जोहन्‍ना 13

ईशू धोऐ च़ेल्‍ले खूर

1ऊवार्णे थैरा का आजी ज़ांऊं ईशू का थोघ लागअ कि मेरी गई सह घल़ी एछी कि ऐबै लागणअ एऊ संसारा छ़ाडी आपणैं बाब परमेशरा सेटा लै फिरी डेऊणअ। तेऊ रहैऊअ कि सह केतरी झ़ूरी करा, ज़ुंण तेऊ संघै एऊ संसारै तै तेऊ किई तिन्‍नां लै ज़िन्दगी खतम हणैं तैणीं झ़ूरी।

2ज़ांऊं राख्स शमौने शोहरू करेती गराऊंए यहूदे मन्‍नैं एही सोठ मुक्‍कअ त पाई कि ईशू बझ़ैल़णअ कैद करनै, तेखअ गअ बैल़ी खाणें बेला 3ईशू का थोघ लागी कि मेरै बाब परमेशरै दैनअ सोभी गल्‍लो हक मुल्है अर हुंह आसा परमेशरा सेटा का आअ द अर मुंह लागा ऐबै परमेशरा सेटा लै बापस डेऊणअ, 4रोटी खाणैं का उझ़ुअ खल़अ अर आपणीं घेरी का खोल्हअ आपणअ च़ोल़अ अर गाचू बान्हअ आपणीं कुछी। 5तेखअ लागअ डबरू दी पाणीं भरी आपणैं च़ेल्‍ले खूरा धोंदअ अर ज़ुंण गाचू कुछी बान्हअ द त, तेता करै लागअ तिन्‍नें खूरा टुशदअ।

6ज़ांऊं सह शमौन पतरासा सेटा पुजअ, तेऊ बोलअ, “हे प्रभू, तंऐं कै मेरै खूर लाऐ धोई?”

7ईशू दैनअ तेऊ लै ज़बाब, “ज़ुंण हुंह एभै करा, अज़ी निं ताह एते समझ़ आथी, पर तेखअ जाणअ तूह समझ़ी।”

8पतरासै बोलअ, “हुंह निं दैंदअ कधि ताह मेरै खूर धोणैं।”

इहअ शूणीं दैनअ ईशू ज़बाब, “ज़ै हुंह तेरै खूर नांईं धोऊं तै निं मुंह संघै तेरी किछ़ै साझ़ आथी।”

9इहअ शूणीं बोलअ शमौन पतरासै, “हे प्रभू, तै धो मुंह खूरा संघै मेरै हाथा मुंडा बी।”

10ईशू बोलअ तेऊ लै, “ज़ुंण न्हैऊई आसा गअ द, तेऊ निं हाथा का सुआई होर धोणें ज़रुरत आथी, सह आसा ज़ात पठी शुचअ। तम्हैं बी आसा शुचै पर सोभै निं आथी।” 11तेऊ का थिअ थोघ कि सह कहा बझ़ैल़णअ ढाकणैं, तैही बोलअ तेऊ इहअ, “तम्हैं बी आसा शुचै पर सोभै निं आथी।”

12ज़ांऊं सह तिन्‍नें खूर धोई मुक्‍कअ, अर झिकल़ै बान्हीं भिई तिन्‍नां मांझ़ै बेठअ, तेखअ लागअ तिन्‍नां लै बोल्दअ, “तम्हैं ऐहा गल्‍ला समझ़ै बी कि मंऐं तम्हां संघै कै किअ? 13तम्हैं बोला मुल्है गूरू अर प्रभू, ऐहा गल्‍ला बोला तम्हैं ठीक, किल्हैकि हुंह आसा थारअ गूरू अर थारअ प्रभू। 14ज़ै मंऐं गूरू अर प्रभू हई बी थारै खूर धोऐ, ठीक इहै ई लागा तम्हां बी एकी दुजे खूर धोणैं। 15किल्हैकि मंऐं रहैऊअ तम्हां का पैहलै आप्पू करी ताकि ज़िहअ मंऐं तम्हां संघै किअ, तिहअ करा तम्हैं बी। 16हुंह खोज़ा तम्हां का सत्त कि दास निं आपणैं मालका का बडअ हंदअ, नां शधाणूं आपणैं छ़ाडणैं आल़ै का बडअ हंदअ।

17“तम्हां का आसा इना गल्‍लो थोघ, पर परमेशर हणअ तम्हां करै तै खुश ज़ै तम्हैं तिहअ ई करे। 18हुंह निं तम्हां सोभिए बारै आथी बोल्दअ लागअ द, ज़ुंण मंऐं छ़ांटी आसा हेरै दै, पर अह थिऐ कि पबित्र शास्त्रो इहअ लिखअ द पूरअ होए, ‘ज़ुंण मेरी रोटी खाआ त, सह ई बणअ मेरअ दुशमण।’1

19“ऐहा गल्‍ला हणैं का आजी हेरअ मंऐं तम्हां का खोज़ी, ताकि ज़ेभै अह गल्‍ल होए, तेखअ करे तम्हैं विश्वास कि हुंह आसा मसीहा।2 20हुंह खोज़ा तम्हां का सत्त, ज़ुंण तेऊए कदर करे ज़ुंण मंऐं तम्हां सेटा लै छ़ाडअ, सह करा मेरी कदर। ज़ुंण मेरी कदर करा सह करा तेऊए कदर ज़ुंणी हुंह संसारा लै आसा छ़ाडअ द।”

