़ा कोही निं दैनी?” तैहा बोलअ, “हे प्रभू कोही निं।” तेखअ बोलअ ईशू तैहा लै, “हुंबी निं ताल्है कोई सज़ा दैंदअ, डेऊ, पर भिई निं पाप करी।”
ईशू आसा संसारा लै प्रैश्शअ
तेखअ बोलअ भिई ईशू लोगा लै, “संसारा लै प्रैश्शअ आसा हुंह, ज़ुंण मेरी गल्ला मनी मुंह पिछ़ू एछे सह निं न्हैरै दी रहणअ, पर तेऊ भेटणअ ज़िन्दगी दैणैं आल़अ प्रैश्शअ।”3
फरीसी पंथे लोगै बोलअ तेऊ लै, “तूह दैआ आपणीं शाजत आप्पै, तेरी शाजत निं शुची आथी।”
ईशू दैनअ तिन्नां लै ज़बाब, “हुंह दैआ आपणीं शाजत आप्पै, तैबी आसा मेरी शाजत शुची। किल्हैकि मुखा आसा थोघ कि हुंह किधा का आसा आअ द अर किधा लै डेऊणअ? पर तम्हां का निं थोघै कि तम्हैं किधा का आऐ अर किधा लै डेऊणैं?
“तम्हैं दैआ मणछे बणाऐं दै बधाने साबै होरी लै सज़ा, अर हुंह निं कोहिओ नसाफ करदअ आथी आअ द।
“ज़ै हुंह नसाफ करूं बी, तैबी आसा मेरअ नसाफ शुचअ। किल्हैकि हुंह निं एक्कै आथी, मुंह संघै आसा बाब परमेशर ज़ुंणी हुंह छ़ाडअ द आसा।
“थारै बधाना दी बी आसा लिखअ द, ‘ज़ै दूई मणछ एकी रंगे गल्ला खोज़े, तेता मना शुची शाजत।’ एक, दैआ हुंह तम्हां लै आपणैं बारै शाजत अर दुजअ दैआ मेरअ बाब मेरै बारै शाजत ज़ुंणी हुंह छ़ाडअ द आसा।”4
फरीसी पंथे लोगै बोलअ तेऊ लै, “तेरअ बाब किधी आसा?”
ईशू बोलअ तिन्नां लै, “ज़ै तम्हैं मुंह बछ़ैणदै, तै बछ़ैणनअ त तम्हां मेरअ बाब बी। ज़ेभै तैणीं तम्हां का इहअ थोघ निं लागे कि हुंह कुंण आसा तेभै तैणीं निं तम्हां का थोघ लागणअ कि मेरअ बाब कुंण आसा।” ईंयां गल्ला बोली तेऊ भबने भढारै शिक्षा दैंदी बारी, पर कोहै निं तेऊ कैद करना लै आजू निखल़ै। किल्हैकि तेऊओ बगत निं अज़ी आई त।
आपणैं बारै ईशूए बोल
तेखअ बोलअ तेऊ भिई तिन्नां लै, “मुंह ता डेऊणअ आपणीं बाता, पर तम्हैं हणैं मुंह लोल़ै, अर तम्हैं हणैं आपणैं पापा दी मरदै, अर ज़िधी हुंह डेओआ, तिधी निं तम्हैं एछी सकदै।”
ऐहा गल्ला लै लागै यहूदी सैणैं इहअ बोल्दै, “एऊ कै आप्पू ई करनी आपणीं हत्या, ज़ुंण अह इहअ बोला कि ज़िधा लै हुंह डेओआ, तिधा लै निं तम्हैं एछी सकदै?”
तेऊ बोलअ तिन्नां लै इहअ, “तम्हैं आसा उंधै पृथूईए, पर हुंह आसा उझै स्वर्गो। तम्हैं आसा एऊ संसारे पर हुंह निं एऊ संसारो आथी।
“तैही बोलअ मंऐं तम्हां लै इहअ, ‘ज़ै तम्हैं विश्वास नांईं करे कि हुंह आसा सह ई, तम्हैं मरनै अर ज़ुंण तम्हैं पाप आसा किऐ दै तेते भेटणीं तम्हां परमेशरा का सज़ा।’”
फरीसी पंथे लोगै बोलअ तेऊ लै, “तूह कुंण आसा?”
