मूल़

मूल़

सोभी गल्‍ले शुरूआत हणें बारै

भेत

लिखणैं आल़अ: मोसा

सन: 1446 का 1405 ईसा आजी

ऐहा कताबो नाअं “मूल़” शब्दो मतलब आसा इब्रानी बोली दी शुरूआत किल्हैकि ऐहा कताबा दी आसा सारै भ्रमंडे शुरूआत हणें बारै, मणछे शुरूआत अर इज़राईलीए शुरूआते बारै।

ऐहा कताबो पैहलअ धैअ (1-11) खोज़ा हाम्हां का हर च़िज़े शुरूआत अर मणछे बारै आबरामा तैणीं बाढै। बिधाता ज़ुंण बी बणाअं सह थिअ बधिया, पर सोभी का पैहलै आदमी अर तेऊए लाल़ी निं तिहअ शूणअ ज़िहअ तिन्‍नां लै बिधाता बोलअ त। इहअ करै हुई संसारै बूराईए शुरूआत।

खिरी हुऐ आजू मणछ इहै पापी कि बिधाता पाऐ सोभै पाणींए प्रल़या करै मारी। पर तिन्‍नां मांझ़ा का बच़ाऊअ एक मणछ नूह अर तेऊए टबर। किल्हैकि नूह त तेऊ ज़मानैं बूरै संसारा मांझ़ै एक्‍कै धर्मीं। तैही बोलअ बिधाता तेऊ लै कि एक बडअ ज़हाज़ बणाऐं अर आप्पू संघै डाहै तेथ सोभी रंगे धरतीए ज़ीब बी। पाणींए प्रल़या हणैं का बाद भर्हुऐ भिई संसारै मणछ अर बादा का बिस्सरुऐ बिधाता तिंयां बी।

ऐहा कताबे धैअ (12-50) दी आसा आबरामे अर आजू तेऊए आद-लुआदे बारै बाढै। बिधाता छ़ांटै तिंयां आप्पू लै अर तिन्‍नां लै बोला कि तिंयां आसा तेऊए आपणैं खास लोग।

आबरामे अर तेऊए लाल़ी साराईए निं खास्सी प्रोढी अमरा तैणीं लुआद हुई, पर बिधाता त तिन्‍नां लै बोली डाहअ द कि तेरै हणैं शोहरू अर तेरी आद-लुआद हणीं एतरी कि तिन्‍नां निं कुंण गणी सकदअ, तिन्‍नां करै भेटणीं सारै संसारे मणछा बर्गत।

आबराम अर सारा लागै कनान देशा बाखा लै हांढदै, बिधाता ती तिन्‍नां लै एही करार किई दी कि सह देश दैणअ मुंह आजू तेरी आद-लुआदा लै। खिरी हुअ प्रोढी अमरा आबरामो शोहरू इसहाक अर तेऊओ हुऐ आजू दूई शोहरू एसाब अर याकब।

खिरी मुक्‍का अह कताब याकबे बारा शोहरूए मिसर देशै पुजणें गल्‍ला खोज़ी करै। याकबो एक शोहरू युसुफ जाआ तेभा लै मिसर देशो माहा मंत्री बणी। पर युसुफै डाही सह गल्‍ल आद कि एकी धैल़ै करनी बिधाता आपणीं करार पूरी।

मरनै का आजी डाहअ युसुफै आपणैं भाई का बोली, “हुंह निं ऐबै खास्सअ ज़िऊंदअ। पर बिधाता करनी थारी फाज़त, तेऊ हेरनै तम्हैं एऊ देशा का काढी तेऊ देशै पजैल़ी ज़िधा लै निंणे तेऊ म्हारै दाद-बाब अब्राम, इसहाक अर याकबा का आसा किई दी। तम्हैं दैआ मुल्है ज़बान कि ज़ेभै तम्हां बिधाता एऊ देशा का काढी तेऊ देशा लै निंए, तेभै निंयैं मेरी ऐहा ल्हासा बी आप्पू संघा।”

(50:24)

कताबे बांड

सोभी च़िज़े शुरूआत हणें बारै 1:1—2:25

संसारै पापे शुरूआत 3:1—4:16

पाणींए प्रल़या का आजी आदमीओ खिंब 4:17—5:32

धर्मीं नूह अर पाणींए प्रल़या 6:1—9:28

नूहो खिंब अर बाबेल नगरीए उछ़टी कोठी 10:1—11:32

बिधाता छ़ांटअ आबराम 12:1-20

आबराम अर लूत 13:1—14:24

बिधाता किई आबरामा संघै करार 15:1-21

आबराम, हागार अर इशमाईल 16:1-16

बिधाता बदल़अ अब्रामो नाअं आबराम 17:1—18:15

आबराम, लूत, सदोम अमोरा 18:16—19:38

आबराम, साराई अर इसहाक 20:1—23:20

इसहाको रिबका संघै बैह 24:1-67

आबरामे मौत 25:1-18

इसहाक अर तेऊओ खिंब 25:19—28:9

याकब अर तेऊओ खिंब 28:10—35:29

एसाब अर तेऊओ खिंब 36:1-43

युसुफ पाअ तेऊए भरैरै बेच़ी 37:1-36

यहूदा अर तामार 38:1-30

युसुफ मिसर देशै 39:1—41:57

युसुफ अर तेऊए भाई 42:1—45:28

याकब अर तेऊओ खिंब 46:1—47:31

याकबे मौत 48:1—50:14

युसुफे मौत 50:15-26