छ़ल़-कपट हणैं बाखा शारअ

(मोत्ती 26:20-25; मार्कुस 14:17-21; लूका 22:21-23)

21इना गल्‍ला बोल्दी भर्हुऐ ईशूए भितरा का आत्मां दी गअल़, अर तेऊ बोलअ, “हुंह खोज़ा तम्हां का सत्त कि तम्हां मांझ़ै आसा एक इहअ ज़हा हुंह ढाकणैं बझ़ैल़णअ।” 22च़ेल्‍ले मन्‍नैं पल़अ इहअ बैहम कि अह हाम्हां मांझ़ै कसरै बारै बोला? तिंयां लागै एकी दुजे मुंहैं भाल़ै। 23ईशूओ च़ेल्‍लअ ज़ुंण ईशू संघै खास्सी झ़ूरी डाहा त, सह थिअ ईशूए हिक्‍का बाखा लै ढूल़ी करै बेठअ द। 24शमौन पतरासै पुछ़अ तेऊ बाखा शारअ करी, “अह हाम्हां मांझ़ै कसरै बारै बोला?” 25तेखअ पुछ़अ तेऊ तिहअ ई करै ईशूए हिक्‍का बाखा ढूल़ी करै, “हे प्रभू, सह कुंण आसा?”

ईशू दैनअ ज़बाब, “ज़हा लै मुंह रोटीओ म्हार डबेऊई करै दैणअ, सह ई आसा।”

26तेखअ दैनअ ईशू रोटीओ म्हार डबेऊई करै शमौने शोहरू करेती गराऊंओ यहूदा लै। 27रोटीए म्हारा ढाकदी बस्सअ तेऊ दी राख्स, तेखअ बोलअ ईशू तेऊ लै, “ज़ुंण तंऐं करी आसा लाअ द, तेऊ कर छ़ेक्‍कै।” 28पर तिधी बेठै दै निं कोही बी अह गल्‍ल समझ़ी कि ईशू अह गल्‍ल तेऊ लै किल्है बोली। 29यहूदा का हआ त ढबैओ थैल्‍लू सभाल़अ द, इहअ करै कई समझ़अ इहअ कि ईशू बोलअ तेऊ लै इहअ कि ज़ुंण च़िज़ा हाम्हां थैरा मनाऊंणा लै लोल़ी, तिन्‍नां आण हाट्टी का लई, या इहअ कि भुखै-नचिशै लै एछ किज़ै दैई। 30तेखअ डेऊअ सह तेभी रोटीए म्हारा ढाकी राची बागा लै।

नऊंअ हुकम

31ज़ांऊं सह बागा लै डेऊअ, तेखअ बोलअ ईशू, “ऐबै हुअ मुंह मणछे पूतो प्रतप्प अर परमेशरो प्रतप्प हुअ तेऊ दी।” 32तेखअ दैणअ परमेशरा बी आपणैं मन्‍नैं तेऊ एभी तेऊओ प्रतप्प। 33ए लान्हैंओ, हुंह आसा थोल़ी घल़ी तम्हां सेटा, तेखअ हणैं तम्हैं मुंह लोल़ै अर ज़िहअ मंऐं यहूदी का बोलअ, ज़िधा लै हुंह डेऊणअ तिधी निं तम्हैं एछी सकदै, अर तिहअ ई बोला हुंह ऐबै तम्हां लै।

34“ऐबै दैणीं मुंह तम्हां लै एक नऊंअ हुकम कि एकी-दुजै संघै डाहा झ़ूरी, ज़ेही मंऐं तम्हां लै झ़ूरी किई तेही झ़ूरी करा तम्हैं एकी-दुजै लै। 35ज़ै तम्हैं आप्पू मांझ़ै झ़ूरी डाहे, तेता करै बछ़ैणनै तम्हैं होरी लोगा बी कि तम्हैं आसा मेरै च़ेल्‍लै।”

पतरासे नांईं करने बारै शारअ

(मोत्ती 26:31-35; मार्कुस 14:27-31; लूका 22:31-34)

36शमौन पतरासै ईशू लै बोलअ, “हे प्रभू, तूह किधा लै च़ाल्‍लअ डेऊई?” ईशू दैनअ तेऊ लै ज़बाब, “ज़िधा लै हुंह डेऊणअ तिधा लै निं तूह मुंह पिछ़ू एभी एछी सकदअ, पर तेखअ एछणअ तूह मुंह पिछ़ू।”

37पतरासै बोलअ, हे प्रभू, “हुंह ताह पिछ़ू एभी किल्है निं एछी सकदअ? हुंह सका तेरी तैणीं आपणीं ज़ान बी दैई।”

38ईशू बोलअ, “तूह कै मेरी तैणीं आपणीं ज़ान बी सका दैई? हुंह खोज़ा ताखा सत्त कि आझ़ ऐहा ई राची मुर्गै दूई बारी बाशणैं का आजी हुधणअ तूह मेरै बारै चिई बारी।”