ईशू बोलअ तिन्नां लै, “हुंह आसा सह ई ज़ुंण हुंह शुरू ओर्ही तम्हां का खोज़दी आअ।
“थारै बारै आसा मुंह कई गल्ला सोठी लणा लै। पर मुंह इधा लै छ़ाडणैं आल़अ आसा शुचअ। हुंह खोज़ा एऊ संसारे मणछा का तिन्नां ई गल्ला, ज़ुंण मंऐं तेऊ का शूणीं दी आसा।”
तिंयां निं ऐहा गल्ला समझ़ै कि अह आसा लागअ द बाब परमेशरे बारै बोल्दअ। तेखअ बोलअ ईशू, “ज़ेभै तम्हां हुंह मणछो पूत उछ़टै दी छ़ड़ाऊंणअ, तेभै लागणअ तम्हां का थोघ कि हुंह आसा प्रभू अर हुंह निं आपणीं बाखा किछ़ै करदअ। हुंह बोला तिन्नां ई गल्ला ज़ुंण बाब मुखा खोज़ी दी आसा।
“ज़ुंणी हुंह छ़ाडअ द आसा सह आसा मुंह संघै, तेऊ निं हुंह कल्ही आथी डाहअ द, किल्हैकि हुंह करा सदा तिन्नां ई कामां ज़ुंण तेऊए मरज़ी आसा।”
ईशू त इना गल्ला बोल्दअ ई लागअ द कि कई लोगै किअ तेऊ दी विश्वास।
सत्ता दैणीं तम्हां लै आज़ादी
तेखअ बोलअ ईशू तिन्नां यहूदी लै ज़ुंणी तेऊए गल्ला दी विश्वास किअ, “ज़ै तम्हैं मेरी शिक्षा शूणीं ज़िन्दगी दी तिहअ ई करे, तै हणैं तम्हैं असली दी मेरै च़ेल्लै। तै समझ़णअ तम्हां सत्त अर तेऊ सत्ता दैणीं तम्हां लै तिन्नां गल्ला का आज़ादी ज़ेते तम्हैं गलाम आसा।”
तिन्नैं बोलअ, “हाम्हैं आसा आबरामे खिंबा का, अर हाम्हैं निं कधि कोहिए गलाम हुऐ आथी, तै तूह इहअ किज़ै बोला कि तम्हैं हणैं आज़ाद?”
ईशू बोलअ तिन्नां लै, “हुंह खोज़ा तम्हां का सत्त कि ज़ुंण बी पाप करा, सह आसा पापो गलाम। दास निं सदा घअरै रहंदअ पर शोहरू रहा कबल्लअ।5 ज़ै पूत तम्हां लै आज़ादी दैए, तै हणैं तम्हैं सच्च़ी आज़ाद। मुखा आसा थोघ कि तम्हैं आसा आबरामे लुआद। पर तैबी निं मेरै बैणा लै थारै दिलै ज़ैगा आथी। तैही च़ाहा तम्हैं मुंह मारी पाणअ। हुंह करा तिहअ ई ज़ुंण मंऐं आपणैं बाब संघै आसा भाल़अ द, अर तम्हैं बी करा तिहअ ई ज़ुंण तम्हैं आपणैं बाबा का आसा भाल़अ द।”
तिन्नैं दैनअ तेऊ लै ज़बाब, “म्हारअ दाद-बाब आसा आबराम।”
तेखअ बोलअ ईशू तिन्नां लै, “ज़ै तम्हैं आबरामे लुआद आसा, तै करदै तम्हैं आबरामा ज़िहअ काम बी। पर ऐबै च़ाहा तम्हैं इहै मणछा मारी पाणअ ज़ुंणी तम्हां का शुचअ बैण खोज़अ ज़ुंण तेऊ परमेशरा का शूणअ। इहअ, कधू आबरामै बी नांईं किअ? तम्हैं करा आपणैं बाब ज़िहअ काम।” तेखअ बोलअ तिन्नैं तेऊ लै, “हाम्हैं निं आथी कंज़रीए लुआद, म्हारअ आसा एक्कै बाब, मतलब परमेशर।”
ईशू बोलअ तिन्नां लै, “ज़ै थारअ बाब परमेशर हंदअ तै डाहणीं ती तम्हां मुंह संघै झ़ूरी। किल्हैकि हुंह आसा परमेशरा का निखल़ी आअ द, हुंह निं आप्पै आथी आअ द पर हुंह आसा तेऊ छ़ाडअ द। तम्हैं मेरी गल्ला किल्है निं समझ़दै? तै कि मेरअ बैण निं शूणीं सकदै।
“तम्हैं आसा आपणैं बाब राख्से शोहरू अर तम्हैं च़ाहा तिन्नां गल्ला करनी ज़ेता थारअ बाब राख्स तम्हां का खोज़ा। सह आसा शुरू ई का हत्या करनै आल़अ। सह निं सत्ता दी रहंदअ। किल्हैकि सत्त निं तेऊ दी आथी। तेऊओ आसा सभाब ई झ़ुठअ। किल्हैकि सह आसा झ़ुठै-झ़ुठैओ बाब।6
“हुंह खोज़ा सत्त पर तम्हैं निं मेरी गल्लो विश्वास करदै! तम्हां मांझ़ै कुंण सका मुल्है पापी बोली? ज़ै हुंह शुचअ बोला, तै तम्हैं मेरी गल्लो विश्वास किल्है निं करदै? ज़ुंण परमेशरो आसा, सह शूणां परमेशरे गल्ला, तम्हैं निं तै शुणदै कि तम्हैं निं परमेशरे आथी।”
ईशू अर आबराम
इहअ शूणीं बोलअ यहूदी तेऊ लै, “तैही बोला हाम्हैं ताल्है इहअ ठीक ई, ‘तूह आसा सामरी अर ताह भितरी आसा भूत?’”
ईशू दैनअ तिन्नां लै ज़बाब, “मुखा भूत ता निं आथी पर हुंह करा आपणैं बाब परमेशरो अदर अर तम्हैं निं मेरअ अदर करदै। पर हुंह निं आपणअ अदर, गुणगान च़ाहंदअ। पर हाँ, एक आसा अर सह करा ऐहा गल्लो नसाफ बी। हुंह खोज़ा तम्हां का सत्त, ‘ज़ै कुंण मेरी गल्ला शुणें, तेऊए निं कधि मौत हणीं।’”
यहूदी बोलअ तेऊ लै, ऐबै गअ हाम्हां का थोघ लागी कि ताह दी आसा भूत, आबराम मूंअ, परमेशरे गूर बी मूंऐं, अर तूह बोला कि ज़ुंण तेरी गल्ला मने सह रहणअ सदा ज़िऊंदअ! म्हारअ बाब आबराम मूंअ, तूह कै तेऊ का बी बडअ आसा? परमेशरे गूर बी मूंऐं, तूह आप्पू कै समझ़ा?
ईशू दैनअ तिन्नां लै ज़बाब, “ज़ै हुंह आप्पै आपणैं प्रतप्पा खोज़ूं, सह प्रतप्प निं किछ़ै हणीं। पर मेरी प्रतप्पा खोज़दअ आसा मेरअ बाब ज़हा लै तम्हैं आपणअ परमेशर बोला। तम्हां का निं तेऊओ थोघ आथी पर मुखा आसा थोघ। ज़ै हुंह इहअ बोलूं कि मुखा निं तेऊओ थोघ आथी तै हणअ त हुंह तम्हां ज़िहअ झ़ुठअ। पर मुखा आसा तेऊओ थोघ अर हुंह तेऊओ शूणां मना बी। थारै दाद-बाब आबरामे ती मुंह भाल़णें बडी आशा अर तेऊ अह गल्ल भाल़ी बी अर सह खुश बी हुअ।”
यहूदी बोलअ तेखअ ईशू लै, “अज़ी निं तूह पज़ाह सालो बी हुअ अर तैबी बोला तूह इहअ कि तंऐं भाल़अ आबराम।”
ईशू बोलअ तिन्नां लै, “हुंह खोज़ा तम्हां का सत्त कि हुंह त आबरामा का बी पैहलै।” ऐहा गल्ला शूणीं च़कै तिन्नैं ईशू मारना लै पात्थर पर ईशू निखल़अ भबना का बागै दूर।
Source notes (6)
- Cross-reference लेब. 20:10
- Footnote रोम. 2:1
- Footnote जोह. 12:46
- Footnote बधा. 19:15
- Footnote गल. 4:30
- Footnote शधा. 13:10
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.